wrapper

Bugungi kunda dunyo yengil sanoatida sun’iy toladan foydalanish darajasi keskin ortgan bo‘lsa-da, tabiiy toladan tayyorlangan tekstil mahsulotlariga bo‘lgan talabni kamaytira olgani yo‘q. Aksincha, har jihatdan foydali, davolash xususiyatlariga ega, ekologik xavfsiz shunday kiyim-kechak, uy-ro‘zg‘or buyumlarini xarid qilishga ehtiyoj  tobora ortmoqda. Natijada tabiiy tola yetkazib beruvchi sohalar, xususan, ipakchilik tarmog‘i rivoji ham jadal tus olayotir. Bu yo‘nalishda mahsuldorlik sezilarli oshgani kuzatilmoqda. Jahonda sifatli pilla xom ashyosi yetishtirishda yetakchi hisoblangan mamlakatimizda ham mavjud salohiyatdan unumli foydalanishga alohida e’tibor qaratilmoqda.

 

Sir emas, ayni paytda yurtimiz ipak sanoatini yangi bosqichga ko‘tarish uchun keng ko‘lamli ishlarga qo‘l urilmoqda. Soha samaradorligini oshirish, imkon qadar kam resurs sarflab, innovatsion usullarni qo‘llagan holda ko‘proq “kumush tola” ishlab chiqarish choralari ko‘rilayapti. Ushbu jarayonning ilk davrida qimmatli xom ashyoni yetishtirishda ishtirok etuvchi pillakorlar moddiy manfaatdorligi ta’minlanmoqda. Tarmoqning ozuqa, moddiy-texnika bazasi yanada mustahkamlanayapti. Ilgari pilla yetishtirish faqat bir mavsumdan iborat edi, endilikda uchtaga yetdi. O‘z-o‘zidan o‘sishga nafaqat hajm, balki sifat borasida ham erishilayotir.

 

Respublikada ipak xom ashyosini yetkazib beruvchi muhim hudud sanalgan viloyatimiz misolida qarasak, joriy yilda uch mavsum davomida vohamiz pillakorlari ipak qurti boqib, hosil yetishtirish bilan mashg‘ul bo‘ldi. Sohada 450 nafar kishi doimiy, 8 ming kishi mavsumiy mehnat qilmoqda. Pillakorlarga 38 ming quti urug‘ tarqatilgandi. Yakunda 1 ming 800 tonnadan ziyod xom pilla tayyorlandi. Bu 600 tonna atrofida quruq pilla degani. Albatta, xom ashyo tayyor mahsulotga nisbatan arzon baholanadi. Nima qilsa, ko‘proq daromad olish imkoni mavjud? Tabiiyki, u qayta ishlashga yo‘naltirilsa, foyda ham 3-4 barobar, balki undan ham ziyoda bo‘ladi. Binobarin, oddiy xomcho‘tga ko‘ra, 600 tonna toladan 150 tonnadan ortiq ipak-kalava ishlab chiqarish mumkin. Hozirgi vaqtda jahon bozorida 1 kilogramm shunday mahsulot narxi o‘rtacha 40-60 AQSH dollarini tashkil etadi.

 

Xo‘sh, xom ashyo zaxirasi yetarlicha bo‘lgan viloyatimizda pillaga sanoat usulida ishlov berish darajasi qoniqarlimi? Bunga “ha” deb javob berish mumkin. Negaki ish boshlaganiga yaqinda besh yil to‘ladigan, Qarshi shahridagi “Radiant Silk” O‘zbekiston-Xitoy qo‘shma korxonasi quvvati bir yilda 450 tonna quruq pillani qayta ishlashga mo‘ljallangan. Ayon bo‘ladiki, fabrika dastgohlarining uzluksiz ishlashi uchun hech qanday monelik yo‘q. Avval korxona xom ashyoni sotib olgan bo‘lsa, hozir unga o‘zi to‘liq egalik qiladi. Ya’ni yetishtiruvchini urug‘lik, boshlang‘ich badal puli, ozuqa bilan ta’minlab, oxirida undan xom pillani to‘lig‘icha qabul qilib oladi.

 

- Davlatimiz rahbarining tegishli qarori bilan yo‘lga qo‘yilgan bu amaliyot biz uchun ancha foydali bo‘ldi, ishlab chiqarish jarayonida yagona zanjir yuzaga kelishiga sharoit yaratdi, - deydi korxona direktori o‘rinbosari Tolib Qalandarov. – Endi xom ashyoni yetishtirishdan qayta ishlashgacha bo‘lgan barcha bosqichda qatnasha olamiz. Yetkazib beruvchidan sifat talab qilishga ham haqlimiz. Natijada ishda unumdorlik yuqori bo‘layapti. Imkoniyatimizdan samarali foydalanayapmiz. Xususan, 2018-yilning 9 oyida 20 tonnadan ko‘p ipak-kalava ishlab chiqardik. Bozorimiz aniq, mahsulot chet ellik xaridorlardan ortmaydi. O‘tgan yili qiymati 790 ming AQSH dollaridan ziyod mahsulotni eksport qilgan bo‘lsak, joriy yilning ayni davridayoq bu ko‘rsatkichga erishdik. Eksportga yo‘llash uchun hali yana mahsulotimiz bor. Yil so‘ngigacha mavjud raqamni 4 million AQSH dollariga yetkazish ko‘zlangan.

 

Korxona mas’ullarining bildirishicha, odatda quruq pillaning sifatsiz qismi yigirishda ishlatilmaydi, chiqindiga chiqadi. Bu undan butkul foydalanilmaydi, degani emas. Chiqindi xom ashyodan ham bir necha turdagi yarim tayyor mahsulot olish mumkin. Jumladan, ipak momig‘i, ip va dag‘al mato shular sirasiga kiradi. Unga ham talab bor, boz ustiga tashqi bozorda. Shu sababli korxonada ishlab chiqarilayotgan bu mahsulotlar ham faol eksportga chiqarilmoqda.

 

Yuqorida aytganimizdek, tabiiy gigiyenik xususiyatga ega ekani hamda ekologik bezararligi bilan ajralib turishi ipakning qadrini oshirayapti. Ayni shu jihat pilla xom ashyosini chuqur qayta ishlashni tashkil etishni taqozo etmoqda. Zamonaviy texnologiyalardan foydalanib, ipakdan tayyor mahsulot ishlab chiqarishni yo‘lga qo‘yish sohaning eksport ortidan oladigan daromadini yanada yuksaltirishga keng imkon beradi. Ahamiyatlisi, korxona mutasaddilari bu borada allaqachon ish boshlab yuborgan.

 

- Avvaldanoq asosiy maqsadimiz ishlab chiqarishning barcha bosqichini ishga tushirish edi, - deydi korxona sexi boshlig‘i Kamol Qurbonov.  – Ammo ayrim omillar bunga yo‘l bermayotgandi. Endilikda nafaqat o‘zimiz, balki xorijlik investorlar ham bunga xayrixohlik bildirishmoqda, istiqbolli loyihani tezroq ro‘yobga chiqarish payida. Kelgusida gazlama to‘qishni yo‘lga qo‘yamiz. Yaqin orada chet eldan to‘qish dastgohlari keltirilishi kerak. Loyihamiz amalga oshsa, yiliga 500 ming pogonametr ipak mato ishlab chiqara boshlaymiz. Bundan   tashqari, korxonamizda ipak gilamlar to‘qishni tashkil etish ko‘zda tutilgan. Shu maqsadda yil oxiriga qadar 20 ta yangi uskuna o‘rnatamiz. 2019-yilda esa qo‘shimcha 50 ta dastgoh olib kelamiz. Buning samarasida 50 ta yangi ish o‘rni yaratiladi. Dastlabki hisob-kitoblarga ko‘ra, loyihaga 30 million AQSH dollari atrofida investitsiya kiritilishi reja qilingan.  Uning asosiy qismi to‘g‘ridan-to‘g‘ri xorij sarmoyasi bo‘ladi.

 

Ma’lum bo‘lishicha, bugungi paytda korxonaning yangi ishlab chiqarish sexini ta’mirlash, dastgohlarni o‘rnatishga moslash ishlari jadal ketmoqda. Investorlarni tez qaror qabul qilishga undagan narsa esa ishlab chiqarilajak mahsulotning yuqori eksportboplik xususiyatidir. Keyinchalik korxona negizida zamonaviy texnopark barpo etish maqsad qilingan. Bu esa ishlab chiqarishni yagona zanjirga birlashtirish imkonini beradi. Yuqori hosildorlikka ega yangi tutzorlar tashkil qilinadi. Chet ellik investorlar ana shunday taklif bilan chiqqan.

 

Yana bir muhim jihati, mazkur sub’yekt viloyatimizning ipak qurti urug‘iga bo‘lgan talabini to‘liq ichki imkoniyat hisobidan qoplash borasida ish olib borayapti. Gap shundaki, biroz avval poytaxtimizda o‘tgan uchrashuvda  “O‘zbekipaksanoat” uyushmasi hamda Xitoy Xalq Respublikasining Shandun provinsiyasidagi “Shandong Guantong Silkworm Eggs Co” kompaniyasi o‘rtasida hamkorlik memorandumi imzolangandi. Mazkur kompaniya dunyoning ko‘p davlatlariga ipak qurti urug‘ini eksport qiladi. E’tiborlisi, Chin yurti ishbilarmonlari mamlakatimizda pillachilik tarmog‘ining ipak qurti urug‘i ishlab chiqarish sohasiga investitsiya kiritmoqchi. Bu tadbirda kompaniya va Qarshi shahridagi “Radiant Silk” qo‘shma korxonasi o‘rtasida kelishuv bayonnomasi tuzilgan.

 

Unga ko‘ra, viloyatimizda 2019-yilda 20 ming qutidan boshlanib, 2021-yilda 150 ming qutigacha ipak qurti urug‘i ishlab chiqarish quvvatiga ega qo‘shma korxona barpo etiladi. Buning uchun Shahrisabz shahri tanlangan. Korxona mas’ullarining ta’kidlashicha, asosiy maqsad chetdan urug‘ olib kelinishiga chek qo‘yish va urug‘ importini to‘xtatish hamda kelajakda o‘zimizda ishlab chiqarilgan urug‘larni eksport qilishdir. Natijada qo‘shimcha ravishda 100-150 doimiy, 300-400 mavsumiy ishchining mehnat bilan bandligi ta’minlanadi.

 

Mirzohid JO‘RAYEV

 

Suratlarda: korxona faoliyatidan lavhalar.

 

Sobir Narziyev olgan suratlar.

Hozir yurtimizdagi qishloq xo'jaligi mahsulotlarini eksport qiluvchi korxonalar uchun ayni qizg'in palla. Dunyo bozorida ancha xaridorgir sanalgan aksariyat meva-sabzavot mahsulotlari huddi shu paytda g'arq pishib etiladi. Jumladan, uzum, xurmo, olma, yong'oq, anor singari sarxil noz-ne'matlarni yig'ib olish fursati etgan. Ularning asl sifati va ta'miga putur etmay turib, darhol mashinalarga yuklab, chet ellik xaridorlarga taqdim etish kerakligini tadbirkorlar yaxshi biladi.
                      G'uzor tumanidagi yirik eksportchi korxona – “Lavr farm” mas'uliyati cheklangan jamiyati rahbariyati ham o'tgan yilgi natijalarni yanada yaxshilash, imkon qadar ko'proq mahsulot eksport qilish payida. Binobarin, ushbu tadbirkorlik sub'ekti bultur 614 ming dollarlik mahsulotni chetga sotgan bo'lsa, 2018 yil uchun xorijlik hamkorlar bilan qiymati 5 million AQSh dollariga teng shartnoma imzolagan. Ushbu mablag'ning ma'lum qismi esa avvaldan o'tkazib ham berilgan. Shu bois buyurtmachi talabiga asosan xushta'm va servitamin meva-sabzavot mahsulotlarini uzluksiz etkazib berish ta'minlanmoqda.
- Bahor va yoz fasllarida ham hech tinim bilganimiz yo'q, - deydi korxona rahbari G'anisher Bozorov. – Mavsumga qarab turli mahsulotlarni yuklab jo'natdik. Xususan, shu vaqtgacha Rossiya davlatiga 20 tonna qovun, katta hajmda uzum, sarimsoq, piyoz, shuningdek, olxo'ri, o'rik kabi ho'l mevalar eksportini amalga oshirdik. Bundan tashqari, Ukrainaga 40 ming AQSh dollari miqdoridagi yangi uzilgan ko'katlarni sotdik. Hozirgacha tashqi bozorga yo'llangan mahsulotlar qiymati 517 ming AQSh dollariga etdi. Ayni paytda esa yana eksport qilish uchun ko'kat, xurmo va uzum jamg'arib qo'yish bilan bandmiz. Halizamon ularni ham maxsus mashinalarga ortib, xaridorlarga etkazishni boshlaymiz.
              Tadbirkorning so'zlariga ko'ra, korxona ixtiyorida chet ellik sheriklarni ta'minlash uchun yil oxirigacha mahsulot bo'ladi. Ishbilarmon bu borada o'z tomorqasida mahsulot etishtiruvchi aholi yordamiga tayanadi. Eksportga yaroqli noz-ne'matlarning salmoqli qismi maqbul narxlarda dehqon va bog'bonlarning qo'lidan yig'ib olinayapti. Eksportyor xorijda mamlakatimizda pishib etilgan qishloq xo'jaligi mahsulotlariga talab ortib borayotganini ham alohida e'tiborga olgan.  Ayrim turdagi meva-chevani o'z imkoniyati bilan etishtirishga bel bog'lagan. Shu yili tuman hududidan tadbirkorga 70 gektarga yaqin er maydoni ajratib berildi. Uning katta qismida tokzor barpo etildi. Qolaversa, ko'plab o'rik va olxo'ri nihollari o'tqazib, mo''jaz bog' ham yaratilgan. Bu bog'lar 3-4 yilda o'z mevasini berishni boshlaydi.  Tabiiyki, sara mahsulot eksportdan ortmaydi.
Mirzohid JO'RAYEV
Sobir NARZIYEV olgan suratlar.
Qashqadaryogz.uz ma'lumotlari asosida

Chorshanba, 26 Sentyabr 2018 00:00

Qashqadaryoda sport musobaqalari bo'lib o'tmoqda

Avtor


2018 yil 25 sentyabr kuni Shahrisabz tumanida 1-oktyabr “O'qituvchi va murabbiylar kuni”ga bag'ishlab vatanparvarlik harbiy sport maktabi o'quvchilari  (2005-2006, 2007-2008, 2009-2010 yillarda tug'ilgan qizlar va o'smirlar) o'rtasida  marafon musobaqasi o'tkazildi.
    Musobaqada Mo'minobod qishlog'i bekati start qismi, Chorshanbe TIP-2 sport inshooti finish qismi etib belgilandi. Musobaqa Shahrisabz tuman Jismoniy tarbiya va sport bo'limi rahbarligi ostida bo'lib o'tdi. Tuman Musobaqada jami 200 (shundan 45 nafari qizlar)nafar yoshlar ishtirok etishdi.
    Musobaqa natijalariga ko'ra:
1-o'rin Shahrisabz tuman vatanparvarlik harbiy sport maktabi
2-o'rin Yakkabog' tumani vatanparvarlik harbiy sport maktabi
3-o'rin Kitob  tumani vatanparvarlik harbiy sport maktab jamoalariga nasib etdi.
Musobaqa ishtirokchilari tuman Jismoniy tarbiya va sport bo'limi hamda vatanparvarlik harbiy sport maktabi rahbariyati tomonidan diplom va esdalik sovg'alari bilan taqdirlandilar.


Juma, 05 Oktyaber 2018 00:00

O'qitish ikki marta o'qish demakdir

Avtor


Har bir murg'ak bolani o'z farzandidek ardoqlab, yosh avlod tarbiyasi uchun ko'z nuri, qalb qo'ri, butun borlig'ini baxsh etadigan o'qituvchi va murabbiylar tom ma'noda fidoyi kasb egalaridir.
Shavkat MIRZIYOYEV,
O'zbekiston Respublikasi Prezidenti

Dehqonobod tumanidagi 69-maktab nemis tili fani o'qituvchisi Anvar To'raev izlanuvchanligi, o'z ustida muttasil ishlashi bilan hamkasblari e'tirofini qozongan. U 2016-2018 yillarda Toshkentdagi Gyote institutida, shu orada Germaniyaning Shvebish-Xall shahrida malaka oshirdi. Dars jarayonida zamonaviy texnologiyalardan unumli foydalanishni o'rgandi. Shu sabab o'quvchilari uning har bir darsini orziqib kutadi.
Muallim o'tgan yili “Yilning eng yaxshi fan o'qituvchisi” ko'rik-tanlovining viloyat bosqichida 1-o'rinni qo'lga kiritgan bo'lsa, bu yil ushbu tanlovning respublika bosqichida 2-o'rinni egalladi. Sohadagi xizmatlari inobatga olinib, “O'zbekiston Konstitusiyasiga 25 yil” esdalik nishoni bilan taqdirlangan.
- Jamiyatga foydasi tegadigan, etuk, bilimli shogirdlar tayyorlash – orzuim, - deydi u. – Shogirdlarimning “Bilimlar bellashuvi”, fan olimpiadalarida erishayotgan yutuqlari meni yanada olg'a yurishga boshlaydi. Zero, o'qitish ikki marta o'qishdir.
Sojida ALLAYoROVA
Suratda: Anvar To'raev dars jarayonida.
 Sobir NARZIYEV olgan surat.
Qashqadaryogz.uz ma'lumotlari asosida

O'zbekiston Respublikasi Prezidenti Shavkat Mirziyoevning 2018 yil 30 sentyabrda qabul qilingan “Maktabgacha ta'lim tizimini boshqarishni takomillashtirish chora-tadbirlari to'g'risida”gi qaroriga ko'ra, O'zbekiston Respublikasi Maktabgacha ta'lim vazirligi negizida axborot va pedagogika texnologiyalari innovasion markazi, ixtisoslashtirilgan loyiha-izlanish instituti, infratuzilmani rivojlantirish bo'yicha injiniring kompaniyasi, Maktabgacha ta'limni rivojlantirish jamg'armasi tashkil etiladigan bo'ldi.
  O'zbekiston Respublikasi Maktabgacha ta'lim vazirligining tashkiliy tuzilmasi va vazirlik markaziy apparatining yangilangan tuzilmasi tasdiqlandi. Unga ko'ra, vazirlik tizimi boshqaruv xodimlarining cheklangan soni 2 324 nafar, shu jumladan, Vazirlik markaziy apparati xodimlari 138 nafar, shuningdek, metodistlar 471 nafar etib belgilandi.
Qoraqalpog'iston Respublikasi Maktabgacha ta'lim vazirligi, viloyat va Toshkent shahar maktabgacha ta'lim boshqarmalari, maktabgacha ta'lim tuman (shahar) bo'limlari rahbarlari O'zbekiston Respublikasi maktabgacha ta'lim vaziri tomonidan joylardagi davlat hokimiyati organlari bilan kelishilgan holda lavozimga tayinlanadi va lavozimidan ozod qilinadi.
  2019 yil 1 yanvardan maktabgacha ta'lim tizimining pensiya yoshidagi xodimlariga, ularning maktabgacha ta'lim tizimi muassasalaridagi faoliyati asosiy ish joyi bo'lgan taqdirda pensiya to'liq miqdorda to'lanadi.
  Shuningdek, qaror bilan 2018-2019 yillarda maktabgacha ta'lim tizimini yanada takomillashtirishning qo'shimcha chora-tadbirlari dasturi  tasdiqlandi.
Qishloq joylarda qurilayotgan ko'p qavatli turar joy uylarining birinchi qavatlarida yoki alohida bino ko'rinishida kamida ellik o'rinli maktabgacha ta'lim muassasasi tashkil etiladi.
Davlat maktabgacha ta'lim muassasalarini tashkil etish, qayta tashkil etish, tugatish, ularga tegishli er uchastkalari va ko'chmas mulkni olib qo'yish faqat maktabgacha ta'lim vazirligi bilan kelishilgan holda amalga oshiriladi.
  2019 yil 1 yanvardan maktabgacha ta'lim muassasalarida ta'lim olayotgan bolalar uchun jismoniy shaxs shaxsiy identifikasiya raqamini berish bo'yicha xizmatni joriy etiladi.

Mamlakatimizning chekka hududlarida sanoat, xizmat ko'rsatish kabi sohalar rivoji uchun salohiyat etarli. Istalgancha xom ashyo topish mumkin. Zarur ishchi kuchi borasida ham muammo yo'q. Zamonaviy infratuzilma u yoki bu darajada bo'lsa-da yaxshi shakllangan, hozirda yanada takomillashmoqda. Taklif etilayotgan mahsulot yo xizmat ham erda qolmaydi, bozor esa bor. Faqat yuqori quvvatga ega korxona tashkil etilsa, zamonaviy texnologiyalar asosida raqobatbardosh mahsulot ishlab chiqarish yo'lga qo'yilsa bo'lgani. Qo'lida ortiqcha mablag'i bor, tadbirkorman, degan kishi ushbu imkoniyatdan samarali foydalanmoqda. Hatto chet ellik investorlar ham yurtimiz ishbilarmonlik jabhasidagi bu qulayliklardan bahramand bo'lishga ishtiyoq bildirishmoqda.
Misol uchun, Belarus respublikasida faoliyat ko'rsatayotgan yirik kompaniya – “Slodch” qandolat fabrikasi rahbariyati kelgusida viloyatimizda qizg'in biznes boshlash istagida. Fabrika vakillarining yaqinda Dehqonobod tumaniga amalga oshirgan tashrifi ham bu qiziqish shunchaki emasligini ko'rsatib turibdi. Tashrif asnosida ishbilarmonlar hududning investisiyaviy salohiyati bilan yaqindan tanishish imkoniga ega bo'ldi. Delegasiya a'zolari mazkur tumandagi bir qancha ishlab chiqarish quvvatlari faoliyati bilan tanishdi, infratuzilmani ko'rdi.
- Ma'lumki, to'g'ridan-to'g'ri xorijiy investisiyalar oqimini ko'paytirishga davlat siyosati darajasida e'tibor qaratilmoqda, - deydi Dehqonobod tumani hokimi o'rinbosari Boybo'ri Hasanov. – Shu maqsadda hududda zarur ishlar olib borilayapti. “Slodch” qandolat fabrikasi vakillarining tashrifini bu boradagi sa'y-harakatlar samarasi sifatida baholash mumkin. Ular biz bilan yaqin hamkorlik qilish tarafdori. Rossiya va YEvropada ancha mashhur bo'lgan pecheneni shu erda ham ishlab chiqarishmoqchi. Potensial investorlarga tayyor bino ajratib berish ko'zda tutilgan. Bu esa ularga har tomonlama ma'qul keldi. Tumanimizga katta sarmoya olib kirib, yaqin istiqbolda zamonaviy ishlab chiqarish liniyasini ishga tushirish taklifi bilan chiqishdi.
Tuman hokimligi mutasaddisining aytishicha, ayni paytda Belarus tomoni bilan muzokaralar davom ettirilayapti. Ayrim amaliy masalalar hal etilishi lozim. Shundan so'ng yuqori darajadagi qatnashchilar ishtirokida hamkorlik memorandumi imzolanadi.
Ma'lumot uchun, 100 yildan oshiq tarixga ega “Slodch” qandolat fabrikasi Belarus mamlakatida o'z yo'nalishida etakchi sanaladi. Bozorning qariyb 30 foizini egallagan. Kompaniya ishlab chiqarayotgan pechene turi esa 100 xilga etadi. Mahsulot YEvroittifoq va MDH mamlakatlari, AQSh, Kanada va Xitoyga ham eksport qilinadi. Fabrikaning yillik ishlab chiqarish hajmi 15 ming tonnani tashkil etadi.
Boybo'ri Hasanovning qayd etishicha, biroz avval Dehqonobod tumani hududida yana bir chet ellik investor o'z faoliyatini yo'lga qo'ygan. “Zaher Taher  Trading” MChJ nomi bilan ro'yxatga olingan, afg'onistonlik ishbilarmon sarmoyasi ishtirokidagi mazkur xorijiy korxona eksportbop qishloq xo'jaligi mahsulotlari etishtirish bilan shug'ullanadi. Kavrak plantasiyasi va bodomzor barpo etish tadbirkor rejalariga kiradi. Buning uchun u hududga 200 ming AQSh dollari miqdorida kapital olib kirishni maqsad qilgan. Hozirda korxona tuman hududida tabiiy o'sayotgan kavrak o'simligi shirasini yig'ib, xorij bozoriga chiqarish chorasini ko'rayapti.
Mirzohid JO'RAYEV
Qashqadaryogz.uz ma'lumotlari asosida

Sayido Nasafiy nomidagi viloyat axborot-kutubxona markazida “Bolalar kitobi” ko'rgazmasi tashkil etildi.

Davlatimiz rahbarining “Kitob mahsulotlarini nashr etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targ'ib qilish bo'yicha kompleks chora-tadbirlar dasturi to'g'risida”gi qarori ijrosi doirasida tashkil etilgan ko'rgazmada umumta'lim maktablari o'quvchilari viloyat nashriyotlarida chop etilgan hamda kitob savdosi do'konlari keltirgan, shuningdek, viloyat axborot-kutubxona markazi, xalq ta'limi boshqarmasi tasarrufidagi axborot-resurs markazi fondlaridagi kitoblar, bolalar adabiyotlari bilan tanishishdi.

- Sarguzasht kitoblarni sevib o'qiyman, - deydi Qarshi shahridagi 11-maktab o'quvchisi Madina Xoliqova. – Ushbu yo'nalishda yangi chop etilgan ko'plab asarlar bilan tanishib chiqdim, ularni xarid qilish niyatini dilimga tugib qo'ydim. Mushoiradagi ishtirokim uchun maxsus sovg'aga ham ega bo'ldim.

Tadbir doirasida badiiy chiqishlar ham namoyish etildi.

T.PO'LATOV

Suratlarda: kitob ko'rgazmasidan lavhalar.

Sobir NARZIYEV olgan suratlar.

Qashqadaryogz.uz ma'lumotlari asosida

2018 yil 7 sentyabr kuni huquqni muhofaza qiluvchi idoralar tomonidan o'tkazilgan tezkor tadbir davomida Muborak tumani hokimining yordamchisi A.Mamashukurov, tuman moliya bo'limi mudiri S.Qo'yliev 21 million so'mni pora sifatida olayotgan vaqtda, shu yil 19 avgust kuni Qarshi shahar qurilish bo'limi boshlig'i vazifasini vaqtincha bajaruvchi S.Yusupov va Qarshi shahar iqtisodiyot va hududlarni kompleks rivojlantirish bo'limi bosh mutaxassisi N.Qurbonov 4300 AQSh dollarini pora tariqasida olayotgan vaqtda, 2018 yil 5 sentyabr kuni viloyat o'rta maxsus, kasb-hunar ta'limi boshqarmasi bo'lim boshlig'i Sh.Jovliev va Muborak sanoat kasb-hunar kolleji direktori o'rinbosari R.Abdiev 800 AQSh dollarini qabul qilib olayotgan vaqtlarida qo'lga olingan.
Mas'uliyatli lavozimda ishlab kelgan ushbu shaxslar shaxsiy manfaatlari yo'lida mansab vakolatlarini suiiste'mol qilishgan, aholini, ayniqsa, tadbirkorlarni har tomonlama qo'llab-quvvatlash, ularning qonuniy huquqlarini ro'yobga chiqarishda ko'maklashish o'rniga shaxsiy manfaatdorlik olish yo'lida jirkanch ishga qo'l urishgan.
Masalaning ushbu jihatlari viloyat hokimligida Odob-axloq komissiyasi yig'ilishida atroflicha muhokama qilindi.
Viloyat huquqni muhofaza qiluvchi idoralar mas'ul xodimlari, shuningdek, davlat hokimiyati va boshqaruvi organlari, shahar, tuman studiyalari orqali ushbu tizimlar quyi bo'g'inlari vakillari qatnashgan yig'ilishni viloyat hokimi, komissiya raisi Zafar Ro'ziev boshqarib bordi.
Selektor yig'ilishida mahalliy davlat hokimiyati organlari mansabdor shaxslari, xodimlari hamda    boshqa mas'ullarning korrupsiyaga qarshi kurashish sohasidagi huquqiy savodxonligini oshirish, jamiyatda korrupsiyaga nisbatan murosasiz munosabatni shakllantirish yuzasidan zarur chora-tadbirlar ko'rish, mansabdor shaxslar o'z mansab yoki xizmat majburiyatlarini beg'arazlik bilan, xolisona, vijdonan bajarishi, korrupsiya uchun shart-sharoit yaratadigan har qanday harakatdan o'zini tiyishi shartligi qayd etib o'tildi.
O'ziga yuklatilgan vazifalarni lozim darajada bajarmagani, xususan, hokimlik apparati, korxona, tashkilot va muassasalarning faoliyatini nazorat qilishni susaytirib yuborganliklari sababli Muborak tumani hokimi G'.Djavliev, Qarshi shahar hokimi J.Fozilov, viloyat  moliya boshqarmasi boshlig'i A.Shukurov, viloyat iqtisodiyot va hududlarni kompleks rivojlantirish bosh  boshqarmasi boshlig'i I.Amanov, viloyat qurilish bosh boshqarmasi boshlig'i     O.Xudaynazarov va viloyat o'rta maxsus, kasb-hunar ta'limi boshqarmasi boshlig'i K.Yangiboevga ogohlantirish berildi.
Kun tartibidagi masala yuzasidan tegishli qaror qabul qilinib, ijroga yo'naltirildi.
B.SAYFIYEV
Qashqadaryogz.uz ma'lumotlari asosida

       Shahrisabz shahri madaniyat saroyida Yevropa kinosi festivali bo'lib o'tdi. Festival Yevropa ittifoqining O'zbekistondagi delegasiyasi, “O'zbekkino” milliy agentligi va Qashqadaryo viloyati hokimligi hamkorligida tashkil etildi.
Festivalning tantanali ochilish marosimida YEvropa ittifoqining O'zbekistondagi elchisi Eduards Stiprays, o'zbek kino ijodkorlari hamda OAV vakillari qatnashdi.
Festival doirasida Shahrisabz shahri madaniyat bo'limi tayyorlagan “Bayram tuhfasi” nomli konsert, shuningdek Belgiya, Latviya, Sloveniya, Shveysariya, Finlyandiya, Chexiya va Vengriyaning mashhur kinokartinalari namoyish etildi.
Eslatib o'tamiz, mazkur festival O'zbekistonda oltinchi marta tashkil qilindi.

                                                             Turon24.uz ma'lumotlari asosida

Dushanba, 01 Oktyaber 2018 00:00

USTOZIMGA TABRIK

Avtor

  Men Kitob tumanidagi 4-sonli umumta'lim maktabida tahsil olganman. Erishgan barcha muvaffaqiyatlarim uchun ustozlarimdan qarzdorman. O'tgan ustozlarimning oxirati obod bo'lsin! Bugungi kunda nafaqadagi ustozlarimga mustahkam sog'liq tilayman!

          Ma'rifat fidoyilariga ehtirom ko'rsatish, ularni e'zozlash har birimizning burchimiz.

           Aziz muallimlar! Kasb bayramingiz muborak bo'lsin!

Zafar Ruziev, Qashqadaryo viloyati hokimi

Bazaviy interaktiv xizmatlar

Manzilimiz


Manzil: Qashqadaryo viloyati, Qarshi shahri, Mustaqillik Maydoni,1
Pochta indeksi:180100
Telefon
: 0(375)221-12-88, 0(375)221-03-81
Faks
: 0(375)221-13-40
Veb-sayt
http://www.qashqadaryo.uz
Elektron pochta
Yaqin jamoat transport to`xtash joylari 
Milliy bank va Mustaqillik Maydoni bekati
Avtomashrut
1,4,5,7,10,18,20,22,23,27,
37,44,462,11,21,37,33

Hozir saytimizda

Bizning saytimizda 301 mehmonlar va ro'yhatdan o'tgan foydalanuvchilar 0

Foydali resurslar

O‘zbekiston Respublikasi Prezidentining Matbuot xizmati
www.press-service.uz
   
O‘zbekiston Respublikasi Oliy Majlisining Senati
www.senat.uz
   
O‘zbekiston Respublikasi Oliy Majlisining Qonunchilik palatasi
www.parliament.gov.uz
   
O‘zbekiston Respublikasining Hukumat portali
www.gov.uz
   
O‘zbekiston Respublikasi Oliy Majlisining Inson huquqlari bo‘yicha vakili (ombudsman)
www.ombudsman.uz
   
O‘zbekiston Respublikasi Bosh prokuraturasi
www.prokuratura.uz
   
 
Aloqa, axborotlashtirish va telekommunikatsiya texnologiyalari sohasida nazorat bo'yicha davlat inspeksiyasi
http://gis.uz/

 

Mobil ilovalar

Maxsus imkoniyatlar

K'orinish

Pastda o'zingizga kerakli parametrni tanlasng
Blue Green Red Radian
Select menu
Google Font
Body Font-size
Body Font-family
Reset