wrapper

Maxsus imkoniyatlar
Hujjatlar

Hujjatlar (27)

O‘zbekiston Respublikasi Prezidenti Shavkat Mirziyoyevning mamlakatimiz xalqiga bayram tabrigi

O‘ZBEKISTON XALQIGA NAVRO‘Z TABRIGI
 
Aziz vatandoshlar!
 
Jonajon yurtimiz – O‘zbekistonimizga yasharish, bahor va go‘zallik bayrami – Navro‘zi olam kirib kelmoqda.
 
Ana shu qutlug‘ ayyom – Sharqona yangi yil bilan siz, muhtaram otaxon va onaxonlarni, munis opa-singillarimiz, suyukli farzandlarimiz, butun xalqimizni chin yurakdan samimiy muborakbod etaman.
 
Qalblarimiz shodlik va quvonchga to‘lgan mana shu nurli lahzalarda barchangizga sihat-salomatlik, xonadonlaringizga baxtu saodat, fayzu baraka tilayman.
 
 
 
Qadrli do‘stlar!
 
Bugun ko‘p millatli xalqimiz dala va qirlarda, maydon va xiyobonlarda,  tabiat bag‘rida sayil-tomoshalar o‘tkazib,  Navro‘z ayyomini kutib olmoqda.
 
Yetti yoshdan yetmish yoshgacha – barcha yurtdoshlarimiz katta shodu xurramlik bilan bir-birini qutlab, shu yorug‘ kunlarga yetkazgani uchun shukronalar aytmoqda.
 
El-yurtimizning tabarruk zaminimizga, ona diyorimizga mehri, o‘zaro ahillik, mehr-oqibat fazilatlari yanada yaqqol namoyon bo‘lmoqda.
 
Shu dilbar faslda tabiatdagi o‘zgarishlarga uyg‘un bo‘lib, jamiyatimiz, hayotimiz ham o‘zgarib, yangilanib bormoqda.
 
Yangi-yangi uy-joylar, ta’lim, tibbiyot va madaniyat maskanlari, zamonaviy korxonalar, obod qishloq va shaharlar yurtimiz chiroyiga chiroy qo‘shmoqda.
 
Navro‘z falsafasi, Navro‘z  qadriyatlari – odamlarning dardu tashvishi bilan yashash, keksalarga hurmat, muhtoj insonlarga e’tibor va yordam ko‘rsatish, adolat va xalqparvarlik faoliyatimiz mezoniga aylanmoqda.
 
Biz eng avvalo onalarimiz, ayollarimiz va farzandlarimiz, butun xalqimizni rozi qilishni o‘z oldimizga ezgu vazifa qilib qo‘yganmiz. Va bu oliy maqsadga albatta erishamiz. Shunda hayotimiz yanada obod va farovon, buyuk Alisher Navoiy bobomiz aytganlaridek, har kunimiz Navro‘z bo‘ladi.
 
Bugun mirishkor dehqon va fermerlarimiz katta orzu-niyatlar bilan yangi mehnat mavsumini boshlamoqdalar. Barchamiz yilimiz qutlug‘ kelsin, hosilimiz mo‘l bo‘lsin, mehnatingizdan baraka toping, deb ularni tabriklab, ishlariga rivoj tilaymiz.
 
 
 
Aziz do‘stlar!
 
Mana, bir necha yildirki, Birlashgan Millatlar Tashkilotining qaroriga muvofiq Navro‘z bayrami xalqaro miqyosda keng nishonlanmoqda.
 
Haqiqatan ham bu betakror bayram barcha ezgu niyatli insonlarni birlashtiradi, ularning qalbida eng go‘zal va olijanob tuyg‘ularni uyg‘otadi. Shu bois ham Navro‘zi olam mustaqillik yillarida, millati, tili va dinidan qat’i nazar, diyorimizda yashayotgan barcha yurtdoshlarimizning  ardoqli va sevimli bayramiga aylandi.
 
Bugun chet el diplomatik korpus vakillari, xorijiy do‘stlarimiz va hamkorlarimiz Navro‘z quvonchini biz bilan birga baham ko‘rmoqdalar.
 
Fursatdan foydalanib, aziz mehmonlarimizga, barcha yaqin va uzoq davlatlar xalqlariga samimiy tabriklarimizni yo‘llab, ularga tinchlik-osoyishtalik, ravnaq va farovonlik tilaymiz.
 
 
 
Qadrli va muhtaram yurtdoshlarim!
 
Mana shu munavvar lahzalarda siz, azizlarga, butun xalqimizga  eng ezgu tilaklarimni izhor etishdan baxtiyorman.
 
Sharqona yangi yilimiz har bir oila, har bir xonadonga baxt va quvonch olib kelsin!
 
Barcha pok orzu-niyatlarimiz amalga oshsin! 
 
Yurtimiz tinch, xalqimiz omon bo‘lsin!
 
Navro‘zi olam barchamizga muborak bo‘lsin!
 
 
Shavkat Mirziyoyev,
O‘zbekiston Respublikasi Prezidenti
Batafsil

O‘zbekiston Respublikasining Davlat xavfsizligi tizimini takomillashtirish chora-tadbirlari to‘g‘risida

O‘zbekiston Respublikasi Prezidentining

 

FARMONI

 

O‘ZBEKISTON RESPUBLIKASINING DAVLAT XAVFSIZLIGI TIZIMINI TAKOMILLASHTIRISH CHORA-TADBIRLARI TO‘G‘RISIDA

 

Davlat tuzilmasi va davlat chegaralari daxlsizligini ishonchli himoya qilish, inson huquqlari va erkinliklariga og‘ishmay rioya etish, jamiyatdagi millatlararo totuvlik, diniy bag‘rikenglik, tinchlik va osoyishtalik – demokratik huquqiy davlat qurishning hamda mamlakatni jadal ijtimoiy-iqtisodiy rivojlantirishning muhim shartlaridan hisoblanadi.

 

O‘zbekiston Respublikasi Milliy xavfsizlik xizmati mamlakatning konstitutsiyaviy tuzumi, suvereniteti, hududiy yaxlitligi, iqtisodiy va mudofaa salohiyatini tashqi va ichki tahdidlardan himoya qilish tizimida alohida o‘rin tutadi.

 

Shu bilan birga, Milliy xavfsizlik xizmatining maqomi, vazifalari va vakolatlari doirasini aniq belgilab beruvchi qonun hujjati yaratilmay turib, unga milliy xavfsizlikni ta’minlashning barcha jihatlari yuklatilgani ushbu idoraning davlat organlari faoliyatining barcha sohalariga asossiz aralashuviga shart-sharoit yaratib berdi.

 

Mamlakatni rivojlantirishning hozirgi bosqichidagi ustuvor yo‘nalishlar, davlat va ijtimoiy hayotning barcha sohalarini isloh qilish borasidagi vazifalarni samarali amalga oshirish davlat xavfsizligini ta’minlashning sifat jihatdan yangi tizimini shakllantirishni taqozo etadi.

 

O‘zbekiston Respublikasining konstitutsiyaviy tuzumi, suvereniteti, hududiy yaxlitligi va manfaatlarini tashqi va ichki tahdidlardan himoya qilish borasidagi faoliyatni tubdan takomillashtirish maqsadida, shuningdek, 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi vazifalariga muvofiq:

 

1. O‘zbekiston Respublikasi Milliy xavfsizlik xizmati O‘zbekiston Respublikasi Davlat xavfsizlik xizmati sifatida qayta tashkil etilsin.

 

Belgilansinki, O‘zbekiston Respublikasi Davlat xavfsizlik xizmati O‘zbekiston Respublikasi Milliy xavfsizlik xizmatining huquqlari, majburiyatlari va shartnomalari bo‘yicha huquqiy voris hisoblanadi.

 

O‘zbekiston Respublikasi Davlat xavfsizlik xizmati O‘zbekiston Respublikasining konstitutsiyaviy tuzumi, suvereniteti, hududiy yaxlitligi va manfaatlarini tashqi va ichki tahdidlardan himoya qiluvchi maxsus vakolatli organ etib belgilansin.

 

2. O‘zbekiston Respublikasi Davlat xavfsizlik xizmati (bundan buyon Xizmat deb yuritiladi) faoliyatini tashkil etishning ustuvor yo‘nalishlari etib quyidagilar belgilansin:

 

Xizmatning maxsus vakolatli davlat xavfsizlik organi sifatidagi huquqiy maqomi, vakolatlari va faoliyat yo‘nalishlarini aniq belgilab beruvchi mustahkam qonunchilik bazasini yaratish;

 

bugungi kundagi xavf-xatarlar va tahdidlarga qarshi kurashishning ta’sirchan shakl hamda uslublarini joriy etish;

 

yuzaga kelayotgan ijtimoiy-siyosiy va sotsial-iqtisodiy vaziyatni inobatga olgan holda davlat xavfsizligini ta’minlash borasidagi vazifalarni bajarishda mavjud kuch hamda vositalardan samarali foydalanish imkonini beruvchi tashkiliy tuzilmani shakllantirish;

 

Xizmat faoliyatini davlat xavfsizligini ta’minlash ishlarining shakl va uslublari, shuningdek, Xizmat harbiy xizmatchilarining idoraviy mansubligi haqidagi ma’lumotlar oshkor bo‘lishini istisno etuvchi konspiratsiya tamoyili asosida tashkil etish;

 

fuqarolarning huquqlari, erkinliklari va qonuniy manfaatlariga og‘ishmay rioya etilishini kafolatlaydigan ta’sirchan mexanizmlarni joriy qilish;

 

O‘zbekiston Respublikasining manfaatlarini munosib himoya qilishga qodir, har tomonlama yetuk va vatanparvar yoshlarni Xizmatga jalb etishga qaratilgan kadrlarni tanlash va tayyorlashning mutlaqo yangi tizimini yaratish;

 

mehnatga munosib haq to‘lash, uy-joy va maishiy shart-sharoitlarni yaxshilash, sog‘liqni saqlash tizimini takomillashtirish orqali Xizmat harbiy xizmatchilarining ijtimoiy himoyasini kuchaytirish.

 

3. Xizmatning asosiy vazifalari va faoliyat yo‘nalishlari etib quyidagilar belgilansin:

 

O‘zbekiston Respublikasining davlat xavfsizligi va manfaatlarini tashqi va ichki tahdidlardan himoya qilishni ta’minlash, mazkur sohada qonuniylik va qonun ustuvorligini mustahkamlash, huquqbuzarliklarning oldini olish, ularni aniqlash va ularga barham berish;

 

O‘zbekiston Respublikasining konstitutsiyaviy tuzumi, suvereniteti va hududiy yaxlitligiga tajovuzlarning oldini olish, ularni aniqlash hamda ularga barham berish bo‘yicha razvedka va kontrrazvedka faoliyatini amalga oshirish;

 

O‘zbekiston Respublikasining Davlat chegaralarini qo‘riqlash va himoya qilish;

 

O‘zbekiston Respublikasining Qurolli Kuchlari va mudofaa-sanoat majmuasini davlat xavfsizligiga xavf-xatarlar hamda tahdidlardan himoya qilish, mamlakat mudofaa qobiliyatini mustahkamlash bo‘yicha strategik tashabbuslarni amalga oshirishda ishtirok etish;

 

terrorizm, ekstremizm, uyushgan jinoyatchilikka, qurol-yarog‘, giyohvandlik vositalari va psixotrop moddalarning noqonuniy muomalasiga qarshi kurashish;

 

davlat manfaatlari va xavfsizligiga tahdid soluvchi milliy, irqiy va diniy adovatni targ‘ib etishga qaratilgan buzg‘unchilik faoliyatining oldini olish, uni aniqlash va unga barham berish;

 

iqtisodiy, ilmiy-texnikaviy, ijtimoiy va axborot sohalarida davlat   xavfsizligini ta’minlash, O‘zbekiston Respublikasi xalqining tarixiy-madaniy va boy ma’naviy merosini himoya qilish;

 

davlat organlari va boshqa tashkilotlarda davlat manfaatlari va xavfsizligiga tahdid soluvchi korrupsiya holatlariga qarshi kurashish;

 

telekommunikatsiya va transport sohasida davlat xavfsizligini ta’minlash, favqulodda holatlarni yuzaga keltiruvchi omillarning oldini olish, aniqlash va ularga barham berish;

 

Xizmat tergov qilish vakolatiga kiruvchi jinoyat ishlari bo‘yicha tergovga qadar tekshiruv va dastlabki tergov olib borish va tezkor-qidiruv faoliyatini amalga oshirish;

 

davlat organlari va boshqa tashkilotlarda davlat sirlari saqlanishi, maxsus aloqa xavfsizligining ta’minlanishi hamda axborotlarni kriptografik himoya qilishni tashkil etish ustidan nazoratni amalga oshirish;

 

davlat manfaatlari va xavfsizligiga tahdid soluvchi huquqbuzarliklar sodir etilishiga imkon beradigan sabab va shart-sharoitlarni aniqlash hamda bartaraf etish;

 

Xizmatning jangovar va safarbarlik tayyorgarligi holatini takomillashtirish va saqlab turish, kuch va vositalarni favqulodda vaziyatlar yuzaga kelgan hamda harbiy holat joriy qilingandagi harakatlarga tayyorlash.

 

4. 2018-yil 1-apreldan quyidagi funksiyalar:

 

O‘zbekiston Respublikasining o‘ta muhim va toifalangan obyektlarida qo‘riqlashning texnik vositalarini loyihalash, montaj qilish, sozlash, ta’mirlash va ularga texnik xizmat ko‘rsatish bo‘yicha ishlarni bajarishga ruxsat berish – O‘zbekiston Respublikasi Ichki ishlar vazirligiga;

 

rejimli mudofaa obyektlarini loyihalash, qurish, ulardan foydalanish va ularni ta’mirlash uchun litsenziya talabgorlariga ruxsat etilganligi haqida ma’lumotnoma berish – O‘zbekiston Respublikasi Mudofaa vazirligiga o‘tkazilsin.

 

5. O‘zbekiston Respublikasi Prezidentining 2018-yil 22-yanvardagi

PF–5308-son “2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da amalga oshirishga oid Davlat dasturi to‘g‘risida”gi Farmoniga muvofiq O‘zbekiston Respublikasi Oliy Majlisi Qonunchilik palatasining bir guruh deputatlari tomonidan “O‘zbekiston Respublikasining Milliy xavfsizlik xizmati to‘g‘risida”gi O‘zbekiston Respublikasi qonuni loyihasi ishlab chiqilganligi ma’lumot uchun qabul qilinsin.

 

O‘zbekiston Respublikasi Oliy Majlisi Qonunchilik palatasiga mazkur Farmon qoidalaridan kelib chiqqan holda qonun loyihasini qayta ishlash tavsiya etilsin.

 

6. O‘zbekiston Respublikasi Vazirlar Mahkamasi Xizmat bilan birgalikda bir oy muddatda 2018-2022-yillarda O‘zbekiston Respublikasi Davlat xavfsizlik xizmatining harbiy xizmatchilari uchun arzon uy-joylarni qurish dasturini ishlab chiqsin va tasdiqlasin.

 

7. O‘zbekiston Respublikasi Davlat xavfsizlik xizmatining bayrog‘i va emblemasi namunalari 1 va 2-ilovalarga muvofiq tasdiqlansin.

 

Belgilansinki, bayroq va emblemadan foydalanish tartibi Xizmat raisi tomonidan tasdiqlanadi.

 

8. Xizmat ikki oy muddatda:

 

Xizmat faoliyatini tashkil etish;

 

Xizmatning ta’lim muassasalari faoliyatini takomillashtirish;

 

O‘zbekiston Respublikasi Davlat chegarasini qo‘riqlash tizimining samaradorligini oshirishni nazarda tutuvchi O‘zbekiston Respublikasi Prezidenti qarorlari loyihalarini kiritsin.

 

9. O‘zbekiston Respublikasi Adliya vazirligi Xizmat va boshqa manfaatdor idoralar bilan birgalikda bir oy muddatda qonun hujjatlariga mazkur Farmondan kelib chiqadigan o‘zgartish va qo‘shimchalar to‘g‘risidagi takliflarni O‘zbekiston Respublikasi Vazirlar Mahkamasiga kiritsin.

 

10. Mazkur Farmonning ijrosini nazorat qilish O‘zbekiston Respublikasining Bosh vaziri A.N.Aripov va O‘zbekiston Respublikasi Prezidenti huzuridagi Xavfsizlik kengashi kotibi V.V.Maxmudov zimmasiga yuklansin.

 

O‘zbekiston Respublikasi Prezidenti               Sh.MIRZIYOYEV

 

Toshkent shahri, 2018-yil 14-mart

 

O‘zbekiston Respublikasi Prezidentining 2018- yil

14-martdagi PF-5379-son Farmoniga 1-ilova

O‘zbekiston Respublikasi Davlat xavfsizlik xizmati bayrog‘ining

TAVSIFI

O‘zbekiston Respublikasi Davlat xavfsizlik xizmati bayrog‘i barqarorlik, matonat, sodiqlik, fidoyilik va mardlikni ifoda etuvchi to‘q ko‘k rangli to‘g‘ri burchakli mato ko‘rinishiga ega.

Bayroq markazida geraldik belgi – O‘zbekiston Respublikasi Davlat xavfsizlik xizmatining emblemasi tasvirlangan.

O‘zbekiston Respublikasi Davlat xavfsizlik xizmati bayrog‘ining uzunligi – 250 sm, eni – 125 sm.

* * *

O‘zbekiston Respublikasi Prezidentining 2018-yil

14-martdagi  PF-5379-son Farmoniga 2-ilova

O‘zbekiston Respublikasi Davlat xavfsizlik xizmati emblemasi – geraldik belgi

TAVSIFI

Geraldik belgi – O‘zbekiston Respublikasi Davlat xavfsizlik xizmati emblemasi to‘q ko‘k rangli aylana tasmasi bo‘lgan kumush rang doiradan iborat.

Aylana tasmaning yuqori qismida oq rangli bosh harflar bilan lotin alifbosida: “O‘ZBEKISTON RESPUBLIKASI”, pastki qismida: “DAVLAT XAVFSIZLIK XIZMATI” deb yozilgan. Ushbu yozuvlar hurlik ma’nosini anglatuvchi sakkiz qirrali ikkita yulduz bilan ajratilgan.

Doira markazida davlat va jamiyatni tashqi va ichki tahdidlardan himoya qilish ramzini anglatuvchi, pastki qismi cho‘zilgan, yuqori burchaklari kesilgan uchburchak ko‘rinishiga ega qalqon tasvirlangan. Qalqon yuzasi kumush rangda. Qalqonning markazida O‘zbekiston Respublikasi Davlat gerbi tasvirlangan.

O‘zbekiston Respublikasi Davlat gerbidan qalqonning kambar hoshiyalariga qadar quyosh nurlarini ifodalovchi to‘g‘ri chiziqlar tortilgan.

Qalqonning kesilgan ikki yuqori va pastki burchaklarida shaxs, jamiyat va davlat manfaatlari muhofazasini anglatuvchi uchta halqa tasvirlangan.

Qalqon ortida simmetriya o‘qi bo‘yicha tig‘i pastga yo‘naltirilgan qilich joylashgan. Qilich kuch, sha’n, adolat, jasorat va hushyorlikni anglatadi.

Qilich kumush rangda. Qilich dastagi yettita halqadan iborat bo‘lib, ular O‘zbekiston Respublikasi Davlat xavfsizlik xizmati faoliyatining asosiy tamoyillarini anglatadi.

Qalqon va qilich ortida simmetrik ravishda ikki tomonga hilpirayotgan O‘zbekiston Respublikasi Davlat bayrog‘i tasvirlangan.

O‘zbekiston Respublikasi Davlat bayrog‘ining qalqon va qilich ortida joylashuvi konstitutsiyaviy tuzum, suverenitet, hududiy yaxlitlik va davlat manfaatlarining tashqi va ichki tahdidlardan himoyalanganligini anglatadi.

 * * *

“O‘zbekiston Respublikasining davlat xavfsizligi tizimini takomillashtirish chora-tadbirlari to‘g‘risida”gi O‘zbekiston Respublikasi Prezidenti Farmoniga

SHARH

Mamlakat taraqqiyotining hozirgi bosqichida strategik vazifalar va eng muhim islohotlarning muvaffaqiyatli amalga oshirilishi nafaqat davlat va xo‘jalik boshqaruvi organlari, balki huquqni muhofaza qiluvchi tuzilmalar faoliyatini ham takomillashtirishni talab etadi.

O‘zbekiston Respublikasi Prezidenti Sh.Mirziyoyev 2017-yil 22-dekabrda Oliy Majlisga Murojaatnomasida O‘zbekiston Respublikasi Milliy xavfsizlik xizmatini isloh qilish zarurligini ko‘rsatib berdi.

Davlat rahbari tomonidan Konstitutsiya va qonun normalariga og‘ishmay rioya etilishini ta’minlash, huquqni muhofaza qiluvchi organlar tizimida o‘zaro tiyib turish va manfaatlar muvozanati tamoyilini so‘zsiz amalga oshirish, boshqa organlarning funksiyalarini bajarish va takrorlash holatlariga yo‘l qo‘ymaslik vazifalari qo‘yilgan edi.

Bu borada O‘zbekiston Respublikasi Prezidenti tomonidan qabul qilingan “O‘zbekiston Respublikasining davlat xavfsizligi tizimini takomillashtirish chora-tadbirlari to‘g‘risida”gi Farmon xavf-xatar va tahdidlarga samarali tarzda qarshi kurashishga qodir maxsus xizmatning zamonaviy qiyofasini belgilagan holda, davlat xavfsizligini ta’minlashning sifat jihatidan yangi tizimiga asos soldi.

Farmonga muvofiq O‘zbekiston Respublikasi Milliy xavfsizlik xizmati O‘zbekiston Respublikasi Davlat xavfsizlik xizmati etib qayta tashkil qilindi. Idoraning nomidan “milliy xavfsizlik” tushunchasining chiqarilishi uning vakolatlari asossiz tarzda kengayishiga shart-sharoit yaratgan omillarni bartaraf etish zarurati bilan bog‘liq. Chunki lokal miqyosdagi har qanday muammo milliy xavfsizlikka tahdid sifatida ko‘rilishi mumkin edi. Mazkur o‘zgartirish ushbu idoraning diqqat-e’tiborini davlat ahamiyatiga ega real tahdidlarga qaratadi. “Davlat xavfsizligi” atamasi xavfsizlikni ta’minlash doirasini aniq belgilaydi va mazkur sohadagi faoliyat yo‘nalishlarini ajratib beradi.

Farmon bilan Davlat xavfsizlik xizmati O‘zbekiston Respublikasining konstitutsiyaviy tuzumini, suverenitetini, hududiy yaxlitligini va manfaatlarini tashqi va ichki tahdidlardan himoya qiluvchi maxsus vakolatli organ etib belgilandi.

Davlat xavfsizlik xizmati faoliyatini tashkil etishning ustuvor yo‘nalishlari belgilandi.

Birinchidan, mazkur idoraning maqomi, vakolatlari va faoliyat yo‘nalishlarini belgilagan holda “O‘zbekiston Respublikasining Davlat xavfsizlik xizmati to‘g‘risida”gi qonunni ishlab chiqish va qabul qilish nazarda tutilmoqda. 26 yil oldin qabul qilingan Milliy xavfsizlik xizmati to‘g‘risidagi amaldagi nizom faoliyatni samarali tashkil etishga imkon bermaydi hamda mamlakatning ijtimoiy-siyosiy va ijtimoiy-iqtisodiy hayotida yuz bergan muhim o‘zgarishlarni aks ettirmaydi.

Ikkinchidan, bugungi kundagi xavf-xatar va tahdidlarga qarshi kurashishning ta’sirchan shakllari hamda uslublarini joriy etish, shu maqsadda idoraning samarali tashkiliy tuzilmasini shakllantirish zarurligi belgilandi.

Uchinchidan, fuqarolarning huquqlari, erkinliklari va qonuniy manfaatlariga og‘ishmay rioya etishning alohida muhim ahamiyati ta’kidlandi. Shundan kelib chiqqan holda, Davlat xavfsizlik xizmati tomonidan inson huquqlari qonuniy kafolatlarining qat’iy ta’minlanishiga ustuvor ahamiyat beriladi.

To‘rtinchidan, kadrlarni tanlash va tayyorlashning mutlaqo yangi tizimi tashkil etiladi, harbiy xizmatchilarning ijtimoiy himoyasi kuchaytiriladi. Mazkur choralar Davlat xavfsizlik xizmatiga har tomonlama rivojlangan va vatanparvar yoshlarni jalb etishga imkon beradi. Shu o‘rinda idora vakillarining harbiy xizmatchi sifatidagi maqomi ko‘rsatib o‘tildi, mazkur holat ularga nisbatan harbiy xizmatni o‘tash bilan bog‘liq barcha cheklov va majburiyatlar tatbiq etilishini anglatadi.

Beshinchidan, Davlat xavfsizlik xizmati o‘z faoliyatini idora ishining shakllari va uslublari hamda harbiy xizmatchilarning idoraviy mansubligi haqidagi ma’lumotlar oshkor bo‘lishini istisno etadigan konspiratsiya tamoyillari asosida tashkil etishi belgilandi. Bu davlat xavfsizligini ta’minlash vazifalarini bajarishda mavjud kuch va vositalardan samarali foydalanishni ta’minlaydi.

O‘ziga xos bo‘lmagan vazifa va funksiyalarni istisno qilish maqsadida Milliy xavfsizlik xizmati vakolatida bo‘lgan ayrim ruxsat beruvchi vakolatlar 2018-yil 1-apreldan boshqa idoralarga o‘tkaziladi yoki tugatiladi.

Farmon bilan Davlat xavfsizlik xizmatining bayrog‘i va emblemasi namunalari tasdiqlandi.

Idoraviy ramzlarning ta’sis etilishi harbiy xizmatchilarning jangovar ruhini oshirishga hamda ularni davlat xavfsizligini ta’minlash vazifalarini bajarishga safarbar etishga xizmat qiladi.

O‘zbekiston Respublikasi Prezidenti Farmonida davlat xavfsizligini ta’minlash sohasida to‘planib qolgan muammolarni hal etishga qaratilgan qator topshiriqlar mavjud. Shu munosabat bilan:

idora faoliyatini tashkil etish, uning ta’lim muassasalari faoliyatini takomillashtirish va Davlat chegarasini qo‘riqlash tizimining samaradorligini oshirishga qaratilgan O‘zbekiston Respublikasi Prezidenti qarorlarini ishlab chiqish;

2018-2022-yillarda Davlat xavfsizlik xizmati harbiy xizmatchilari uchun arzon uy-joylarni qurish dasturini ishlab chiqish nazarda tutildi.

O‘zbekiston Respublikasi Prezidentining mazkur Farmoni tarixiy ahamiyatga ega bo‘lib, davlat xavfsizligini ta’minlashning sifat jihatdan yangi tizimini shakllantirishning huquqiy asoslarini yaratdi.

Davlat rahbarining mazkur qarorini amalga oshirish O‘zbekiston Respublikasi konstitutsiyaviy tuzumi, suvereniteti, hududiy yaxlitligi va manfaatlarini tashqi hamda ichki tahdidlardan himoya qilish tizimining sifat jihatdan yangi bosqichga ko‘tarilishini ta’minlaydi.

Batafsil

2018-yilgi Navro‘z umumxalq bayramiga tayyorgarlik ko‘rish va uni o‘tkazish to‘g‘risida

O‘zbekiston Respublikasi Prezidentining qarori


Ona tabiatni sevish va ardoqlash, hayot gultoji bo‘lmish insonni qadrlash, Vatanga muhabbat va sadoqat kabi ezgu g‘oyalarni o‘zida mujassam etgan Navro‘z xalqimizning eng qadimiy, asl milliy bayramidir. Asrlar davomida el-yurtimizning olijanob orzu-intilishlarini ifoda etib kelayotgan Navro‘z mustaqillik yillarida yangicha ma’no-mazmunga ega bo‘lib, tom ma’noda umumxalq bayramiga aylandi.

Batafsil

1-Yanvardan qanday qoidalar kuchga kirdi?

    O‘tgan bir yil mobaynida mamlakatimizni taraqqiy ettirish, xalqimizning farovon turmushini ta’minlash yo‘lida ko‘plab choralar ko‘rildi. Bu ishlarning  huquqiy asosini yaratish maqsadida  qator qonunlar, Prezident qarorlari, farmonlari qabul qilindi. Ularning ayrimlari yoxud ma’lum bandlari yuridik jihatdan aynan 2018-yilning 1-yanvaridan kuchga kirdi. Quyida joriy yil avvalidan amal qila boshlagan ana shunday tartib-qoidalardan bir nechtasini e’tiboringizga havola etamiz.

Batafsil

Konstitutsiya – erkin va farovon hayotimiz, mamlakatimizni yanada taraqqiy ettirishning mustahkam poydevoridir

Prezident Shavkat Mirziyoyevning O‘zbekiston Respublikasi Konstitutsiyasi qabul qilinganining 25 yilligiga bag‘ishlangan tantanali marosimdagi ma’ruzasi


Assalomu alaykum, aziz vatandoshlar!

Xonimlar va janoblar!

Barchangizni, sizlar orqali butun xalqimizni bugungi ulug‘ ayyom – mamlakatimiz Konstitutsiyasi qabul qilinganining 25 yillik bayrami bilan samimiy muborakbod etishga ijozat bergaysiz.

Yigirma besh yil – tarix uchun bir lahza, xolos. Shu qisqa davrda jonajon O‘zbekistonimiz mustaqil va suveren davlat sifatida shakllanib, jahon hamjamiyatidan munosib o‘rin egalladi, tom ma’noda ulkan taraqqiyot yo‘lini bosib o‘tdi.

Batafsil

Madaniyat va san’at sohasini yanada rivojlantirish va takomillashtirishga doir chora-tadbirlar to‘g‘risida

O‘zbekiston Respublikasi Prezidentining qarori


Mustaqillik yillarida mamlakatimizda madaniyat va san’at sohasini rivojlantirish, jahon miqyosidagi ilg‘or tajribalar asosida zamonaviy madaniyat va san’at muassasalari barpo etish, ularning moddiy-texnik bazasini mustahkamlash, ijodkor ziyolilarni har tomonlama qo‘llab-quvvatlash masalalariga davlatimiz tomonidan ustuvor ahamiyat qaratib kelinmoqda. 

Aholi, xususan, yoshlarning madaniy saviyasini yuksaltirish, ularni milliy va umumbashariy madaniyatning eng yaxshi namunalaridan bahramand etish, shu asosda ma’naviy yetuk, barkamol shaxslarni tarbiyalash, yosh iste’dod egalarining qobiliyati va salohiyatini ro‘yobga chiqarish borasida keng ko‘lamli ishlar amalga oshirildi. 

Shu bilan birga, madaniyat va san’at sohasini boshqarishda eskicha usullar saqlanib qolayotgani, mavjud muammolarni hal etish bo‘yicha kompleks yondashuvning yetishmasligi, madaniyat muassasalarining faoliyatini tashkil etish, aholiga madaniy xizmat ko‘rsatishda oqsoqlikka yo‘l qo‘yilayotgani, aksariyat joylarda madaniyat va san’at maskanlarining moddiy-texnik bazasi bugungi kun talablariga javob bermasligini qayd etish zarur. Ayniqsa, soha uchun yuqori malakali kadrlar tayyorlashda mavjud talab va ehtiyojlarni hisobga olmaslik, ularni qayta tayyorlash, malakasini oshirish borasida puxta tizim yaratilmagani madaniyat sohasida yagona davlat siyosatini samarali amalga oshirish, bu yo‘nalishdagi ustuvor vazifalarni to‘liq bajarish imkonini bermayapti. 

Mamlakatimizni yangilash va modernizatsiya qilishning bugungi yangi bosqichida madaniyat va san’atning hayotimizdagi o‘rni va ahamiyatini oshirish, yosh avlodimizni milliy va umuminsoniy qadriyatlar, ona yurtga mehr va sadoqat ruhida tarbiyalash maqsadida: 

1. O‘zbekiston Respublikasida madaniyat va san’at sohasini yanada rivojlantirish va takomillashtirish bo‘yicha 2017-2021-yillarga mo‘ljallangan chora-tadbirlar dasturi (keyingi o‘rinlarda Dastur deb ataladi) 1-ilovaga muvofiq tasdiqlansin. 

Dasturning asosiy yo‘nalishlari etib belgilangan quyidagi vazifalar ijro uchun qabul qilinsin: 

madaniyat va san’at muassasalari faoliyatini tashkil etish va samaradorligini oshirish borasidagi qonunchilikni takomillashtirish. Jumladan, muzeylar va teatrlar faoliyatini takomillashtirish hamda moddiy-texnik bazasini mustahkamlashga qaratilgan kompleks chora-tadbirlar ishlab chiqish. Moddiy madaniy meros va arxeologiya obyektlarini muhofaza qilish va ulardan samarali foydalanish mexanizmlarini yanada takomillashtirish; 

madaniyat va san’at muassasalari, teatrlar, muzeylar, badiiy jamoalar, madaniyat va aholi dam olish maskanlari, madaniyat va istirohat bog‘lari faoliyati, moddiy-texnik bazasi holatini atroflicha o‘rganish, ularni ta’mirlash va zarur jihozlar, musiqa asboblari bilan ta’minlash, samarali ijodiy faoliyat uchun qulay shart-sharoitlar yaratish. O‘zbek milliy raqs va xoreografiya san’atini yanada rivojlantirish, madaniyat va san’at rivojiga katta hissa qo‘shgan taniqli san’atkorlar, jahon miqyosidagi nufuzli ko‘rik-tanlovlarda yuqori o‘rinlarni egallagan yoshlarni moddiy qo‘llab-quvvatlash; 

yoshlarni san’at maskanlariga, xususan, teatr va muzeylar, konsert tomoshalariga muntazam jalb etish, o‘zbek va jahon madaniyatining eng sara namunalaridan bahramand etish orqali ularning ma’naviy-axloqiy, estetik didi va madaniy darajasini yanada yuksaltirish. Madaniyat va istirohat bog‘lari hududida “Nuroniylar maskan”larini tashkil etib, faxriylarning madaniy dam olishlari uchun zarur sharoitlar yaratish;

“Seni kuylaymiz, zamondosh!”, “Debyut” kabi teatr san’ati ko‘rik-festivallari samaradorligini oshirish orqali buyuk siymolar, zamonamiz qahramonlari obrazi, bugungi kunda yurtimizda amalga oshirilayotgan ulkan bunyodkorlik ishlarini aks ettirgan, badiiy yuksak sahna asarlarini yaratish. “Bahor nafasi” xalqaro san’at festivali, “Boysun bahori” xalqaro folklor festivali, “Yoshlik bahori” respublika yosh opera ijrochilari festivali singari tadbirlar, turli xalq sayllarini tashkil etib, ularga xorijiy sayyohlarni keng jalb etish; 

madaniyat va san’at yo‘nalishidagi ta’lim muassasalarining malakali kadrlar va mutaxassislarga bo‘lgan talab va ehtiyojlarini o‘rganish, bu borada kadrlar tayyorlash, qayta tayyorlash va ularning malakasini oshirishning samarali tizimini yaratish, zamonaviy ilg‘or tajribalardan foydalanish, dunyoning mashhur musiqachilari, bastakorlari ishtirokida ijodiy uchrashuvlar, mahorat darslari tashkil etish, madaniyat va san’at yo‘nalishidagi ta’lim muassasalarini o‘quv dasturlari va notalar, o‘quv qo‘llanma va darsliklar, ilmiy-metodik adabiyotlar bilan ta’minlash; 

O‘zbekistonning yuksak madaniyati va san’atini xalqaro maydonda yanada keng targ‘ib etish, xalqaro ko‘rik-tanlov va festivallarda mamlakatimiz vakillarining ishtirokini kuchaytirish, Samarqand shahrida o‘tkaziladigan “Sharq taronalari” xalqaro musiqa festivali nufuzini yanada oshirish, boshqa turli tadbirlarda chet ellik madaniyat va san’at namoyandalari keng qatnashishlarini ta’minlash, xalqaro ilmiy-amaliy anjumanlar tashkil etish, sohaga zamonaviy axborot-kommunikatsiya texnologiyalarini joriy etish va ulardan samarali foydalanish. 

2. O‘zbekiston Respublikasi Madaniyat vazirligi 2017-yilning 1-oktabriga qadar: 

muzeylar va teatrlar faoliyatini takomillashtirish hamda ularning moddiy-texnik bazasini mustahkamlash kompleks chora-tadbirlarini; 

yoshlarni teatr va muzeylarga, konsert-tomosha tadbirlariga tizimli ravishda jalb etish orqali ularning ma’naviy-axloqiy, estetik va madaniy darajasini yanada yuksaltirishga qaratilgan chora-tadbirlar dasturini; 

O‘zbekiston Respublikasi Investitsiyalar bo‘yicha davlat qo‘mitasi va Iqtisodiyot vazirligi bilan birgalikda mamlakatimizdagi konsert-tomosha va teatr muassasalarining ijodiy xodimlari uchun grim va postijyor mahsulotlari, oyoq kiyimlar, maxsus liboslar, jumladan, balet san’ati uchun liboslar, yuksak darajada ishlangan sahna dekoratsiyalari va konstruksiyalari, parda va sahna liboslarini tayyorlashga ixtisoslashgan qo‘shma korxona tashkil etish yuzasidan takliflarini Vazirlar Mahkamasiga kiritsin. 

3. O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi Madaniyat vazirligi va Toshkent shahri hokimligi bilan birgalikda bir oy muddatda Toshkent shahri, Buxoro ko‘chasi, 10-uyda joylashgan binoni “O‘zbekkonsert” davlat muassasasi tasarrufiga o‘tkazish va ushbu binoda jahon andozalariga to‘liq mos keladigan, akademik jamoalarning badiiy dasturlari namoyish etiladigan, jonli ijroga mo‘ljallangan zamonaviy konsert zalini barpo etish bo‘yicha Vazirlar Mahkamasiga taklif kiritsin. 

4. O‘zbekiston Respublikasi Oliy va o‘rta maxsus ta’lim vazirligi va Moliya vazirligi 2018/2019 o‘quv yilidan boshlab O‘zbekiston davlat konservatoriyasida madaniyat va san’at yo‘nalishidagi oliy va o‘rta maxsus ta’lim muassasalari, shuningdek, maktabdan tashqari ta’lim muassasalari uchun malakali musiqa pedagoglarini tayyorlash, qayta tayyorlash va malakasini oshirishga ixtisoslashtirilgan fakultet tashkil etish yuzasidan zarur choralarni amalga oshirsin. 

5. Quyidagilar Dasturni amalga oshirishni moliyalashtirish manbalari etib belgilansin: 

O‘zbekiston Respublikasi Investitsiya dasturlari mablag‘lari; 

O‘zbekiston Respublikasi Davlat byudjeti mablag‘lari; 

O‘zbekiston Respublikasi Madaniyat vazirligi huzuridagi Byudjetdan tashqari Madaniyat va san’atni rivojlantirish jamg‘armasi mablag‘lari; 

O‘zbekiston Respublikasi Moliya vazirligi huzuridagi Byudjetdan tashqari ta’lim va tibbiyot muassasalarining moddiy-texnik bazasini rivojlantirish jamg‘armasi; 

tijorat banklarining kredit mablag‘lari; 

yuridik va jismoniy shaxslarning homiylik xayriyalari, qonun hujjatlarida taqiqlanmagan boshqa manbalar.

6. O‘zbekiston Respublikasida madaniyat va san’at sohasini yanada rivojlantirish va takomillashtirish bo‘yicha 2017-2021-yillarga mo‘ljallangan chora-tadbirlar dasturini amalga oshirish bo‘yicha Respublika komissiyasi tarkibi 2-ilovaga muvofiq tasdiqlansin. 

Respublika komissiyasi (A.Aripov): 

Qoraqalpog‘iston Respublikasi, viloyatlar, Toshkent shahri, tumanlar va shaharlarda Qoraqalpog‘iston Respublikasi Vazirlar Kengashi Raisi va tegishli hududlarning hokimlari boshchiligida Dasturni amalga oshirish bo‘yicha bir hafta muddatda tegishli ishchi guruhlar tashkil etsin; 

vazirlik va idoralar, Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari tomonidan har bir davlat va xo‘jalik boshqaruvi organlari, viloyat, shahar, tumanlar bo‘yicha Dastur asosida ikki hafta muddatda hududiy dasturlar ishlab chiqilishini ta’minlasin, ularni tasdiqlasin hamda ularda nazarda tutilgan tadbirlar o‘z vaqtida amalga oshirilishini muvofiqlashtirsin; 

Batafsil

Bolalar sog'lomlashtirish oromgohlari to'g'risidagi nizomni tasdiqlash haqida

O'ZBEKISTON RESPUBLIKASI XALQ TA'LIMI VAZIRLIGI
O'ZBEKISTON RESPUBLIKASI SOG'LIQNI SAQLASH VAZIRLIGINING QARORI
BOLALAR SOG'LOMLASHTIRISH OROMGOHLARI TO'G'RISIDAGI NIZOMNI TASDIQLASH HAQIDA


(O'zbekiston Respublikasi qonun hujjatlari to'plami, 2017 y., 13-son, 212-modda)
[O'zbekiston Respublikasi Adliya vazirligi tomonidan 2017 yil 31 martda ro'yxatdan o'tkazildi, ro'yxat raqami 2872]
O'zbekiston Respublikasi Vazirlar Mahkamasining 2012 yil 10 martdagi 67-son «Bolalarning dam olishini tashkil etish va sog'lomlashtirish tizimini yanada takomillashtirish chora-tadbirlari to'g'risida»gi qaroriga muvofiq O'zbekiston Respublikasi Xalq ta'limi vazirligi va Sog'liqni saqlash vazirligi qaror qiladi:
1. Bolalar sog'lomlashtirish oromgohlari to'g'risidagi nizom ilovaga muvofiq tasdiqlansin.
2. O'zbekiston Respublikasi Xalq ta'limi vazirligi va Sog'liqni saqlash vazirligining 2014 yil 11 martdagi 9 va 3-son «Bolalar sog'lomlashtirish oromgohlari to'g'risidagi nizomni tasdiqlash haqida»gi qarori (ro'yxat raqami 2572, 2014 yil 7 aprel) (O'zbekiston Respublikasi qonun hujjatlari to'plami, 2014 y., 15-son, 171-modda) o'z kuchini yo'qotgan deb hisoblansin.
3. Mazkur qaror rasmiy e'lon qilingan kundan e'tiboran kuchga kiradi.
Xalq ta'limi vaziri U. INOYaTOV
Toshkent sh.,
2017 yil 24 fevral,
2-mh-son
Sog'liqni saqlash vaziri A. ShADMANOV
Toshkent sh.,
2017 yil 24 fevral,
80-son
O'zbekiston Respublikasi Xalq ta'limi vazirligi, Sog'liqni saqlash vazirligining 2017 yil 24 fevraldagi 2-mh, 80-son qaroriga
ILOVA
Bolalar sog'lomlashtirish oromgohlari to'g'risida
NIZOM
Mazkur Nizom O'zbekiston Respublikasining «Ta'lim to'g'risida»gi hamda «Kasaba uyushmalari, ularning huquqlari va faoliyatining kafolatlari to'g'risida»gi qonunlariga, O'zbekiston Respublikasi Vazirlar Mahkamasining 2012 yil 10 martdagi 67-son «Bolalarning dam olishini tashkil etish va sog'lomlashtirish tizimini yanada takomillashtirish chora-tadbirlari to'g'risida»gi qaroriga muvofiq, bolalar sog'lomlashtirish oromgohlarining (bundan buyon matnda oromgoh deb yuritiladi) maqsadi, vazifalari va funksiyalarini hamda ularning faoliyatini tashkil etish tartibini belgilaydi.
1-bob. Umumiy qoidalar
1. Oromgoh sanitariya-gigiena, sanitariya-epidemiologiya hamda xavfsizlik talablariga to'liq javob beradigan va qulay sharoitda bolalarning belgilangan kundalik hayot tarziga rioya etishi, sifatli ovqatlanishi, ijodiy salohiyatining rivojlanishi, sog'lom turmush tarzi ko'nikmalarining shakllanishi, dam oldirilishi, salomatliklarining tiklanishi va mustahkamlanishi, jismoniy tarbiya, sport va turizm bilan shug'ullanishlarini ta'minlovchi sog'lomlashtirish muassasasi hisoblanadi.
2. Ushbu Nizom talablari davlat organlari, ular tizimidagi tashkilotlar va kasaba uyushmalari tasarrufida bo'lgan oromgohlar faoliyatiga, shuningdek kasaba uyushmalari mablag'lari yo'naltiriladigan boshqa oromgohlar faoliyatiga nisbatan tatbiq etiladi.
3. Oromgoh o'z faoliyatida O'zbekiston Respublikasining Konstitusiyasi va qonunlariga, O'zbekiston Respublikasi Oliy Majlisi palatalarining qarorlariga, O'zbekiston Respublikasi Prezidentining farmonlari, qarorlari va farmoyishlariga, O'zbekiston Respublikasi Vazirlar Mahkamasining qarorlari va farmoyishlariga, ushbu Nizom va boshqa qonun hujjatlariga hamda o'z ustaviga amal qiladi.
2-bob. Oromgohning maqsadi, vazifalari va funksiyalari
4. Oromgohning maqsadi — bolalarning o'qishdan tashqari vaqtini sermazmun o'tkazish, ularning ham jismoniy, ham ruhiy jihatdan hordiq chiqarishlarini ta'minlash, ular ongiga milliy g'oyani, vatanparvarlik tuyg'ularini hamda milliy va umuminsoniy qadriyatlarni singdirish orqali har tomonlama barkamol avlodni voyaga etkazishdan iboratdir.
5. Quyidagilar oromgohning asosiy vazifalari hisoblanadi:
bolalarning dam olishi va sog'lomlashtirilishini tashkil etish;
bolalarning jismoniy, intellektual, ma'naviy va axloqiy kamol topishiga ko'maklashish;
bolalarni o'zbek xalqining tarixiy va milliy an'analari hamda ma'naviy qadriyatlari bilan tanishtirish;
bolalarda «ommaviy madaniyat»ning turli illatlariga qarshi mafkuraviy immunitetni shakllantirish, ular ongiga umuminsoniy va milliy qadriyatlarni singdirish;
bolalarning bo'sh vaqtlarini mazmunli tashkil etish.
Oromgoh qonun hujjatlariga muvofiq boshqa vazifalarni ham amalga oshirishi mumkin.
6. Oromgoh o'ziga yuklatilgan vazifalarga muvofiq quyidagi funksiyalarni amalga oshiradi:
bolalarning har tomonlama kamol topishi, xususan, ularning shaxsi, qiziqishlari, iqtidorining rivojlanishi, mustaqil bilim olishi va ijodiy mehnat qilishi uchun zarur shart-sharoitlar yaratadi;
bolalarning ehtiyojlariga muvofiq ularning ijodiy imkoniyatlarini rivojlantirishga qaratilgan to'garaklar tashkil etadi;
qo'shimcha ta'lim xizmatlari ko'rsatadi;
bolalar bilan san'at va hunarmandchilik yo'nalishlari bo'yicha mashg'ulotlar o'tkazadi;
qobiliyatli, iqtidorli bolalarni aniqlaydi, ularning shaxsini rivojlantirishga qaratilgan musobaqalar, texnik, badiiy ijodiyot, o'lkashunoslik, ekologiya va boshqa yo'nalishlardagi tadbirlarni tashkil etadi.
Oromgoh qonun hujjatlariga muvofiq o'z maqsad va vazifalaridan kelib chiqqan holda boshqa funksiyalarni ham amalga oshirishi mumkin.
3-bob. Oromgohlar faoliyatini tashkil etish
1-§. Umumiy qoidalar
7. Vazirlar Mahkamasining 2012 yil 10 martdagi 67-son qarori bilan tasdiqlangan Respublika oromgohlarida bolalarning dam olishini tashkil etish va sog'lomlashtirish konsepsiyasiga muvofiq oromgohlar 2 turga ajratiladi:
1) stasionar oromgohlar — stasionar baza asosida qurilgan yoki vaqtinchalik ijaraga olingan ob'ektlarda tashkil etilib, unda bolalar smena davomida yashaydi;
2) kunduzgi oromgohlar — umumta'lim maktablari, akademik lisey va kasb-hunar kollejlari, sport, ijtimoiy xizmat ko'rsatish, sanatoriy-kurort muassasalari va boshqa tashkilotlar qoshida vaqtinchalik tashkil etilib, unda bolalar faqatgina kunduz kuni dam oldiriladi va sog'lomlashtiriladi.
8. Oromgoh davlat boshqaruvi va mahalliy davlat hokimiyati organlari hamda boshqa tashkilotlar (bundan buyon matnda Balansda saqlovchi deb yuritiladi) tomonidan tashkil etiladi.
Oromgoh bir nechta Balansda saqlovchi va kasaba uyushmalarining birgalikdagi mablag'lari asosida tashkil etilishi mumkin.
9. Oromgoh faoliyatiga Balansda saqlovchi tomonidan, Balansda saqlovchilar bir nechta bo'lganda kelishuv asosida ulardan biri tomonidan tayinlanadigan boshliq rahbarlik qiladi.
10. Oromgohda bolalarni sog'lomlashtirish muddatlari Balansda saqlovchi(lar) tomonidan belgilanadi. Bunda sog'lomlashtirish muddatlari yozgi mavsumda 10 kundan, kuzgi, qishki va bahorgi mavsumda 7 kundan kam bo'lmasligi lozim.
11. Oromgohda bolalarning yoshini hisobga olgan holda guruhlar tuziladi. Guruhlardagi bolalar soni 7–9 yoshdagi bolalar uchun 30 nafardan, 10–18 yoshdagi bolalar uchun 40 nafardan oshmasligi kerak.
12. Oromgohlarda Vazirlar Mahkamasining 2012 yil 10 martdagi 67-son qarori bilan tasdiqlangan Respublika oromgohlarida bolalarning dam olishini tashkil etish va sog'lomlashtirish konsepsiyasida nazarda tutilgan xizmatlar ko'rsatiladi.
13. Oromgohlarda dam oluvchilar uchun ovqatlanish va boshqa maishiy sharoitlarni tashkil etishda sanitariya qoidalari, normalari va gigiena normativlariga rioya qilinishi zarur.
2-§. Stasionar oromgohning faoliyatini tashkil etish
14. Stasionar oromgoh yuridik shaxs hisoblanadi, o'z ustaviga, mustaqil balansiga, bank hisobvarag'iga, o'z nomi yozilgan muhrga, yuridik manzili ko'rsatilgan shtamp va blankalarga ega bo'ladi.
15. Bolalar stasionar oromgohlarga Balansda saqlovchi tomonidan beriladigan yo'llanma asosida yuboriladi. Yo'llanmalar bolalarning ota-onalari yoki ularning o'rnini bosuvchi shaxslar (bundan buyon matnda ota-onalar deb yuritiladi) ishlayotgan tashkilotlar, ota-onalar, homiylar, kasaba uyushmalarining mablag'lari va qonun hujjatlarida taqiqlanmagan boshqa mablag'lar hisobidan xarid qilinadi.
16. Stasionar oromgohda bolalarni qabul qilish va kuzatish komissiyasi tuziladi.
Bolalarni qabul qilish va kuzatish komissiyasining tarkibi stasionar oromgoh rahbarining buyrug'iga muvofiq besh kishidan iborat tarkibda tasdiqlanadi hamda komissiya raisi (oromgoh rahbari) va a'zolaridan (tarbiyachi, etakchi, bosh shifokor va hamshira) tashkil topadi.
17. Bolalar stasionar oromgohga quyidagi hujjatlar asosida qabul qilinadi:
Balansda saqlovchi tomonidan beriladigan yo'llanma;
bolaning tug'ilganlik to'g'risidagi guvohnomasi yoki pasporti nusxasi;
davolash-profilaktika muassasasi tomonidan bolaning sog'lig'i haqida berilgan tibbiy ma'lumotnoma (079/x-shakl).
18. Stasionar oromgohga bolalar mazkur oromgoh tibbiyot xodimlari ko'rigidan o'tkazilgan holda qabul qilinadi. Tibbiy ko'rik jarayonida bolada biror kasallik alomati aniqlansa, bola oromgohga qabul qilinmaydi va uning davolanishi uchun 3 kun muddat beriladi.
Bola 3 kun ichida davolanib kelgan taqdirda, stasionar oromgohga qabul qilinadi va joriy smenaning yakuniga qadar oromgohda dam oldiriladi. Davolanish muddati uch kundan ortiq davom etgan taqdirda, ota-onasining 10 kun ichida berilgan yozma murojaatiga asosan bolaga berilgan yo'llanma Balansda saqlovchi tomonidan qaytarib olinadi va yo'llanma uchun to'langan mablag'ning 85 foizi to'lovchiga qaytariladi.
19. Bir smenada dam oldirilgan va sog'lomlashtirilgan bolalar stasionar oromgohga mazkur Nizomda belgilangan tartibda keyingi smenalarda ham qabul qilinishi mumkin.
20. Stasionar oromgoh xodimlarining shtatlar jadvali Balansda saqlovchi tomonidan tasdiqlanadi.
21. Stasionar oromgoh xodimlari mehnat shartnomasi asosida oromgoh boshlig'ining buyrug'i bilan ishga qabul qilinadi va lavozimidan ozod etiladi.
22. Tibbiyot xodimlari stasionar oromgohga tegishli hududiy sog'liqni saqlash organlari bilan kelishgan holda ishga qabul qilinadi. Tibbiyot xodimlari va oromgoh rahbariyati bolalarning hayoti, sog'lig'i va jismoniy rivojlanishi, ular bilan mavsum davomida davolash-profilaktika ishlari olib borilishi, sanitariya normalari, qoidalari va gigiena normativlariga rioya qilinishi uchun mas'ul hisoblanadi.
Dam oldirilayotgan va sog'lomlashtirilayotgan bolalar hamda oromgoh xodimlariga birinchi tibbiy yordam bepul ko'rsatiladi.
23. Stasionar turdagi oromgoh xodimlari uchun dam oldirish va sog'lomlashtirish mavsumi davomida yashash va ovqatlanish bepul amalga oshiriladi va buning uchun sarflanadigan xarajatlar Balansda saqlovchi hisobidan qoplanadi.
24. Stasionar oromgoh sog'lomlashtirish mavsumidan tashqari vaqtlarda shartnoma asosida turli tashkilotlar bilan seminarlar, sport musobaqalari va boshqa tadbirlarni o'tkazishi, shuningdek o'z bazasida dam olish maskanlarini tashkil etishi mumkin.
3-§. Kunduzgi oromgohning faoliyatini tashkil etish
25. Kunduzgi oromgohning kundalik faoliyati Balansda saqlovchining qaroriga ko'ra hududiy sharoitdan kelib chiqib quyidagicha tashkil etiladi:
soat 08.30 dan 14.00 gacha;
soat 08.30 dan 17.00 gacha.
26. Har bir kunduzgi oromgohda bolalarni qabul qilish va kuzatish komissiyasi tuziladi.
Bolalarni qabul qilish va kuzatish komissiyasining tarkibi oromgoh faoliyati tashkil etilayotgan muassasa rahbarining buyrug'iga muvofiq besh kishidan iborat tarkibda tasdiqlanadi hamda komissiya raisi (oromgoh rahbari) va a'zolaridan (uch nafar pedagog va tibbiyot xodimi) tashkil topadi.
27. Ota-onalar farzandini oromgohda dam oldirish uchun oromgoh faoliyati tashkil etilishidan 15 kun oldin bolalarni qabul qilish va kuzatish komissiyasiga quyidagi hujjatlarni taqdim etadi:
ota-onalar tomonidan oromgoh rahbari nomiga yozilgan ariza;
ota-onalardan birining fuqarolik pasporti nusxasi;
bolaning tug'ilganlik to'g'risidagi guvohnomasi yoki pasporti nusxasi;
davolash-profilaktika muassasasi tomonidan bolaning sog'lig'i haqida berilgan tibbiy ma'lumotnoma (079/x-shakl);
to'lov to'langanligini tasdiqlovchi hujjat (kvitansiya, to'lov topshiriqnomasi) nusxasi.
28. Kunduzgi oromgoh rahbari tomonidan dam olish mavsumi boshlanguniga qadar oromgohda smena bo'yicha dam oldiriladigan va sog'lomlashtiriladigan bolalar ro'yxati tasdiqlanadi.
29. Bir smenada dam oldirilgan va sog'lomlashtirilgan bolalar kunduzgi oromgohga mazkur Nizomda belgilangan tartibda keyingi smenalarda ham qabul qilinishi mumkin.
4-bob. Oromgoh faoliyatini ixtisoslashtirish
1-§. Umumiy qoidalar
30. Oromgohlar bolalarning yoshini e'tiborga olgan holda tarbiyaviy ishlarning mazmuni bo'yicha turli ixtisoslashgan yo'nalishlarda tashkil etilishi mumkin.
31. Stasionar oromgoh quyidagi ixtisoslashgan yo'nalishlarda tashkil etilishi mumkin:
intellektual rivojlantirish oromgohlari;
sport-sog'lomlashtirish oromgohlari;
sanatoriy-sog'lomlashtirish oromgohlari;
harbiy-sport oromgohlari;
ekologik-biologik, o'lkashunoslik oromgohlari;
ixtisoslashgan bolalar oromgohlari.
32. Kunduzgi oromgoh quyidagi ixtisoslashgan yo'nalishlarda tashkil etilishi mumkin:
mehnat va dam oldirish oromgohlari;
sport-sog'lomlashtirish oromgohlari;
ekologik-biologik, o'lkashunoslik oromgohlari.
33. Stasionar va kunduzgi oromgohlarning faoliyati bolalarning dam olishini tashkil etish va sog'lomlashtirishni amalga oshirish bo'yicha mutasaddi tashkilotchilarning taklif va tashabbuslari bilan boshqa yo'nalishlarda ham tashkil etilishi mumkin.
2-§. Intellektual rivojlantirish oromgohlari
34. Intellektual rivojlantirish oromgohlari fan olimpiadalari, ta'lim sohasining turli darajadagi musobaqalari g'oliblari bo'lgan 10–14 yoshdagi bolalarni dam oldirish va sog'lomlashtirish uchun tashkil etilgan bo'lib, unda bir yoki bir nechta fanlar yoxud tillar chuqurlashtirilgan tarzda o'rganilishiga e'tibor beriladi.
35. Intellektual rivojlantirish oromgohlari intellektual o'quv mashg'ulotlari va madaniy-ma'rifiy tadbirlar dasturlari asosida faoliyat ko'rsatadi.
36. Intellektual o'quv mashg'ulotlari dasturi fan yo'nalishlari bo'yicha dars va to'garak mashg'ulotlari, mahorat darslari, fan kechalari, turli musobaqa, viktorina va boshqa tanlovlar shaklida amalga oshiriladi.
Madaniy-ma'rifiy tadbirlar dasturi sport musobaqalari, ijodiy uchrashuvlar, adabiy-badiiy kechalar va konsert dasturlari, insho va rasmlar tanlovlari, shuningdek oromgohlar uchun tavsiya etilgan filmlar namoyishi shaklida tashkil etiladi.
37. Intellektual o'quv mashg'ulotlari va madaniy-ma'rifiy tadbirlar dasturlarini amalga oshirishda olimlar va oliy ta'lim muassasalarining professor-o'qituvchilari, adabiyot va san'at arboblari ular bilan kelishilgan holda taklif etiladi.
3-§. Sport-sog'lomlashtirish oromgohlari
38. Sport-sog'lomlashtirish oromgohlari 8–18 yoshdagi bolalar va o'smirlar uchun sport yo'nalishidagi ta'lim muassasalari tarbiyalanuvchilarining o'quv-mashq mashg'ulotlarini davom ettirishlari, ularning sport mahoratini takomillashtirish, jismoniy tayyorgarlik darajasini oshirish, sog'lig'ini mustahkamlashga yo'naltirilgan bo'lib, unda bolalarning yoshi va sport turining o'ziga xos xususiyatlari asosida har xil guruhlar tuzilishi mumkin.
39. Sport-sog'lomlashtirish oromgohlaridagi o'quv-mashq mashg'ulotlari bolalar sport maktablarida o'tkaziladigan o'quv jarayonining davomi bo'lib, mazkur muassasalar uchun mo'ljallangan dasturlar asosida murabbiylar tomonidan olib boriladi.
40. Sport-sog'lomlashtirish oromgohiga tarbiyachi va etakchilar sifatida bolalar uchun sport yo'nalishidagi ta'lim muassasalarining murabbiylari kelishuv bo'yicha jalb etiladi.
4-§. Sanatoriy-sog'lomlashtirish oromgohlari
41. Sanatoriy-sog'lomlashtirish oromgohlari yurak qon-tomir tizimining kasallanishi, nafas olish, ovqat hazm qilish organlari, tayanch-harakat apparatining o'ziga xos bo'lmagan xususiyatlari bilan betob bo'lib turadigan 7–14 yoshdagi bolalarni dam oldirish va sog'lomlashtirish uchun tashkil etiladi.
42. Sanatoriy-sog'lomlashtirish oromgohlari stasionar baza asosida qurilgan sog'lomlashtirish oromgohlari, sanatoriya turidagi maktab-internatlar, sanatoriy-profilaktoriylar bazasida, shuningdek o'rmon, daryo va boshqa suv havzalari yonida joylashgan hamda etarli darajada ko'kalamzorlashtirilgan, faoliyat yuritishi uchun zarur jihozlar bilan ta'minlangan ob'ektlarda tashkil etilishi mumkin. Mazkur oromgohlarda bolalarning sog'lomlashtirilishini tashkil etish davolash-sog'lomlashtirish rejimiga qat'iy rioya qilgan holda chiniqish bilan birga olib boriladigan davolash badan-tarbiyasi, to'yimli ovqatlanish hamda kasallik turi va xususiyatiga mos keluvchi profilaktik muolajaga asoslanishi kerak.
43. Sanatoriy-sog'lomlashtirish oromgohlarida bolalarning jismoniy tarbiyasi tibbiy nazorat ostida olib boriladi. Ushbu oromgohlarda sog'lomlashtirilayotgan bolalar uchun jismoniy zo'riqish darajasi va rejimi shifokor tomonidan belgilanadi.
44. Sanatoriy-sog'lomlashtirish oromgohlarida olis masofaga va uzoq davom etuvchi sayohatlar, harbiy o'yinlar va sport musobaqalarini o'tkazish tavsiya etilmaydi, uzoqqa yoki tez yugurishni, chidamlilikni nazarda tutuvchi boshqa mashg'ulot turlari cheklangan holda o'tkaziladi.
5-§. Harbiy-sport oromgohlari
45. Harbiy-sport oromgohlari 12 — 17 yoshdagi bolalarni harbiy-vatanparvarlik ruhida tarbiyalash, yoshlarni Vatan mudofaasiga, O'zbekiston Respublikasi Qurolli Kuchlarida xizmat qilishga tayyorlash maqsadida yozgi ta'til mavsumida ichki ishlar organlarining profilaktik hisobida turuvchi voyaga etmaganlar uchun maxsus dastur asosida tashkil etiladi.
46. Harbiy-sport oromgohlarida voyaga etmaganlar bilan sport mashg'ulotlari, psixologlar ishtirokida seminar-treninglar va turli madaniy-ma'rifiy tadbirlar o'tkaziladi.
6-§. Ekologik-biologik, o'lkashunoslik oromgohlari
47. Ekologik-biologik, o'lkashunoslik oromgohlarida 7 — 14 yoshdagi bolalar uchun sayyohlik-o'lkashunoslik va ekskursiya ishlarining serqirra turlari tashkil etiladi, bolalarga mamlakatimizning tabiiy, ijtimoiy-iqtisodiy va tarixiy jihatdan o'ziga xos jihatlari chuqur o'rgatiladi.
48. Ekologik-biologik, o'lkashunoslik oromgohlarida bolalar uchun sayyohlik, o'lkashunoslik, tabiatshunoslik va ekologiya yo'nalishlarida to'garaklar tashkil etiladi.
Mazkur to'garaklarda bolalarga tabiat hodisalarini kuzatish va taqqoslash, ekologik muammolarni o'rganish va muhokama qilish, shuningdek ushbu maqsadlarda bevosita tajriba o'tkazish uchun zarur shart-sharoitlar yaratiladi.
49. Ekologik-biologik, o'lkashunoslik oromgohlari tomonidan ularda o'tkaziladigan mashg'ulotlarning xususiyatini inobatga olgan holda turli yo'nalishlar bo'yicha sayohatlar tashkil etiladi.
7-§. Ixtisoslashgan bolalar oromgohlari
50. Ixtisoslashgan bolalar oromgohlari 7 — 14 yoshdagi bolalarda etakchilik va faollikni shakllantirish, ularning ijtimoiy moslashuv ko'nikmalarini oshirishga yo'naltiriladi.
51. Ixtisoslashgan bolalar oromgohining faoliyati, qoida tariqasida, O'zbekiston Respublikasi Xalq ta'limi vazirligi tizimidagi Mehribonlik uylarida tarbiyalanayotgan o'quvchilarning ta'til paytida dam olishlari va salomatliklarini mustahkamlashni hamda ularga qo'shimcha ta'lim-tarbiya berishni nazarda tutgan holda tashkil etiladi.
52. Ixtisoslashgan bolalar oromgohida tarbiyachi sifatida Mehribonlik uylarining xizmatchilari, to'garak rahbarlari sifatida esa, «Barkamol avlod» bolalar markazlarining pedagog xodimlari jalb etilishi mumkin.
8-§. Mehnat va dam oldirish oromgohlari
53. Mehnat va dam oldirish oromgohlari umumta'lim maktablari, akademik lisey va kasb-hunar kollejlarining 15 — 18 yoshdagi o'quvchilarining ijtimoiy foydali mehnati dam oldirish va sog'lomlashtirish bilan birga qo'shib olib borilishiga yo'naltiriladi. Unda bolalar ijtimoiy foydali mehnatga tayyorlanadi, ularning mehnat ko'nikmalari shakllantiriladi. O'quvchilarning qiziqishlari va ehtiyojlarini moddiy jihatdan qo'llab-quvvatlash va rag'batlantirish oromgohni tashkil etishning asosiy sharti hisoblanadi.
54. Mehnat va dam oldirish oromgohlari kunduzgi oromgoh sifatida turli tashkilotlar, shu jumladan fermer xo'jaliklari bazasida tashkil etiladi. Mazkur oromgohlarda har bir mavsum 12 kundan ko'p bo'lmagan muddatga belgilanadi.
55. Bolalarni ijtimoiy foydali mehnatga tayyorlash va ularning mehnat ko'nikmalarini shakllantirishda bajarayotgan ishining turi va muddatlaridan qat'i nazar, 18 yoshga etmagan shaxslar uchun belgilangan sanitariya-epidemiologik qoidalar va mehnatni muhofaza qilish qoidalari talablariga rioya qilinishi shart. Mazkur muassasalarga qabul qilingan bolalar O'n sakkiz yoshdan kichik shaxslarning mehnati qo'llanishi taqiqlanadigan noqulay mehnat sharoitlari ishlari ro'yxatida (ro'yxat raqami 1990, 2009 yil 29 iyul) nazarda tutilgan ishlarga jalb qilinmasligi lozim.
56. Mehnat va dam oldirish oromgohlarining kun tartibini ishlab chiqishda bolalarning mehnat faoliyatini jismoniy sog'lomlashtirish va madaniy-ommaviy tadbirlar bilan uyg'unlashtirilgan holda olib borish nazarda tutiladi.
5-bob. Dam oldirish va sog'lomlashtirish jarayoni
57. Oromgohda bolalarning dam oldirilishi va sog'lomlashtirilishi o'quv va madaniy-ma'rifiy dasturlar hamda sog'lomlashtirish tadbirlari asosida tashkil etiladi.
58. Oromgohning har bir to'garagida kamida 10 nafar bolalardan iborat guruhlar tashkil etiladi.
59. Oromgohda barcha yo'nalishdagi to'garak mashg'ulotlari uchun haftada 4 akademik soat, sayyohlik-o'lkashunoslik yo'nalishidagi to'garaklar uchun haftada 6 akademik soat ajratiladi.
60. To'garaklarning faoliyati oromgoh rahbari tomonidan tasdiqlanadigan o'quv reja hamda bolalarning yoshi, psixofiziologik xususiyatlari va sanitariya normalari, qoidalari va gigiena normativlari inobatga olingan holda tuzilgan mashg'ulotlar jadvali asosida bepul amalga oshiriladi.
6-bob. Dam oldirish va sog'lomlashtirish jarayoni ishtirokchilarining huquq va majburiyatlari
61. Bolalar, ota-onalar va pedagog xodimlar dam oldirish va sog'lomlashtirish jarayoni ishtirokchilari hisoblanadi.
62. Bolalar quyidagi huquqlarga ega:
oromgohning ichki tartib-qoidalari bilan tanishish;
oromgohda qiziqishiga ko'ra to'garak turini tanlash va unda bepul ta'lim olish;
oromgohning tibbiy va qo'shimcha ta'lim xizmatlaridan foydalanish;
oromgohning moddiy-texnik bazasidan samarali foydalanish;
oromgohdagi sharoit, ovqatlanish, tibbiy xizmat va o'quv jarayoni masalalarida yuzaga kelgan muammolar bo'yicha oromgoh rahbariyatiga murojaat qilish;
oromgoh faoliyatini takomillashtirishga oid takliflar berish.
Bolalar qonun hujjatlariga muvofiq boshqa huquqlardan ham foydalanishlari mumkin.
63. Bolalar quyidagilarga majbur:
oromgoh ichki tartib-qoidalariga rioya qilish;
oromgoh hududini rahbariyat ruxsatisiz va pedagoglar kuzatuvisiz tark etmaslik;
sanitariya normalari, qoidalari va gigiena normativlariga amal qilish;
oromgoh xodimlariga hurmat bilan munosabatda bo'lish;
o'zi va atrofidagilarning sog'lig'iga zarar etkazadigan harakatlar qilmaslik;
oromgohning mol-mulkini asrab-avaylash va unga ziyon etkazmaslik;
atrof-muhit va o'simliklarga ehtiyotkorona munosabatda bo'lish.
Bolalarga qonun hujjatlariga muvofiq boshqa majburiyatlar ham yuklatilishi mumkin.
64. Ota-onalar quyidagi huquqlarga ega:
oromgoh xodimlaridan farzandiga hurmat bilan munosabatda bo'lish va sifatli xizmat ko'rsatilishini talab qilish;
oromgohning ichki tartib-qoidalari, kun tartibi va taomnoma bilan tanishish;
farzandini oromgohdan o'z xohishiga ko'ra muddatidan oldin olib ketish;
oromgoh faoliyatini takomillashtirish yuzasidan oromgoh rahbariyatiga taklif berish.
Ota-onalar qonun hujjatlariga muvofiq boshqa huquqlardan ham foydalanishlari mumkin.
65. Ota-onalar quyidagilarga majbur:
dam oldirish va sog'lomlashtirish davrida farzandini zarur kiyim-bosh va shaxsiy gigiena vositalari bilan ta'minlash;
farzandini oromgohga o'z vaqtida olib kelish va olib ketish;
to'lovni o'z vaqtida amalga oshirish.
Ota-onalarga qonun hujjatlariga muvofiq boshqa majburiyatlar ham yuklatilishi mumkin.
66. Oromgohning pedagog xodimlari quyidagi huquqlarga ega:
oromgohning ichki tartib-qoidalari bilan tanishish;
o'z kasbiy sha'ni va qadr-qimmatini himoya qilish;
oromgohni boshqarishda ishtirok etish;
oromgoh rahbariyatiga oromgoh faoliyatini takomillashtirish bo'yicha takliflar kiritish.
Oromgohning pedagog xodimlari qonun hujjatlariga muvofiq boshqa huquqlardan ham foydalanishlari mumkin.
67. Oromgohning pedagog xodimlari quyidagilarga majbur:
ushbu Nizom talablariga va oromgohning ichki tartib-qoidalariga rioya qilish;
kasbiga xos bo'lgan xulq-atvorda bo'lish;
to'garak mashg'ulotlarini tasdiqlangan o'quv reja asosida tashkil etish;
bolalarga hurmat bilan munosabatda bo'lish, ularni Vatanga sadoqat, milliy va umuminsoniy qadriyatlarga hurmat, atrof-muhitga ehtiyotkorlik bilan munosabatda bo'lish ruhida tarbiyalash;
oromgohda bo'lgan davrida bolaning hayoti va salomatligini muhofaza qilish.
Oromgohning pedagog xodimlariga qonun hujjatlariga muvofiq boshqa majburiyatlar ham yuklatilishi mumkin.
68. Oromgoh rahbari quyidagi huquqlarga ega:
oromgoh xodimlari va dam oluvchilardan oromgohning ichki tartib-qoidalariga rioya etilishini talab qilish;
o'quv va madaniy-ma'rifiy dasturlar, sport tadbirlari hamda to'garak mashg'ulotlarini takomillashtirish bo'yicha takliflar kiritish;
bolalar tomonidan oromgohning ichki tartib-qoidalariga rioya qilinmagan taqdirda, ularning ota-onalariga xabar berish;
oromgohning ichki tartib-qoidalarini qo'pol ravishda buzgan bolalarni oromgohdan chetlashtirish va keyingi smenalarga qabul qilmaslik.
Oromgoh rahbari qonun hujjatlariga muvofiq boshqa huquqlardan ham foydalanishlari mumkin.
69. Oromgoh rahbari quyidagilarga majbur:
ushbu Nizom talablariga rioya qilish;
oromgoh faoliyatini tashkil etishda sanitariya normalari, qoidalari va gigiena normativlariga rioya qilish;
bolalarning dam oldirilishi va sog'lomlashtirilishi uchun zarur shart-sharoitlar yaratish;
to'garaklarni bolalarning yoshi, psixofiziologik holati va qiziqishlarini inobatga olgan holda tashkil etish;
moddiy-texnik bazadan samarali foydalanilishi va asrab-avaylanishini ta'minlash;
dam oldirish va sog'lomlashtirish jarayoni ishtirokchilariga bepul tibbiy xizmat ko'rsatish va ularni dori-darmon bilan ta'minlash;
bolaning salomatligi jiddiy yomonlashgan hollarda uning ota-onasini hamda oromgohga biriktirilgan tibbiyot muassasasini xabardor qilish.
Oromgoh rahbariga qonun hujjatlariga muvofiq boshqa majburiyatlar ham yuklatilishi mumkin.
7-bob. Oromgohni moliyalashtirish
1-§. Umumiy qoidalar
70. Bolalarni oromgohlarda dam oldirish va sog'lomlashtirish uchun zarur bo'lgan mablag'lar miqdori dam oldirilishi rejalashtirilgan bolalar sonidan kelib chiqib aniqlanadi.
71. Oromgohning buxgalteriya hisobi va hisoboti buxgalteriya hisobi to'g'risidagi qonun hujjatlarida belgilangan tartibda amalga oshiriladi.
2-§. Stasionar oromgohni moliyalashtirish
72. Stasionar oromgohlarda bolalarni saqlash xarajatlari quyidagi manbalar hisobidan qoplanadi:
ijtimoiy sug'urta mablag'lari;
kasaba uyushmasi byudjeti mablag'lari;
oromgohga borish uchun beriladigan yo'llanmalarni sotishdan tushgan mablag'lar;
Balansda saqlovchining mablag'lari;
homiylik xayriyalari;
qonun hujjatlarida taqiqlanmagan boshqa mablag'lar.
73. Stasionar turdagi oromgohni doimiy saqlash bo'yicha xarajatlar Balansda saqlovchi tomonidan amalga oshiriladi.
Agar oromgoh bir nechta Balansda saqlovchi va kasaba uyushmalarining birgalikdagi mablag'lari asosida tashkil etilgan bo'lsa, uni moddiy ta'minlash bo'yicha xarajatlar oromgohni tashkil etishda ishtirok etgan tashkilotlar tomonidan oromgohga sog'lomlashtirish uchun jo'natilgan bolalarning soniga mutanosib ravishda qoplanadi.
74. Balansda saqlovchi stasionar oromgohning bolalarni qabul qilish quvvati doirasida oromgohga o'z hisobidan bolalar uchun qo'shimcha o'rinlar tashkil qilishi mumkin. Bunda oromgohdagi bolalar sonining ortishi va ularning ta'minoti bilan bog'liq xarajatlar, shu jumladan, bolalarning ovqatlanishi, davolanishi, oromgoh xodimlarining ish haqi uchun qo'shimcha mablag'lar va boshqa xarajatlar Balansda saqlovchi tomonidan qoplanadi.
75. Stasionar oromgohning moliyaviy-xo'jalik faoliyati muntazam ravishda, lekin dam olish mavsumi davomida kamida bir marta Balansda saqlovchi va kasaba uyushmasi qo'mitasi tomonidan tekshiriladi.
76. Dam olish mavsumi tugagach, stasionar oromgohning moliyaviy-xo'jalik faoliyati Balansda saqlovchi va kasaba uyushmasi qo'mitasi tomonidan taftish qilinadi hamda oromgohning mol-mulki to'liq xatlovdan o'tkaziladi.
3-§. Kunduzgi oromgohni moliyalashtirish
77. Kunduzgi oromgohlarda bolalarni saqlash xarajatlari quyidagi manbalar hisobidan qoplanadi.
ota-onalar to'lovi;
homiylik xayriyalari;
Balansda saqlovchilarning mablag'lari;
qonun hujjatlarida taqiqlanmagan boshqa mablag'lar.
78. Kunduzgi oromgohni moddiy ta'minlash, bolalarni sog'lomlashtirish, tarbiyaviy ishlarni o'tkazish, ovqatlantirish uchun zarur bo'lgan xarajatlar oromgoh rahbari tomonidan tasdiqlanadigan xarajatlar smetasiga muvofiq amalga oshiriladi.
79. Kunduzgi oromgohda bolalarni uzluksiz ravishda sifatli oziq-ovqat mahsulotlari bilan ta'minlash uchun zarur bo'lgan mablag'lar bolalarning oromgohda bo'lganligi uchun ota-onalar to'lovi hamda oromgohlar faoliyat samaradorligini oshirishga doir tashkiliy masalalarni o'z vaqtida hal etish, xavfsizlik va tibbiy xizmat, shuningdek bolalarning mazmunli dam olishini ta'minlash bo'yicha hududiy muvofiqlashtiruvchi guruh (bundan buyon matnda Hududiy muvofiqlashtiruvchi guruh deb yuritiladi) tomonidan aniqlashtiriladigan boshqa manbalar hisobidan qoplanadi.
Oziq-ovqat mahsulotlari bilan ta'minlash uchun zarur bo'lgan mablag'lar Hududiy muvofiqlashtiruvchi guruhning tashabbusi bilan ular tomonidan aniqlashtirilgan moliyaviy manbalar hisobidan 100 foizgacha qoplanishi mumkin.
80. Kunduzgi oromgohda bolalarni ovqatlantirish oromgoh tashkil etiladigan muassasa oshxonasida ijara shartnomasi asosida faoliyat ko'rsatayotgan tadbirkorlik sub'ekti va oromgoh tashkil etiladigan muassasa o'rtasida O'zbekiston Respublikasi Vazirlar Mahkamasining 2016 yil 2 maydagi 132-son «Umumiy o'rta va o'rta maxsus, kasb-hunar ta'limi muassasalarida sog'lom ovqatlanishni tashkil etishni yanada takomillashtirish chora-tadbirlari to'g'risida»gi qaroriga muvofiq shartnoma asosida amalga oshiriladi.
81. Ota-onalar tomonidan bir nafar bola uchun amalga oshiriladigan to'lov miqdori oromgohdagi bolalarni ovqatlantirish uchun sarflanadigan mablag'larning boshqa manbalar hisobidan qoplanmaydigan qismini rejadagi bolalar soniga bo'lish orqali Hududiy muvofiqlashtiruvchi guruh tomonidan belgilanadi.
82. Bolalarni ovqatlantirish uchun sarflanadigan mablag'lar miqdori sanitariya qoidalari, normalari va gigiena normativlarida belgilangan bir kunlik ovqatlanish normativi hamda oromgohda bo'lish muddatidan kelib chiqib, kunduzgi oromgoh tashkil etiladigan muassasa oshxonasida ijara shartnomasi asosida faoliyat ko'rsatayotgan tadbirkorlik sub'ektining xarajatlari inobatga olingan holda belgilanadi.
83. Ota-onalar to'lovi mablag'lari to'laligicha kunduzgi oromgohda bolalarni ovqatlantirish xarajatlariga yo'naltiriladi.
84. Kunduzgi oromgohda bolalarni dam oldirish jarayoniga oromgoh tashkil etilgan muassasada faoliyat ko'rsatayotgan pedagog va boshqa xodimlar bilan birga ixtiyoriylik asosida boshqa ta'lim muassasalarining xodimlari ham jalb etiladi. Mazkur xodimlarning asosiy ish joyi bo'yicha ish haqlari saqlab qolinadi hamda ularga oromgohdagi faoliyati uchun qo'shimcha haq to'lanmaydi.
85. Ota-onalar to'lovini to'lash va xarajatlarni amalga oshirish uchun kunduzgi oromgoh tashkil etiladigan muassasaga xizmat ko'rsatuvchi tegishli g'aznachilik bo'linmasida shaxsiy g'azna hisobvarag'i ochiladi.
8-bob. Yakuniy qoidalar
86. Oromgohni qayta tashkil etish yoki tugatish O'zbekiston Respublikasining qonun hujjatlarida belgilangan tartibda amalga oshiriladi.
87. Ushbu Nizom O'zbekiston Respublikasi Moliya vazirligi, Mehnat vazirligi, Ichki ishlar vazirligi, Madaniyat va sport ishlari vazirligi, Oliy va o'rta maxsus ta'lim vazirligining O'rta maxsus, kasb-hunar ta'limi markazi, O'zbekiston Kasaba uyushmalari Federasiyasi Kengashi, O'zbekiston Fermerlari kengashi hamda O'zbekiston Respublikasi Savdo-sanoat palatasi bilan kelishilgan.
Moliya vaziri B. XODJAYEV
2017 yil 14 fevral,
Mehnat vaziri A. ABDUXAKIMOV
2017 yil 14 fevral,
Ichki ishlar vaziri A. AZIZOV
2017 yil 14 fevral,
Madaniyat va sport ishlari vaziri B. AXMYEDOV
2017 yil 14 fevral,
Oliy va o'rta maxsus ta'lim vazirligining O'rta maxsus, kasb-hunar ta'limi markazi direktori U. SALIMOV
2017 yil 14 fevral,
O'zbekiston Kasaba uyushmalari Federasiyasi Kengashi raisi Q. RAFIKOV
2017 yil 14 fevral
O'zbekiston Fermerlari kengashi raisi S. TURDIYEV
2017 yil 14 fevral
Savdo-sanoat palatasi raisi A. ShAYXOV
2017 yil 14 fevral


Batafsil

Markaziy osiyo mintaqaviy iqtisodiy hamkorlik institutini ta'sis etish to'g'risidagi bitimni (islomobod, 2016 yil 26 oktyabr) ratifikasiya qilish haqida

O'ZBEKISTON RESPUBLIKASINING QONUNI

MARKAZIY OSIYO MINTAQAVIY IQTISODIY HAMKORLIK INSTITUTINI TA'SIS ETISH TO'G'RISIDAGI BITIMNI (ISLOMOBOD, 2016 YIL 26 OKTYABR) RATIFIKASIYA QILISH HAQIDA

(O'zbekiston Respublikasi qonun hujjatlari to'plami, 2017 y., 13-son, 197-modda)
Qonunchilik palatasi tomonidan 2017 yil 25 martda qabul qilingan
Senat tomonidan 2017 yil 28 martda ma'qullangan
Markaziy Osiyo mintaqaviy iqtisodiy hamkorlik institutini ta'sis etish to'g'risidagi Bitim (Islomobod, 2016 yil 26 oktyabr) ratifikasiya qilinsin.
O'zbekiston Respublikasining Prezidenti Sh. MIRZIYoYEV
Toshkent sh.,
2017 yil 31 mart,
O'RQ-424-son



Batafsil

Ikkinchi jahon urushi qatnashchilarini rag'batlantirish to'g'risida

O'zbekiston Respublikasi Prezidentining farmoni


9 may umumxalq bayrami – Xotira va Qadrlash kuni o'tkazilishi, shuningdek, 1941-1945 yillardagi Ikkinchi jahon urushida fashizm ustidan qozonilgan g'alabaning 72 yilligi nishonlanishi munosabati bilan hamda urush qatnashchilari va nogironlarini moddiy rag'batlantirish maqsadida:

1. 1941-1945 yillardagi Ikkinchi jahon urushi qatnashchilari va nogironlariga 2 000 000 (ikki million) so'm miqdorida bir martalik pul mukofoti belgilansin.

2. Mazkur Farmonni bajarish bilan bog'liq sarf-xarajatlar O'zbekiston Respublikasi byudjeti mablag'lari hisobidan amalga oshirilsin.

3. O'zbekiston Respublikasi Mudofaa vazirligi, Ichki ishlar vazirligi, Milliy xavfsizlik xizmati Moliya vazirligi va Markaziy bank bilan birgalikda 1941-1945 yillardagi Ikkinchi jahon urushi qatnashchilari va nogironlariga ushbu pul mukofotining tantanali va bayramona vaziyatda topshirilishini ta'minlasin.

4. Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari O'zbekiston Respublikasi Madaniyat vazirligi, Mudofaa vazirligi, Ichki ishlar vazirligi, Xotin-qizlar qo'mitasi, “Kamolot” yoshlar ijtimoiy harakati, Badiiy akademiya, Respublika Ma'naviyat targ'ibot markazi, “Nuroniy” jamg'armasi va “Mahalla” xayriya jamoat fondi, boshqa nodavlat notijorat tashkilotlari bilan birgalikda Vatanimiz ozodligi va sha'ni-sharafi himoyachilariga bag'ishlangan maxsus uchrashuvlar va ma'rifiy-badiiy kechalar o'tkazsin.

5. Ushbu Farmonning ijrosini nazorat qilish O'zbekiston Respublikasining Bosh vaziri A.N.Aripov zimmasiga yuklansin.


O'zbekiston Respublikasi Prezidenti                                            SH.MIRZIYOYEV

Toshkent shahri, 2017 yil 4 aprel


Batafsil

Xotira va Qadrlash kuniga tayyorgarlik ko'rish va uni o'tkazish chora-tadbirlari to'g'risida

O'zbekiston Respublikasi Prezidentining qarori


Inson, millat va xalq tarixiy xotira tuyg'usi bilan barhayotdir. Xotira – kechagi o'tmishni, ajdodlar o'gitini, milliy merosimizni anglatib turuvchi – muqaddas kitob zarvaraqlaridek hayotimizni yoritib turadi. Qadr – insonni yuksaklikka ko'taradi, uning faoliyatiga, orzu-intilishlariga, maqsad-maslaklariga olijanoblik bag'ishlaydi.

Bukilmas iroda va jasorat namunasini amalda namoyon etib, o'z hayotini aziz Vatanimizning har tomonlama ravnaq topishi, bugungi tinch va osoyishta kunlar uchun jonini fido qilgan ajdodlarning muqaddas xotirasini yod etib, ezgu ishlarini davom ettirish, safimizda yurgan keksalarni e'zozlash – odamiylikning eng oliy mezoni va bizga tinchlik, omonlik kerak, deb yashaydigan bag'rikeng va olijanob xalqimizga xos azaliy qadriyatdir.

Mamlakatimizda 9 may umumxalq bayrami – Xotira va Qadrlash kunini, Ikkinchi jahon urushining har bir qatnashchisi, front orti mehnat faxriylari hamda mustaqillik yillarida xizmat burchini bajarish chog'ida halok bo'lgan harbiy xizmatchilar va huquqni muhofaza qilish organlari xodimlarining xotirasi oldida hurmat bajo keltirish, yurtimizda mehr-oqibat, hamjihatlik, insoniylik, bag'rikenglik va xayr-saxovat muhitini yanada mustahkamlash, yosh avlodni milliy an'analarimizga sadoqat va umuminsoniy qadriyatlarga hurmat ruhida kamol toptirish hamda bu muqaddas ayyomni yuksak saviyada nishonlash maqsadida:

1. Xotira va Qadrlash kuniga bag'ishlangan tadbirlarga tayyorgarlik ko'rish va uni o'tkazish dasturi (keyingi o'rinlarda – Dastur) 1-ilovaga muvofiq ma'qullansin.

2. Xotira va Qadrlash kuniga bag'ishlangan tadbirlarga tayyorgarlik ko'rish va uni o'tkazish bo'yicha ishchi guruh tarkibi 2-ilovaga muvofiq tasdiqlansin.

3. Ishchi guruh (A.Aripov):

Dasturda nazarda tutilgan tadbirlarni “Qahramonlik, burch va fidoyilik” hamda “Ajdodlarni xotirlash – muqaddas qadriyat” shiorlari ostida yuqori saviyada o'tkazishni tashkil etsin;

Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari bilan birgalikda Dasturda nazarda tutilgan tadbirlarning sifatli o'tkazilishini ta'minlasin va joylarga chiqib, Xotira va Qadrlash kuniga bag'ishlangan tadbirlarga tayyorgarlik ko'rish va uni o'tkazishga amaliy yordam ko'rsatsin;

1941-1945 yillardagi Ikkinchi jahon urushining har bir qatnashchisiga, front orti mehnat faxriylariga, mustaqillik yillarida xizmat burchini bajarish chog'ida halok bo'lgan harbiy xizmatchilar va huquqni muhofaza qiluvchi organ xodimlarining oila a'zolariga moddiy, ma'naviy va boshqa turdagi yordamlar ko'rsatish maqsadida tegishli vazirlik va idoralar, tashkilot va harbiy qismlar vakillari biriktirilsin hamda ushbu toifadagi shaxslarni qutlash va ko'nglini ko'tarish maqsadida ularning yashash joyiga rahbarlarning tashrifini tashkil etsin;

yolg'iz va kam ta'minlangan Ikkinchi jahon urushi qatnashchilari turar joyi va uy xo'jaliklarini ta'mirlash, obodonlashtirish hamda o'z uy-joyiga ega bo'lmaganlariga turar joy ajratish bo'yicha tegishli chora-tadbirlarni amalga oshirsin;

Xotira va Qadrlash kuniga tayyorgarlik ko'rish davomida 1941-1945 yillardagi Ikkinchi jahon urushi va front orti mehnat faxriylari, mustaqillik yillarida xizmat burchini bajarish chog'ida halok bo'lgan harbiy xizmatchilar va huquqni muhofaza qiluvchi organ xodimlari ko'rsatgan matonati, mardlik va jasorati ahamiyatini keng aholi qatlami, ayniqsa, yoshlar o'rtasida tushuntirish, targ'ib va tashviq etish bo'yicha madaniy-ma'rifiy va vatanparvarlik yo'nalishidagi tadbirlar o'tkazilishini tashkil qilsin;

1941-1945 yillardagi Ikkinchi jahon urushi qatnashchilari va nogironlariga O'zbekiston Respublikasi Prezidenti nomidan bir martalik pul mukofotini tantanali ravishda topshirsin.

4. Qoraqalpog'iston Respublikasi Vazirlar Kengashi, viloyatlar va Toshkent shahar hokimliklari O'zbekiston Respublikasi Madaniyat vazirligi, Mudofaa vazirligi, Ichki ishlar vazirligi, Xotin-qizlar qo'mitasi, O'zbekiston Kasaba uyushmalari federasiyasi, Respublika Ma'naviyat targ'ibot markazi, “Nuroniy” jamg'armasi, “Mahalla” xayriya jamoat fondi, “Kamolot” yoshlar ijtimoiy harakati va “O'zbekkonsert” davlat muassasasi bilan hamkorlikda:

viloyat, shahar va tumanlarda Xotira va Qadrlash kuniga tayyorgarlik ko'rish va uni o'tkazish bo'yicha kompleks chora-tadbirlarni ishlab chiqsin va amalga oshirsin;

Ikkinchi jahon urushi vaqtidagi kompozisiyalar installyasiyasi, jumladan, urush yillari qo'shiq va musiqalari, dasturxon tuzash va tegishli sharoitlar yaratish bilan bog'liq tadbirlarni tashkil etsin;

ko'cha va maydonlarni Xotira va Qadrlash kuniga bag'ishlangan plakat va stendlar bilan bezashni ta'minlasin.

5. Belgilab qo'yilsinki, o'tkaziladigan bayram tadbirlari hamda mamlakatimizning turli hududida istiqomat qiluvchi 1941-1945 yillardagi Ikkinchi jahon urushi va front orti mehnat faxriylari vakillarini Toshkent shahrida bo'lib o'tadigan marosimlarga temir yo'l yoki avtomobil transportida kelib-ketishi, mehmonxonalarda joylashishi, ovqatlanishi, madaniy hordiq chiqarishi hamda zarur hollarda kiyim-kechak bilan ta'minlanishi:

Qoraqalpog'iston Respublikasi va viloyatlarda mahalliy byudjetlar hamda homiylik xayriyalari hisobidan;

Toshkent shahrida O'zbekiston Respublikasi byudjeti va Toshkent shahar mahalliy byudjeti mablag'lari hisobidan teng ulushlarda qoplanadi.

6. O'zbekiston Respublikasi Mudofaa vazirligi Xotira va Qadrlash kuni munosabati bilan Toshkent shahrida 2017 yil 9 may soat 21.00 da bayram salyutini tashkil qilsin.

7. O'zbekiston Respublikasi Ichki ishlar vazirligi tadbirlar o'tkaziladigan joylarda jamoat tartibi va xavfsizligini ta'minlasin.

8. O'zbekiston Milliy teleradiokompaniyasi, O'zbekiston Milliy axborot agentligi, “Jahon” axborot agentligi va boshqa ommaviy axborot vositalariga Xotira va Qadrlash kuni o'tkazilishiga tayyorgarlik ko'rish va uni o'tkazish bo'yicha amalga oshirilayotgan ishlarni keng yoritib borish tavsiya etilsin.

9. Mazkur Qarorning bajarilishini nazorat qilish O'zbekiston Respublikasining Bosh vaziri A.N.Aripov zimmasiga yuklansin.


O'zbekiston Respublikasi Prezidenti                                          Sh.MIRZIYoYEV

Toshkent shahri, 2017 yil 4 aprel


Batafsil

Manzilimiz


Manzil: Qashqadaryo viloyati, Qarshi shahri, Mustaqillik Maydoni,1
Pochta indeksi:180100
Telefon
: 0(375)221-12-88, 0(375)221-03-81
Faks
: 0(375)221-13-40
Veb-sayt
http://www.qashqadaryo.uz
Elektron pochta
Yaqin jamoat transport to`xtash joylari 
Milliy bank va Mustaqillik Maydoni bekati
Avtomashrut
1,4,5,7,10,18,20,22,23,27,
37,44,462,11,21,37,33

Hozir saytimizda

Bizning saytimizda 93 mehmonlar va ro'yhatdan o'tgan foydalanuvchilar 0

Bosh sahifa

Qabul kunlari

A- A A+

Rahbariyatga murojaat etish

Rahbariyatga murojaat etish

Viloyat hokimligining umumiy bo'limiga murojjat etish (Yangi oynada ochiladi)

Mobil versiya

Mobil versiyaga o'tish

Bog'lanish

Ishonch telefon raqami 
0(371) 200-55-05 
Ishonch telefon raqami reglament
Yagona telefon raqami
0(375) 221-07-60 
Yagona telefon raqami reglamenti

Batafsil>>>

Biz bilan bog'lanish

Sahifa adressi

Maxsus imkoniyatlar

K'orinish

Pastda o'zingizga kerakli parametrni tanlasng
Blue Green Red Radian
Select menu
Google Font
Body Font-size
Body Font-family