Welcome to Qashqadaryo viloyat hokimiyati   Click to listen highlighted text! Welcome to Qashqadaryo viloyat hokimiyati Powered By GSpeech

wrapper

Maxsus imkoniyatlar
Items filtered by date: Aprel 2017 - Qashqadaryo viloyat hokimiyati

O'zbekiston Respublikasi Prezidentining qarori

Respublikada sog'liqni saqlashni isloh qilish davlat dasturlarini amalga oshirish doirasida aholiga onkologik tibbiy yordam ko'rsatishning yaxlit tizimi tashkil etildi. Onkologiya xizmatining yagona vertikal integrasiyalashtirilgan tizimi yaratildi, onkologiya muassasalarini zamonaviy yuqori texnologiyali asbob-uskunalar bilan jihozlash ishlari amalga oshirilmoqda, professional kadrlar tayyorlashning zamonaviy ilmiy maktabi shakllantirilgan. Onkologiya muassasalari amaliyotiga saratonga tashxis qo'yish va davolashning bir qancha zamonaviy usullari joriy etilgan, onkologik patologiya profilaktikasi tizimi takomillashtirilmoqda, bu esa kasallikning ilk bosqichlarida bemorlarni ikki baravar ko'p aniqlash imkonini berdi.

Shu bilan birga, butun jahonda bo'lgani singari, respublikada onkologik kasalliklar o'sishi qayd etilmoqda. Tibbiyot fanini rivojlantirishning zamonaviy bosqichi saraton kasalliklarining oldini olish choralarini yanada takomillashtirishga va respublika aholisiga onkologik yordam berish sifatini jahon andozalari darajasigacha oshirishga yo'naltirilgan ustuvor vazifalar hal etilishini taqozo qiladi.

Aholi orasida onkologik kasalliklarning oldini olish va barvaqt aniqlashning samarali tizimini yaratish, onkologik kasalliklarga tashxis qo'yish va davolashning ilg'or usullarini joriy etish, respublika onkologiya muassasalarining moddiy-texnik bazasini va kadrlar salohiyatini mustahkamlash hamda ularning tuzilmasini takomillashtirish maqsadida:

1. Quyidagilar onkologiya xizmatini yanada rivojlantirish va aholiga onkologik yordam ko'rsatishni takomillashtirishning asosiy yo'nalishlari etib belgilansin:

onkologik kasalliklarning oldini olish va barvaqt tashxis qo'yish chora-tadbirlarini takomillashtirish, saraton kasalliklarini barvaqt aniqlashning skrining dasturlarini bosqichma-bosqich hamma joyda tatbiq etish;

aholining tashxis qo'yish va davolashning zamonaviy yuqori texnologiyali usullaridan foydalanishini yaxshilash, onkologik kasalliklarni davolashning yuqori samaradorligiga erishish, onkologiya muassasalarining dori vositalari, reagentlar va sarflash materiallari bilan ta'minlanish darajasini oshirish;

yangi onkologiya muassasalarini qurish, rekonstruksiya qilish va mukammal ta'mirlash, tibbiyot uskunalari, asboblar va inventar bilan jihozlash (to'liq jihozlash) asosida ularning moddiy-texnik bazasini modernizasiya qilish;

onkologiya muassasalarining kadrlar salohiyatini mustahkamlash hamda onkologik kasalliklarning oldini olish, tashxis qo'yish va davolash sohasida respublikadagi ilmiy tadqiqotlar doirasini kengaytirish, shuningdek, xalqaro hamkorlikni kengaytirish va ilmiy ishlanmalarning zamonaviy jahon tajribasini milliy sog'liqni saqlash amaliyotiga joriy etish.

2. Quyidagilar:

onkologiya sohasida tibbiyot tashkilotlari faoliyatini muvofiqlashtirishning yagona metodik vertikali shakllantirilishini nazarda tutuvchi O'zbekiston Respublikasi onkologiya xizmatining tashkiliy tuzilmasi 1-ilovaga muvofiq;

2017-2021 yillarda O'zbekiston Respublikasida onkologiya xizmatini yanada rivojlantirish va aholiga onkologik yordam ko'rsatishni takomillashtirish dasturi 2-ilovaga muvofiq;

2017-2021 yillarda respublika onkologiya muassasalarini tibbiyot uskunalari, asboblar va inventar bilan jihozlash (to'liq jihozlash)ning asosiy parametrlari 3-ilovaga muvofiq tasdiqlansin.

O'zbekiston Respublikasi Moliya vazirligi O'zbekiston Respublikasi Davlat byudjeti parametrlarini shakllantirishda har yili ushbu qaror bilan tasdiqlangan 2017-2021 yillarda O'zbekiston Respublikasida onkologiya xizmatini yanada rivojlantirish va aholiga onkologik yordam ko'rsatishni takomillashtirish dasturida ko'zda tutilgan tadbirlarni bajarishga zarur mablag'lar ajratilishini nazarda tutsin.

O'zbekiston Respublikasi Sog'liqni saqlash vazirligi Tashqi iqtisodiy aloqalar, investisiyalar va savdo vazirligi, Tashqi ishlar vazirligi va Iqtisodiyot vazirligi bilan birgalikda ushbu qaror bilan tasdiqlangan 2017-2021 yillarda O'zbekiston Respublikasida onkologiya xizmatini yanada rivojlantirish va aholiga onkologik yordam ko'rsatishni takomillashtirish dasturini amalga oshirish uchun xorijiy davlatlar, xalqaro moliyaviy tashkilotlarning imtiyozli kreditlarini (qarzlarini) va grantlarini hamda boshqa byudjetdan tashqari mablag'larni jalb etish yuzasidan zarur chora-tadbirlar ko'rsin.

3. O'zbekiston Respublikasi Sog'liqni saqlash vazirligi, Iqtisodiyot vazirligi va Moliya vazirligining:

O'zbekiston Respublikasi Sog'liqni saqlash vazirligining Respublika onkologiya ilmiy markazini O'zbekiston Respublikasi Sog'liqni saqlash vazirligining Respublika ixtisoslashtirilgan onkologiya va radiologiya ilmiy-amaliy tibbiyot markazi etib qayta tashkil qilish;

Respublika ixtisoslashtirilgan onkologiya va radiologiya ilmiy-amaliy tibbiyot markazida yuridik shaxs tashkil etmasdan, markaz xodimlarining umumiy soni doirasida Saraton profilaktikasi markazi va Eksperimental onkologiya markazini tashkil etish;

hududiy onkologik dispanserlarni va Toshkent shahar onkologiya dispanserini Respublika ixtisoslashtirilgan onkologiya va radiologiya ilmiy-amaliy tibbiyot markazining filiallariga aylantirish to'g'risidagi taklifi qabul qilinsin.

4. Quyidagilar Respublika ixtisoslashtirilgan onkologiya va radiologiya ilmiy-amaliy tibbiyot markazi hamda uning filiallari faoliyatining asosiy yo'nalishlari etib belgilansin:

aholining onkologik kasalliklarning oldini olish, tashxis qo'yish va davolash bo'yicha xalqaro andozalar darajasida ixtisoslashtirilgan yuqori texnologiyali tibbiy yordamga bo'lgan talab-ehtiyojini qondirish;

onkologiya sohasida aholiga yuqori malakali davolash-profilaktika yordami ko'rsatgan holda onkologik kasalliklarning oldini olish, tashxis qo'yish va davolashning zamonaviy usullarini joriy etish;

onkologiya sohasida zamonaviy talablarga javob beradigan va zamonaviy onkologiyaning ilg'or texnologiyalarini egallagan yuqori malakali tibbiyot kadrlari va ilmiy mutaxassislar tayyorlash;

onkologiya sohasida, shu jumladan, zamonaviy tibbiyot fanining ilg'or yutuqlaridan foydalangan holda ilmiy-amaliy tadqiqotlar va ishlanmalarni amalga oshirish.

5. Belgilansinki:

Saraton profilaktikasi markazi – onkologik kasalliklar profilaktikasi va skrining tekshirishlar o'tkazish, onkologik kasalliklarga chalingan bemorlarning yagona ma'lumotlar bazasini (kanser-registr) shakllantirish, saratonning oldini olish samarali dasturlarini ishlab chiqqan holda epidemiologik vaziyat monitoringini olib borish bo'yicha muvofiqlashtiruvchi-metodik faoliyatni ta'minlaydi;

Eksperimental onkologiya markazi – kanserogenez va saraton epidemiologiyasi hamda xavfli o'smalar rivojlanishining molekulyar-biologik mexanizmi, o'smaga qarshi mahalliy preparatlarni ishlab chiqish sohasida ilmiy tadqiqotlarni amalga oshiradi.

6. Quyidagilar:

Respublika ixtisoslashtirilgan onkologiya va radiologiya ilmiy-amaliy tibbiyot markazining tuzilmasi 4-ilovaga muvofiq;

Saraton profilaktikasi markazi va Eksperimental onkologiya markazining tuzilmalari 5- va 6-ilovalarga muvofiq;

Respublika ixtisoslashtirilgan onkologiya va radiologiya ilmiy-amaliy tibbiyot markazi filialining namunaviy tuzilmasi 7-ilovaga muvofiq ma'qullansin.

O'zbekiston Respublikasi sog'liqni saqlash vaziriga, zarurat bo'lganda, Respublika ixtisoslashtirilgan onkologiya va radiologiya ilmiy-amaliy tibbiyot markazi va uning filiallari tuzilmasiga xodimlarning umumiy soni doirasida o'zgartirishlar kiritish huquqi berilsin.

7. O'zbekiston Respublikasi Sog'liqni saqlash vazirligi ushbu qaror talablarini hisobga olgan holda bir oy muddatda Respublika ixtisoslashtirilgan onkologiya va radiologiya ilmiy-amaliy tibbiyot markazi to'g'risidagi Nizomni hamda uning filiallari namunaviy ustavini tasdiqlasin.

8. 2017-2020 yillarda Respublika ixtisoslashtirilgan onkologiya va radiologiya ilmiy-amaliy tibbiyot markazi va uning filiallari binolarini rekonstruksiya qilish, mukammal ta'mirlash va yangilarini qurishning asosiy parametrlari 8-ilovaga muvofiq tasdiqlansin.

Belgilansinki, Respublika ixtisoslashtirilgan onkologiya va radiologiya ilmiy-amaliy tibbiyot markazi va uning filiallari binolarini rekonstruksiya qilish, mukammal ta'mirlash va yangilarini qurish ishlarini moliyalashtirish belgilangan tartibda O'zbekiston Respublikasi Moliya vazirligi huzuridagi byudjetdan tashqari Ta'lim va tibbiyot muassasalarining moddiy-texnik bazasini rivojlantirish jamg'armasi mablag'lari hisobidan amalga oshiriladi.

9. Mazkur qarorning bajarilishini nazorat qilish O'zbekiston Respublikasining Bosh vaziri A.N.Aripov va O'zbekiston Respublikasi Prezidentining Davlat maslahatchisi A.N.Yunusxodjaev zimmasiga yuklansin.


O'zbekiston Respublikasi Prezidenti                             Sh.MIRZIYoYEV

Toshkent shahri, 2017 yil 4 aprel


* * *
 
 
O'zbekiston Respublikasi Prezidentining "2017-2021 yillarda
O'zbekiston Respublikasida onkologiya xizmatini yanada
rivojlantirish va aholiga onkologik yordam ko'rsatishni
takomillashtirish chora-tadbirlari to'g'risida"gi qaroriga
 
ShARH

Mustaqillik qo'lga kiritilgandan keyin O'zbekiston Respublikasida xalqimizning sog'lig'ini mustahkamlash, etuk va barkamol avlodni tarbiyalash davlat siyosatining ustuvor yo'nalishlaridan biri etib belgilandi. Hozirgi vaqtda O'zbekistonning barcha mintaqalarida tibbiy xizmatlar sifatini yanada oshirish uchun shart-sharoitlar yaratishga alohida e'tibor berilmoqda. Mamlakat Prezidenti Shavkat Mirziyoev o'z nutqlarida aholining sifatli tibbiy xizmatga bo'lgan ehtiyojini qondirish zarurligini qayta-qayta qayd etdi. Jumladan, joriy yilda bo'lib o'tgan sog'liqni saqlash tizimining rahbar xodimlari bilan uchrashuvlarda davlat rahbari tomonidan tarmoqning holatiga tanqidiy baho berildi, bu aholi sog'lig'ini muhofaza qilish sohasida bir qancha muammolarni hal etish yo'lidagi muhim qadam bo'ldi.

Mamlakatni rivojlantirishning muhim ijtimoiy ustuvor vazifalari sifatida aholiga onkologik yordam berish sohasini takomillashtirish va modernizasiya qilish sog'liqni saqlash tizimini yanada isloh qilishning asosiy yo'nalishlaridan biri etib belgilandi.

Maqsadli davlat dasturlarini amalga oshirish doirasida respublikada sog'liqni saqlash tizimining barcha darajalarini qamrab oluvchi, Respublika onkologiya ilmiy markazidan, 15 ta viloyat va shahar onkologiya dispanseridan, tumanlar va shaharlarning markaziy ko'p tarmoqli poliklinikalari huzuridagi 232 ta onkolog xonalaridan iborat bo'lgan onkologik yordam berishning yagona vertikal integrasiyalashtirilgan xizmati tashkil etildi. Onkologiya muassasalarini yuqori texnologik tibbiyot uskunalari bilan jihozlash va mutaxassislar tayyorlash tizimini takomillashtirish hisobiga onkologik kasalliklarga tashxis qo'yish va davolashning zamonaviy standartlari tibbiyot amaliyotiga joriy etildi.

Shu bilan birga, respublikada, butun jahonda bo'lgani singari, ijtimoiy-iqtisodiy farovonlik oshishi va aholining uzoq umr ko'rishi bilan bog'liq bo'lgan onkologik kasalliklar o'sishi qayd etilmoqda. Tibbiyot fanini rivojlantirishning zamonaviy bosqichi saraton kasalliklarining oldini olish choralarini yanada takomillashtirishga va respublika aholisiga onkologik yordam berish sifatini jahon standartlari darajasigacha oshirishga yo'naltirilgan ustuvor vazifalar hal etilishini talab etadi.

Ushbu maqsadlarda O'zbekiston Respublikasi Prezidentining "2017-2021 yillarda O'zbekiston Respublikasida onkologiya xizmatini yanada rivojlantirish va aholiga onkologik yordam ko'rsatishni takomillashtirish chora-tadbirlari to'g'risida"gi qarori saraton kasalliklariga qarshi kurashning yangi bosqichini boshlab beradi, eng avvalo aholining davolashning yuqori texnologik usullariga bo'lgan ehtiyojlarini qoplashga, onkologik kasalliklarning oldini olish va barvaqt aniqlashning zamonaviy tizimini yaratishga yo'naltirilgan.

Qarorda asosiy maqsadi onkologik kasalliklar tufayli o'limni pasaytirish hisobiga aholi hayoti sifatini yaxshilash va umrni uzaytirish hisoblangan onkologiya xizmatini yanada rivojlantirishning ustuvor yo'nalishlari belgilangan quyidagi tadbirlar amalga oshirilishi nazarda tutilgan:

aholini skrining tekshirishlarning samarali dasturlarini bosqichma-bosqich amalga oshirish yo'li bilan onkologik kasalliklarni ilk bosqichlarda faol aniqlashning zamonaviy usullarini joriy etish;

aholining onkologik kasalliklarga tashxis qo'yish va davolashning jahon standartlari darajasiga muvofiq bo'lgan zamonaviy yuqori texnologik usullaridan foydalanishini yaxshilash;

reabilitasiya va palliativ yordamning zamonaviy tizimini, shuningdek, xospislar tashkil etish yo'li bilan onkologik kasalliklarga chalingan bemorlarning hayoti sifatini yaxshilash;

onkologik kasalliklarning oldini olish, tashxis qo'yish va davolashning samarali usullarini ishlab chiqishga yo'naltirilgan fundamental va ilmiy-amaliy tadqiqotlar doirasini kengaytirish hamda zamonaviy mahalliy o'smaga qarshi preparatlar yaratish;

respublika onkologiya muassasalarini zamonaviy tibbiyot uskunalari bilan jihozlash, shuningdek, ularning binolari va xonalarini rekonstruksiya qilish, mukammal ta'mirlash va yangilarini qurish.

Qaror onkologik kasalliklarning oldini olish, barvaqt aniqlash va davolash sohasida tibbiyot tashkilotlari faoliyatini muvofiqlashtirishning yagona metodik vertikali shakllantirilishini nazarda tutadi. Ushbu vazifalarni hal etish uchun Respublika ixtisoslashtirilgan onkologiya va radiologiya ilmiy-amaliy tibbiyot markazini tashkil etish, shuningdek, mintaqaviy onkologiya dispanserlarini uning filiallariga aylantirish nazarda tutilgan. Quyidagilar yangidan tashkil etiladigan markaz va uning filiallari faoliyatining ustuvor vazifalari etib belgilangan:

aholining onkologik kasalliklarning oldini olish, tashxis qo'yish va davolash bo'yicha xalqaro standartlar darajasida ixtisoslashtirilgan yuqori texnologik tibbiy yordamga bo'lgan talabini qondirish;

onkologiya sohasida aholiga yuqori malakali davolash-profilaktika yordami ko'rsatgan holda onkologik kasalliklarning oldini olish, tashxis qo'yish va davolashning zamonaviy usullarini joriy etish;

onkologiya sohasida zamonaviy talablarga javob beradigan va zamonaviy onkologiyaning ilg'or texnologiyalarini egallagan yuqori malakali tibbiyot kadrlari va ilmiy mutaxassislar tayyorlash;

onkologiya sohasida, shu jumladan, zamonaviy tibbiyot fanining ilg'or yutuqlaridan foydalangan holda ilmiy-amaliy tadqiqotlar va ishlanmalarni amalga oshirish.

Xavfli o'smalarga barvaqt tashxis qo'yishni yaxshilash va importning o'rnini bosadigan mahalliy o'smaga qarshi preparatlarni yaratish maqsadida Respublika ixtisoslashtirilgan onkologiya va radiologiya ilmiy-amaliy tibbiyot markazi negizida Saraton profilaktikasi va Eksperimental onkologiya markazlari tashkil etiladi.

Onkologik kasalliklarning oldini olish bo'yicha muvofiqlashtiruvchi-metodik faoliyatni ta'minlash va skrining tekshirishlar o'tkazish, onkologik kasalliklarga chalingan bemorlarning yagona axborot bazasini shakllantirish, shuningdek, saraton epidemiologiyasi va xavfli o'smalar rivojlanishining molekulyar mexanizmi sohasida ilmiy tadqiqotlar olib borish, mahalliy o'smaga qarshi preparatlarni ishlab chiqish markazlarning asosiy vazifalari hisoblanadi.

Rejalashtirilgan tadbirlar doirasida respublika onkologiya muassasalari saraton kasalliklarini endoskopik va radioterapevtik davolash bo'yicha eng yangi apparatlar komplekslari bilan jihozlanadi, shu jumladan, respublikaga "Da Vinchi" robotlashtirilgan jarrohlik kompleksi va gamma tig' singari noyob uskuna etkazib beriladi.

Viloyat onkologiya muassasalari tuzilmasida palliativ yordam berish bo'yicha bo'limlar, shuningdek, Toshkent, Farg'ona, Samarqand va Urganch shaharlarida to'rtta mintaqalararo xospislar tashkil etilishi respublika fuqarolarining hayoti sifati yaxshilanishiga prinsipial jihatdan muhim yondashuv bo'ladi.

Respublikaning barcha hududida ko'krak bezi va bachadon bo'yni saratonini va Farg'ona viloyatida tajriba loyihasini amalga oshirish doirasida qizilo'ngach, me'da va kolorektal saratonni aniqlashga yo'naltirilgan skrining tadqiqotlarini bosqichma-bosqich joriy etish yo'li bilan onkologik kasalliklarning oldini olish va barvaqt tashxis qo'yish chora-tadbirlarini takomillashtirishga, xavfli o'smalarga barvaqt tashxis qo'yishning molekulyar-biologik, genetik, endoskopik va nur usullarini onkologiya dispanserlari amaliyotiga joriy etishga muhim ahamiyat berilgan.

Onkologiya xizmatining kadrlar salohiyatini mustahkamlash va onkologik kasalliklarning oldini olish, tashxis qo'yish va davolash sohasida ilmiy tadqiqotlar doirasini kengaytirish, shuningdek, ilmiy ishlanmalarning zamonaviy jahon tajribasini mahalliy amaliyotga joriy etish, vrachlarning xorijiy mamlakatlarda malaka oshirishi maqsadida etakchi onkologiya klinikalari bilan sheriklik munosabatlarini o'rnatish yo'li bilan xalqaro hamkorlikni kengaytirish qabul qilingan dasturning muhim yo'nalishlaridan biri etib belgilangan.

Umuman olganda, 2017-2021 yillarda O'zbekiston Respublikasi aholisiga onkologik yordam berishni yanada rivojlantirish tadbirlarini amalga oshirishga O'zbekiston Respublikasi byudjeti mablag'laridan 32,5 milliard so'm hamda xalqaro moliya institutlarining kredit mablag'lari va grantlari hisobiga 144,1 million AQSh dollarini yo'naltirish nazarda tutilgan.

Mamlakat Prezidentining qarorida nazarda tutilgan tadbirlarning amalga oshirilishi 100 ming aholiga onkologik kasalliklardan vafot etish ko'rsatkichini 38,7 foizdan 35 foizgacha pasaytirish, onkologik kasalliklarga chalingan bemorlarni o'smaga qarshi preparatlar bilan ta'minlashni 33 foizdan 90 foizgacha ko'paytirish, aholining davolashning yuqori texnologik turlariga bo'lgan ehtiyojini qoplashni 70 foizgacha etkazish imkonini beradi.

O'zbekiston Respublikasi Prezidentining ushbu qarorida nazarda tutilgan tadbirlarni amalga oshirish onkologiya xizmatini yanada rivojlantirish va sifatini oshirishga hamda respublika aholisiga onkologiya yordami berish sifatini oshirishga kuchli turtki beradi. Bu O'zbekistonning ko'p millatli aholisi sog'lig'i, fuqarolarning manfaatlari va aholi farovonligi hamma vaqt davlatning e'tiborida ekanligidan dalolat beradi. Ushbu intilishlar mamlakatimiz Prezidenti tomonidan Xalq bilan muloqot va inson manfaatlari yili deb e'lon qilingan 2017 yilda boshlanishi teran ramziy ma'noga egadir.


O'zbekiston Respublikasi Prezidentining qarori


Inson, millat va xalq tarixiy xotira tuyg'usi bilan barhayotdir. Xotira – kechagi o'tmishni, ajdodlar o'gitini, milliy merosimizni anglatib turuvchi – muqaddas kitob zarvaraqlaridek hayotimizni yoritib turadi. Qadr – insonni yuksaklikka ko'taradi, uning faoliyatiga, orzu-intilishlariga, maqsad-maslaklariga olijanoblik bag'ishlaydi.

Bukilmas iroda va jasorat namunasini amalda namoyon etib, o'z hayotini aziz Vatanimizning har tomonlama ravnaq topishi, bugungi tinch va osoyishta kunlar uchun jonini fido qilgan ajdodlarning muqaddas xotirasini yod etib, ezgu ishlarini davom ettirish, safimizda yurgan keksalarni e'zozlash – odamiylikning eng oliy mezoni va bizga tinchlik, omonlik kerak, deb yashaydigan bag'rikeng va olijanob xalqimizga xos azaliy qadriyatdir.

Mamlakatimizda 9 may umumxalq bayrami – Xotira va Qadrlash kunini, Ikkinchi jahon urushining har bir qatnashchisi, front orti mehnat faxriylari hamda mustaqillik yillarida xizmat burchini bajarish chog'ida halok bo'lgan harbiy xizmatchilar va huquqni muhofaza qilish organlari xodimlarining xotirasi oldida hurmat bajo keltirish, yurtimizda mehr-oqibat, hamjihatlik, insoniylik, bag'rikenglik va xayr-saxovat muhitini yanada mustahkamlash, yosh avlodni milliy an'analarimizga sadoqat va umuminsoniy qadriyatlarga hurmat ruhida kamol toptirish hamda bu muqaddas ayyomni yuksak saviyada nishonlash maqsadida:

1. Xotira va Qadrlash kuniga bag'ishlangan tadbirlarga tayyorgarlik ko'rish va uni o'tkazish dasturi (keyingi o'rinlarda – Dastur) 1-ilovaga muvofiq ma'qullansin.

2. Xotira va Qadrlash kuniga bag'ishlangan tadbirlarga tayyorgarlik ko'rish va uni o'tkazish bo'yicha ishchi guruh tarkibi 2-ilovaga muvofiq tasdiqlansin.

3. Ishchi guruh (A.Aripov):

Dasturda nazarda tutilgan tadbirlarni “Qahramonlik, burch va fidoyilik” hamda “Ajdodlarni xotirlash – muqaddas qadriyat” shiorlari ostida yuqori saviyada o'tkazishni tashkil etsin;

Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari bilan birgalikda Dasturda nazarda tutilgan tadbirlarning sifatli o'tkazilishini ta'minlasin va joylarga chiqib, Xotira va Qadrlash kuniga bag'ishlangan tadbirlarga tayyorgarlik ko'rish va uni o'tkazishga amaliy yordam ko'rsatsin;

1941-1945 yillardagi Ikkinchi jahon urushining har bir qatnashchisiga, front orti mehnat faxriylariga, mustaqillik yillarida xizmat burchini bajarish chog'ida halok bo'lgan harbiy xizmatchilar va huquqni muhofaza qiluvchi organ xodimlarining oila a'zolariga moddiy, ma'naviy va boshqa turdagi yordamlar ko'rsatish maqsadida tegishli vazirlik va idoralar, tashkilot va harbiy qismlar vakillari biriktirilsin hamda ushbu toifadagi shaxslarni qutlash va ko'nglini ko'tarish maqsadida ularning yashash joyiga rahbarlarning tashrifini tashkil etsin;

yolg'iz va kam ta'minlangan Ikkinchi jahon urushi qatnashchilari turar joyi va uy xo'jaliklarini ta'mirlash, obodonlashtirish hamda o'z uy-joyiga ega bo'lmaganlariga turar joy ajratish bo'yicha tegishli chora-tadbirlarni amalga oshirsin;

Xotira va Qadrlash kuniga tayyorgarlik ko'rish davomida 1941-1945 yillardagi Ikkinchi jahon urushi va front orti mehnat faxriylari, mustaqillik yillarida xizmat burchini bajarish chog'ida halok bo'lgan harbiy xizmatchilar va huquqni muhofaza qiluvchi organ xodimlari ko'rsatgan matonati, mardlik va jasorati ahamiyatini keng aholi qatlami, ayniqsa, yoshlar o'rtasida tushuntirish, targ'ib va tashviq etish bo'yicha madaniy-ma'rifiy va vatanparvarlik yo'nalishidagi tadbirlar o'tkazilishini tashkil qilsin;

1941-1945 yillardagi Ikkinchi jahon urushi qatnashchilari va nogironlariga O'zbekiston Respublikasi Prezidenti nomidan bir martalik pul mukofotini tantanali ravishda topshirsin.

4. Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari O'zbekiston Respublikasi Madaniyat vazirligi, Mudofaa vazirligi, Ichki ishlar vazirligi, Xotin-qizlar qo'mitasi, O'zbekiston Kasaba uyushmalari federasiyasi, Respublika Ma'naviyat targ'ibot markazi, “Nuroniy” jamg'armasi, “Mahalla” xayriya jamoat fondi, “Kamolot” yoshlar ijtimoiy harakati va “O'zbekkonsert” davlat muassasasi bilan hamkorlikda:

viloyat, shahar va tumanlarda Xotira va Qadrlash kuniga tayyorgarlik ko'rish va uni o'tkazish bo'yicha kompleks chora-tadbirlarni ishlab chiqsin va amalga oshirsin;

Ikkinchi jahon urushi vaqtidagi kompozisiyalar installyasiyasi, jumladan, urush yillari qo'shiq va musiqalari, dasturxon tuzash va tegishli sharoitlar yaratish bilan bog'liq tadbirlarni tashkil etsin;

ko'cha va maydonlarni Xotira va Qadrlash kuniga bag'ishlangan plakat va stendlar bilan bezashni ta'minlasin.

5. Belgilab qo'yilsinki, o'tkaziladigan bayram tadbirlari hamda mamlakatimizning turli hududida istiqomat qiluvchi 1941-1945 yillardagi Ikkinchi jahon urushi va front orti mehnat faxriylari vakillarini Toshkent shahrida bo'lib o'tadigan marosimlarga temir yo'l yoki avtomobil transportida kelib-ketishi, mehmonxonalarda joylashishi, ovqatlanishi, madaniy hordiq chiqarishi hamda zarur hollarda kiyim-kechak bilan ta'minlanishi:

Qoraqalpog'iston Respublikasi va viloyatlarda mahalliy byudjetlar hamda homiylik xayriyalari hisobidan;

Toshkent shahrida O'zbekiston Respublikasi byudjeti va Toshkent shahar mahalliy byudjeti mablag'lari hisobidan teng ulushlarda qoplanadi.

6. O'zbekiston Respublikasi Mudofaa vazirligi Xotira va Qadrlash kuni munosabati bilan Toshkent shahrida 2017 yil 9 may soat 21.00 da bayram salyutini tashkil qilsin.

7. O'zbekiston Respublikasi Ichki ishlar vazirligi tadbirlar o'tkaziladigan joylarda jamoat tartibi va xavfsizligini ta'minlasin.

8. O'zbekiston Milliy teleradiokompaniyasi, O'zbekiston Milliy axborot agentligi, “Jahon” axborot agentligi va boshqa ommaviy axborot vositalariga Xotira va Qadrlash kuni o'tkazilishiga tayyorgarlik ko'rish va uni o'tkazish bo'yicha amalga oshirilayotgan ishlarni keng yoritib borish tavsiya etilsin.

9. Mazkur Qarorning bajarilishini nazorat qilish O'zbekiston Respublikasining Bosh vaziri A.N.Aripov zimmasiga yuklansin.


O'zbekiston Respublikasi Prezidenti                                          Sh.MIRZIYoYEV

Toshkent shahri, 2017 yil 4 aprel


O'zbekiston Respublikasi Prezidentining farmoni


9 may umumxalq bayrami – Xotira va Qadrlash kuni o'tkazilishi, shuningdek, 1941-1945 yillardagi Ikkinchi jahon urushida fashizm ustidan qozonilgan g'alabaning 72 yilligi nishonlanishi munosabati bilan hamda urush qatnashchilari va nogironlarini moddiy rag'batlantirish maqsadida:

1. 1941-1945 yillardagi Ikkinchi jahon urushi qatnashchilari va nogironlariga 2 000 000 (ikki million) so'm miqdorida bir martalik pul mukofoti belgilansin.

2. Mazkur Farmonni bajarish bilan bog'liq sarf-xarajatlar O'zbekiston Respublikasi byudjeti mablag'lari hisobidan amalga oshirilsin.

3. O'zbekiston Respublikasi Mudofaa vazirligi, Ichki ishlar vazirligi, Milliy xavfsizlik xizmati Moliya vazirligi va Markaziy bank bilan birgalikda 1941-1945 yillardagi Ikkinchi jahon urushi qatnashchilari va nogironlariga ushbu pul mukofotining tantanali va bayramona vaziyatda topshirilishini ta'minlasin.

4. Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari O'zbekiston Respublikasi Madaniyat vazirligi, Mudofaa vazirligi, Ichki ishlar vazirligi, Xotin-qizlar qo'mitasi, “Kamolot” yoshlar ijtimoiy harakati, Badiiy akademiya, Respublika Ma'naviyat targ'ibot markazi, “Nuroniy” jamg'armasi va “Mahalla” xayriya jamoat fondi, boshqa nodavlat notijorat tashkilotlari bilan birgalikda Vatanimiz ozodligi va sha'ni-sharafi himoyachilariga bag'ishlangan maxsus uchrashuvlar va ma'rifiy-badiiy kechalar o'tkazsin.

5. Ushbu Farmonning ijrosini nazorat qilish O'zbekiston Respublikasining Bosh vaziri A.N.Aripov zimmasiga yuklansin.


O'zbekiston Respublikasi Prezidenti                                            SH.MIRZIYOYEV

Toshkent shahri, 2017 yil 4 aprel


O'ZBEKISTON RESPUBLIKASINING QONUNI

MARKAZIY OSIYO MINTAQAVIY IQTISODIY HAMKORLIK INSTITUTINI TA'SIS ETISH TO'G'RISIDAGI BITIMNI (ISLOMOBOD, 2016 YIL 26 OKTYABR) RATIFIKASIYA QILISH HAQIDA

(O'zbekiston Respublikasi qonun hujjatlari to'plami, 2017 y., 13-son, 197-modda)
Qonunchilik palatasi tomonidan 2017 yil 25 martda qabul qilingan
Senat tomonidan 2017 yil 28 martda ma'qullangan
Markaziy Osiyo mintaqaviy iqtisodiy hamkorlik institutini ta'sis etish to'g'risidagi Bitim (Islomobod, 2016 yil 26 oktyabr) ratifikasiya qilinsin.
O'zbekiston Respublikasining Prezidenti Sh. MIRZIYoYEV
Toshkent sh.,
2017 yil 31 mart,
O'RQ-424-son



Page 1 of 2

Manzilimiz


Manzil: Qashqadaryo viloyati, Qarshi shahri, Mustaqillik Maydoni,1
Pochta indeksi:180100
Telefon
: 0(375)221-12-88, 0(375)221-03-81
Faks
: 0(375)221-13-40
Veb-sayt
http://www.qashqadaryo.uz
Elektron pochta
Yaqin jamoat transport to`xtash joylari 
Milliy bank va Mustaqillik Maydoni bekati
Avtomashrut
1,4,5,7,10,18,20,22,23,27,
37,44,462,11,21,37,33

Hozir saytimizda

Bizning saytimizda 153 mehmonlar va ro'yhatdan o'tgan foydalanuvchilar 0

Bosh sahifa

Qabul kunlari

A- A A+

Rahbariyatga murojaat etish

Rahbariyatga murojaat etish

Viloyat hokimligining umumiy bo'limiga murojjat etish (Yangi oynada ochiladi)

Mobil versiya

Mobil versiyaga o'tish

Bog'lanish

Ishonch telefon raqami 
0(371) 200-55-05 
Ishonch telefon raqami reglament
Yagona telefon raqami
0(375) 221-07-60 
Yagona telefon raqami reglamenti

Batafsil>>>

Biz bilan bog'lanish

Sahifa adressi

Maxsus imkoniyatlar

K'orinish

Pastda o'zingizga kerakli parametrni tanlasng
Blue Green Red Radian
Select menu
Google Font
Body Font-size
Body Font-family
Click to listen highlighted text! Powered By GSpeech