Murotjon Azimov dastlab Ko‘kdala tumanida qad rostlayotgan San’at saroyining qurilish ishlarini ko‘zdan kechirdi.

Ushbu san’at saroyi musiqa maktabi, raqs to‘garaklari, baxshichilik maktabi hamda 3D kinoteatrni o‘z ichiga olib, qurilish jarayonlari joriy yilda yakunlanishi rejalashtirilgan.

Viloyat rahbari tumandagi o‘zgarishlarni o‘rganish davomida 330 o‘ringa mo‘ljallangan 1-sonli ixtisoslashtirilgan maktab binosini ham ko‘zdan kechirib, o‘quvchilar uchun yaratilayotgan shart-sharoitlar bilan yaqindan tanishdi.

Shuningdek, Murotjon Azimov Yettitom shaharchasida barpo qilinayotgan 20 ta lotdan iborat, 400 dan ortiq fuqarolarni doimiy ish o‘rni bilan ta’minlaydigan, mebel, oziq-ovqat, plastik va sopol idishlar, burama mix, plastik o‘yinchoqlar ishlab chiqarish hamda sut mahsulotlarini qayta ishlash tarmoqlarini o‘z ichiga olgan kichik sanoat zonasi qurilishi va unda amalga oshiriladigan loyihalarni ko‘zdan kechirdi.

Shu bilan birgalikda viloyat hokimi Ko‘kdala tumanining markaziy shifoxonasida ham o‘rganish olib bordi.

Murotjon Azimov Ko‘kdala tumanidagi o‘rganishlar natijasida aniqlangan muammo va kamchiliklarni bartaraf etish bo‘yicha mas’ullarga tegishli topshiriqlar berdi.