wrapper

Maxsus imkoniyatlar

    Qamashi tumanidagi “Comfortable Business Service” qo‘shma korxonasi yaqinda tashkil etilgan bo‘lib, u yirik investitsiya loyihasi tashabbuskori hisoblanadi. Korxona ham ta’sischisi sanalgan Janubiy Koreyaning “Myung Sung Placon Ltd” kompaniyasi hudud qishloq xo‘jaligi tarmog‘iga katta hajmda sarmoya kiritishni maqsad qilgan. Qiymati 5 million AQSH dollariga baholangan ushbu loyiha doirasida sabzavot va poliz ekinlari yetishtirish yo‘lga qo‘yiladi. Buning uchun sohaga zamonaviy xorij texnologiyasi jalb etilmoqda. 20 gektar lalmi yerda issiqxona barpo etilib, unda o‘simliklar gidroponika usulida parvarishlanadi. Yiliga ikki marta mahsulot yetishtirishni tashkil etib, mavsumda jami 2 ming tonna hosil olish ko‘zlanayotir. 20 nafar kishini band qilish imkonini beruvchi mazkur loyiha 2019-yil oxirida to‘liq ishga tushirilishi belgilangan. Ayni paytda chet eldan zarur asbob-uskunalarni keltirish, yerni tayyorlash ishlari davom etmoqda. Bu haqda viloyat bojxona boshqarmasida bo‘lib o‘tgan davra suhbatida ma’lumot berildi.

Tadbir shu yil 21-iyun kuni davlatimiz rahbari raisligida o‘tgan, tarmoqlar va hududlarda investitsiya loyihalarini amalga oshirish holati, to‘g‘ridan-to‘g‘ri xorijiy investitsiyalarni jalb etish va o‘zlashtirish natijalari tahliliga bag‘ishlangan videoselektor yig‘ilishida bojxona organlariga yuklatilgan vazifalar ijrosini ta’minlash maqsadida tashkil etildi. Unda tadbirkorlar, viloyatimizda faoliyat ko‘rsatayotgan 10 ga yaqin investor ishtirok etdi.

Ta’kidlanganidek, yurtimizning investitsiyaviy jozibadorligini tobora oshirish, mamlakatimizda chet el sarmoyadorlarining muvaffaqiyatli biznes yuritishiga keng sharoit yaratish, ularning huquq va manfaatlarini ro‘yobga chiqarishga ustuvor ahamiyat qaratilmoqda. Xorijlik ishbilarmonlar uchun qonun yo‘li bilan keng ko‘lamdagi imtiyozlar, afzalliklar va kafolatlar tizimi yaratib berilgan. Albatta, bu holat sohada sifat o‘zgarishlari yasalishiga ham xizmat qilmoqda.

- Hozirgi kunda viloyatimizda 20 ta investitsion loyiha amalga oshirilmoqda, - deydi viloyat bojxona boshqarmasi bo‘lim boshlig‘i Otabek Mahmadaliyev. – Ularni hayotga tatbiq etish jarayonida Niderlandiya, Turkiya va Janubiy Koreya kabi mamlakatlar sarmoyadorlari ham faol qatnashmoqda. Binobarin, chet el kapitalisiz iqtisodiyotni jadal rivojlantirishga erishish qiyin. Chunki shu orqali mamlakatimizga eng so‘nggi texnologiyalar olib kirilishi ta’minlanadi. Natijada import o‘rnini bosuvchi, eksportga yo‘naltiriladigan mahsulotlar ishlab chiqarish ko‘lami oshadi. Shunday ekan, soha vakillarini har tomonlama qo‘llab-quvvatlash, ularga ko‘proq yengillik va qulaylik taqdim etish talab qilinadi. Bugungi tadbirda ham asosiy e’tiborni shu masalaga qaratdik. Loyihalarni amalga oshirishda bojxona ishi, shuningdek, boshqa jihatlar bilan bog‘liq  masalalarni hal etish, mavjud muammolarni atroflicha o‘rganish va yechish, tadbirkorlarni tegishli imtiyoz va imkoniyatlardan xabardor qilish kun tartibidan asosiy o‘rin egalladi.

Davra suhbatida investitsiya loyihalari ijrosi qanday ketayotgani ham ko‘zdan kechirildi. Bildirilishicha, Qarshi tumanidagi “Lt Textile” xorijiy korxonasi tomonidan ilgari surilgan yirik istiqbolli loyihaning ikkinchi bosqichini ishga tushirish bo‘yicha ishlar jadal davom etmoqda. Bu jarayonda kelgusida tarmoqqa 100 million AQSH dollari miqdorida xorijiy sarmoya jalb qilinishi ko‘zda tutilgan. Buning samarasida korxonada ip-kalavadan mato to‘qish quvvati tashkil etiladi. Bundan tashqari, Janubiy Koreyaning “Hyundai Engineering Co., Ltd” kompaniyasi bosh pudratchi sifatida G‘uzor tumanida GTL zavodini qurish ishlarini bajarmoqda. Bu mamlakatimiz neft-gaz sanoati ravnaqi uchun eng muhim loyihalardan biri sifatida baholanadi. Qolaversa, tadbirda Qarshi shahridagi “Qarshi leather” qo‘shma korxonasi tashabbuskorligidagi teriga ishlov berishni ko‘zda tutuvchi loyihaning keyingi bosqichi holatiga ham baho berildi.

Davra suhbati ishtirokchilari mamlakatimiz bojxona qonunchiligida joriy etilgan yangi tartib-taomillar, yengilliklar bilan ham yaqindan tanishtirildi. Investorlar o‘zlarini qiziqtirgan barcha savollarga soha mutaxassislaridan batafsil javob oldi.

    Viloyat statistika boshqarmasi hududdagi kichik tadbirkorlik subyektlarining joriy yil dastlabki olti oyidagi faoliyatiga oid ma’lumotlarni e’lon qildi.

Qayd etilishicha, o‘tgan davrda vohamizdagi kichik tadbirkorlik subyektlari tomonidan 1 trillion 315,2 milliard so‘mlik sanoat mahsulotlari ishlab chiqarilgan. Tarmoq korxonalarining hudud sanoatidagi ulushi 20,2 foizni tashkil etmoqda. O‘sish sur’ati ham salmoqli ekanini aytish lozim. Ushbu ko‘rsatkich o‘tgan yilning xuddi shu davriga nisbatan 107,4 foizni tashkil qilgan.

Ahamiyatlisi, viloyatimiz miqyosida bajarilgan qurilish ishlari umumiy hajmining 83,9 foizi aynan shu turdagi mulkchilik shakliga ega subyektlar hissasiga to‘g‘ri keladi. Birinchi yarim yillikda ular tomonidan 1 trillion 355,9 milliard so‘mlik bunyodkorlik ishlari amalga oshirilgan va bu ko‘lam 112,1 foizga ko‘paygan. Kichik tadbirkorlik subyektlari xizmatlar ko‘rsatish jabhasida ham yetakchilik qilmoqda. Buni ularning hudud xizmatlar bozoridagi ulushi 71 foiz ekanidan ham bilish mumkin. Yanvar-iyun oylari oralig‘ida mazkur subyektlar aholiga 2 trillion 247,2 milliard so‘mlik xizmat taqdim etgan. Mahsuldorlik esa 2,4 foizga ortgan.

Shuningdek, viloyatda chakana tovar aylanmasi 86,5 foiz hajmi (3 trillion 997 milliard so‘m) shakllanishida kichik tadbirkorlik subyektlari asosiy o‘rin egallagan. O‘tgan yilgi mos davrga nisbatan ushbu tarmoqdagi o‘sish sur’ati 1,3 foizni tashkil etgan. Dastlabki olti oyda ular tomonidan 76,1 million AQSH dollari miqdorida mahsulot (tovar va xizmatlar) eksport qilinishiga erishilgani ham muhim sanaladi. Bu boradagi ko‘rsatkich 2017 yilning mos davriga nisbatan 48,7 million AQSH dollari yoki 177,7 foizga ko‘p ekanini ta’kidlash zarur. Viloyat umumiy eksporti hajmining 50,2 foizi, ya’ni yarmidan ziyodi shu turdagi mulkchilik shakliga ega subyektlar vakillariga tegishli ekani ham e’tiborga molik.

Bundan tashqari, ushbu muddat davomida vohamizda avtomobilda yuk tashishning 85,6 foizi, yo‘lovchi tashishning 95,2 foizi kichik tadbirkorlik subyektlari vakillari tomonidan ta’minlangan. Faqat bir yo‘nalishda eng past ko‘rsatkich kuzatilgan: 336,8 milliard so‘mlik investitsiya o‘zlashtirilgan, xolos. Bu kichik raqam bo‘lib, viloyat bo‘yicha amalga oshirilgan jami investitsiyalarning atigi 8 foiziga teng. Biroq ilgarigi statistika bilan solishtirsak, samaradorlik (129,4 foiz) ancha yuqori ekani ko‘rinadi.

Yana bir jihati, o‘tgan fursatda kichik tadbirkorlik subyektlari ravnaqi miqyosiga qarab vohamizda ishbilarmonlik muhiti sifatiga ham baho berish mumkin. Xo‘sh, ayni paytda soha vakillari uchun yaratilgan shart-sharoit qay darajada qulay va maqbul? Tadbirkorlar mavjud ahvoldan mamnunmi?

Buni ham statistika ko‘rsatib berdi. Faqat shu olti oyni qamrab olsak, ushbu davrda viloyatimizda 1578 ta yangi kichik korxona va mikrofirma (fermer va dehqon xo‘jaliklarisiz) tashkil topgani guvohi bo‘lamiz. Solishtirma nisbat esa 123,9 foizga yetgan. Ma’lum bo‘ladiki, fuqarolar soha istiqboliga ishonch bilan boqishmoqda, qo‘rqmay biznesga sarmoya yo‘naltirishmoqda. Yangi subyektlarning eng ko‘pi (17,4 foizi) savdoda faoliyat boshlagan. 15,9 foizi esa o‘z omadini sanoat tarmog‘ida sinab ko‘rgan. Qurilish sohasida ularning 13,9 foizi faol ish yuritmoqda. 16,3 foiz yangi subyekt qishloq, o‘rmon va baliq xo‘jaligiga mablag‘ tikkan. Yashash va ovqatlanish (4,4 foiz), tashish va saqlash (2,5 foiz) sohalaridagi ishtirok eng kam ulushni tashkil qilgan.

Viloyat statistika boshqarmasi ma’lumotida hududlar bo‘yicha har ming kishiga nechta kichik tadbirkorlik subyekti to‘g‘ri kelishi taqsimoti ham keltirilgan. Bu borada yetakchilikni Mirishkor (18,8 ta), Shahrisabz (18,2 ta), Kitob (18,2 ta) tumanlari qo‘lga kiritgan. Chiroqchi va G‘uzor tumanlarida esa har ming kishiga mos ravishda 9 va 8,9 ta mazkur mulkchilik shaklidagi subyekt to‘g‘ri keladi. Eng yomon natija esa Shahrisabz shahriga nasib etgan. Bu hududda kichik tadbirkorlikning aholi jon boshiga miqdori (8 ta) nisbatan past ekani ko‘zga tashlanadi. Bundan esa Shahrisabz shahri ahlining turli tovar va xizmatlarga bo‘lgan ehtiyoji mahalliy tadbirkorlik subyektlari tomonidan qoplanishi darajasi qoniqarsiz degan xulosaga kelish mumkin. Demak, iste’mol bozorining katta qismini chetdan keltirilgan yoki import mahsulotlar, xizmatlar egallab olgan. Bu borada ishbilarmonlarga taklif berish, yangi ishlab chiqarish quvvatlari, maishiy shoxobchalarni ko‘paytirish maqsadga muvofiq bo‘ladi.

Ayni birlikning viloyat bo‘yicha olingan ko‘rsatkichi ham hech kimni befarq qoldirmasligi aniq. Vohamizda har ming kishi boshiga hisoblaganda, tegishli birlikda 13,2 ta kichik tadbirkorlik subyekti faoliyat ko‘rsatayotgani ayon bo‘ladi. 2016-va 2017-yilning mos davrlarida esa ushbu ko‘rsatkich tegishlicha 11,7 va 12,5 taga teng bo‘lgan.

Yarim yillikda kichik tadbirkorlikning turli sohalardagi ulushi holatini hududlar kesimida ko‘rib chiqsak, foydadan xoli bo‘lmaydi. Hududlar bo‘yicha sanoatda tarmoqning eng yuqori ishtiroki Kitob tumanida qayd etilgan. Ushbu hududdagi kichik tadbirkorlik subyektlari hozirgi vaqtda sanoat mahsulotlarining 100 foizini yetkazib berayapti. Shu yo‘nalishda yuqori samaradorlik Yakkabog‘ (87,5 foiz) va Chiroqchi (83,5 foiz) tumanlarida ham kuzatilgan. Aksincha, Kasbi (23,2 foiz), Koson (23,4 foiz), Qarshi (23,2 foiz), Mirishkor (20,9 foiz) tumanlarini bu borada qoloq deyish mumkin. Ulardan ham farqli ravishda, Muborak (1,4 foiz), G‘uzor (2.2 foiz), Nishon (4,8 foiz) hamda Dehqonobod (10,6 foiz) tumanlarida kichik tadbirkorlik subyeklarining hududiy sanoatdagi salmog‘i u qadar sezilmaydi. Sabab esa ushbu tumanlarning aksarida yirik sanoat korxonalarining joylashganidir. Ammo bu natija past ekaniga bahona bo‘la oladimi? Bu xususda esa keyinroq.

E’tiborlisi, deyarli barcha hududlarda kichik tadbirkorlik subyektlari qurilish sohasida o‘zini to‘laqonli ko‘rsatib ulgurgan. Bu jabhada ularga yirik raqobatchilar yo‘q hisobi. Hatto Dehqonobod, Qamashi, Mirishkor, Shahrisabz tumanlarida amalga oshirilgan bunyodkorlik ishlarida to‘liq ushbu tarmoq vakillari ishtirok etgani ham barchasini ifodalab turibdi. Xizmatlar tarmog‘ida ham deyarli shu ahvol. Xizmat ko‘rsatish sohasida kichik tadbirkorlik subyektlarining ulushi yuqoriligi bo‘yicha ilg‘or hududlar sirasiga Chiroqchi (99,5 foiz), Qamashi (99,1 foiz), Nishon (98,6 foiz), Mirishkor (98,6 foiz) va Koson (98,1 foiz) tumanlarini kiritish mumkin.

Shu o‘rinda kichik tadbirkorlik subyektlarining sohalar bo‘yicha mahsuldorligini hududlar kesimida ham tahlil etsak. Bu esa mavjud imkoniyatlar va salohiyatni yanada aniqlashtirishga imkon beradi. Birinchi yo‘nalish sifatida sanoat sohasini tanlaymiz. Mazkur mulkchilik shaklidagi subyektlar tomonidan sanoat mahsulotlari ishlab chiqarilishi bo‘yicha mutlaq yetakchi hudud Qarshi shahri hisoblanadi. Tegishli raqam 455 milliard so‘mga yetgan va o‘tgan davrga nisbatan 102 foizga oshgan. Keyingi o‘rinlarda Kitob (115,3 milliard so‘m) va Shahrisabz tumanlari (89,1 milliard so‘m) borayapti. G‘uzor (29,5 milliard so‘m), Dehqonobod (18,7 milliard so‘m), Muborak (26,9 milliard so‘m), Nishon (30,2 milliard so‘m) tumanlarida bu boradagi ko‘rsatkichlar ro‘yxatdagi eng yomoni.

Har holda bu hududlarda kichik biznesning sanoat tarmog‘iga tuzuk integratsiyalasha olmayotganiga yirik korxonalarning daxli bo‘lmasa kerak. Har ikkisining yo‘rig‘i, yo‘nalishi boshqa, albatta. Bu tumanlar mutasaddilari o‘zlaridagi yirik sanoat korxonalari natijalari bilan havolanib, kichik tadbirkorlikni rivojlantirish masalasini bir chetga surib qo‘ygandek, tasavvur uyg‘otadi kishida. Bo‘lmasa, ayni yo‘nalishda Qarshi shahridan qariyb 25 barobar kam mahsuldorlik ko‘rsatgan Dehqonobod tumaniga kichik sanoat quvvatlarini ko‘paytirishga nima xalal beradi? Bu borada jiddiy bosh qotirish, kelgusida kichik biznes subyektlariga ko‘proq taklif berish, ko‘ringan har bir tashabbusni darhol ro‘yobga chiqarish chorasini ko‘rish lozim, fikrimizcha.

O‘z navbatida Qarshi shahridagi kichik tadbirkorlik chakana savdo aylanmasi hajmi bo‘yicha ham hududlar orasida birinchilikni egallagan. Tegishli miqdor 803,6 milliard so‘mga yetgan. Koson (412,7 milliard so‘m), Chiroqchi (363 milliard so‘m) va Qamashi (300,6 mililard so‘m) tumanlari ham bu boradagi natijalari bilan maqtana oladi. Hududlar bo‘yicha tarmoq subyektlari tomonidan eng ko‘p xizmatlar ham Qarshi shahri (756,9 milliard so‘m), Koson (177,4 milliard so‘m) va Chiroqchi (145,9 milliard so‘m) tumanlarida ko‘rsatilgan. Biroq Mirishkor (60,3 milliard so‘m) va Kasbi (67,5 milliard so‘m) tumanlarida xizmatlar sohasiga kichik tadbirkorlik subyektlarini faol jalb qilish yuzasidan ancha ish olib borish kerak ko‘rinadi. Ko‘rsatkichlar ham shunga ishora qilayapti.

Bir so‘z bilan aytganda, biznesning bu shakli bozor sharoitiga ancha moslashuvchan, keladigan xavf ko‘lami ham kichik, aksincha bu tarmoqda faoliyat yuritib ko‘proq daromad topish imkoniyati keng. Bu esa aholini tadbirkorlik qilishga undayotgan asosiy jihatdir. Tabiiyki, ishbilarmon ko‘payishi bozorlar to‘kinligini ta’minlashga xizmat qiladi. Odamlarga doimiy daromad manbai yaratilishi esa turmush farovonligini oshirishga sharoit hozirlaydi. Mamlakatimizda hududlar iqtisodiyotini ko‘tarishga erishishning muhim sharti sifatida kichik tadbirkorlikni jadal rivojlantirishga ustuvor ahamiyat qaratilayotgani sababi ham shunda.

Prezidentimiz Shavkat Mirziyoyev raisligida 5-iyun kuni hududlarda byudjetga qo‘shimcha tushumlar va mahsulot ishlab chiqarish hajmini ko‘paytirish orqali narxlar barqarorligini ta’minlash hamda inflyatsiyaning oldini olishda mahalliy ijro hokimiyati organlari, soliq va moliya idoralari rahbarlarining shaxsiy mas’uliyati va javobgarligini oshirish masalalariga bag‘ishlangan videoselektor yig‘ilishi bo‘lib o‘tgandi. Ahamiyatlisi, ushbu yig‘ilishda viloyatimiz bo‘yicha joriy yilda byudjetga qo‘shimcha 696 milliard so‘m tushirish belgilandi.

 

Buning uchun mavjud ichki resurslarni ishga solish, soliq tushumlarining o‘z vaqtida to‘lanishini ta’minlash, qonuniy tadbirkorlikni qo‘llab-quvvatlash ko‘zlangan. Majburiy ijro byurosi bilan hamkorlikda jismoniy va yuridik shaxslarning soliqlardan mavjud qarzlarini undirish ushbu yo‘nalishdagi ishlardan yana biridir.

Shu maqsadda joylarda zarur choralar amalga oshirilmoqda. Qarshi shahrida o‘tkazilgan o‘rganish davomida shu narsa aniqlandiki, hududdagi “Eski anhor kanali qurilishi” mas’uliyati cheklangan jamiyatining soliqlardan qarzdorligi 64 million so‘mdan ortiqni tashkil etmoqda. Viloyat davlat soliq boshqarmasi va Majburiy ijro byurosi bilan hamkorlikda olib borilgan tadbir davomida jamiyatga tegishli avtomashinalar xatlab olindi. Jamiyat rahbari tomonidan shu kunning o‘zida soliq qarzi to‘liq to‘lab berildi.

Xatlov tadbirlari davomida Qarshi shahridagi 25-29-sonli Davlat unitar avtojamlanmasining soliqlardan mavjud 466 million so‘mlik qarzini undirish maqsadida ushbu korxonaga borildi. 2-3 yildan beri kechiktirib kelinayotgan qarz ado etilmagach, avtojamlanmaga tegishli 3 ta avtobus xatlab olindi.

Davlat soliq xizmati organlarida soliq hisobida turmasdan noqonuniy tadbirkorlik faoliyati bilan shug‘ullanayotgan jismoniy shaxslarni davlat ro‘yxatidan o‘tkazish ham bu boradagi muhim yo‘nalishlardan biri hisoblanadi.Shu maqsadda noqonuniy biznes yuritayotgan fuqarolar o‘rtasida tushuntirish ishlari olib borildi. Natijada birgina joriy yilning o‘tgandavri mobaynida jami 1213 nafar fuqaro yakka tartibdagi tadbirkor sifatida o‘z ixtiyori bilan ro‘yxatdan o‘tkazilishiga erishildi. 694 nafar yakka tartibdagi tadbirkor faoliyati esa qayta tiklandi. Shuningdek, 369 nafar fuqaro yollanma ishchi sifatida ro‘yxatga olingan. Ko‘rinadiki, mazkur ta’sirchan chora-tadbirlar samarasida soliq to‘lovchilar soni ko‘payishi ta’minlandi.

- Yaqinda ro‘yxatdan o‘tib, faoliyatimni qonuniy yo‘lga qo‘ydim. Endi xotirjam ishlab daromadimni orttirib boraman, - deydi Qarshi shahridagi “Yerqo‘rg‘on Naxshab sohil bo‘yi” buyum bozorida savdo qilayotgan yakka tartibdagi tadbirkor Nigora Ergasheva. - Kelgusida qo‘shimcha ish o‘rinlari yaratishni ham rejalashtirganman.

- Yurtimizda tadbirkorlarga yaratilayotgan sharoitlardan foydalanib tadbirkorlik faoliyatini boshlagan edim. Shukurki, ishim rivojlanib,faoliyatim kengayib bormoqda. Bu ish bir o‘zimga og‘irlik qilib qoldi. Shu sabab bir nafar ishchini yollanma ishchi sifatida ro‘yxatdan o‘tkazdim, - deydi “Qarshi buyum savdo” kompleksida faoliyat ko‘rsatayotgan tadbirkor Jahongir Xudoyberdiyev.

Byudjetga qo‘shimcha mablag‘ tushirish bo‘yicha boshqa yo‘nalishlarda ham ishlar faol amalga oshirilmoqda.

Firdavsiy JABBOROV,

viloyat davlat soliq boshqarmasi bo‘lim boshlig‘i

 

Bugun ichki bozorlarda paxta chigiti, bug‘doy, arpa, makkajo‘xori doni, guruch uvog‘i kabi mahsulotlarning ikkilamchi chiqiti asosida tayyorlangan yem turlari ko‘p. Biroq, bu mahsulotlar samaradorlik jihatdan chorvachilik, parrandachilik, baliqchilik bilan professional tarzda shug‘ullanayotgan oilalar yoki tadbirkorlik subyektlarini qanoatlantirmaydi. Ularga har bir turdagi jonivorlarning oziqlanish ratsionidan kelib chiqib maxsus tayyorlangan, barcha turdagi vitaminlar va minerallar bilan boyitilgan omixta kerak.

Qarshi shahrida yangi faoliyat boshlagan “Mastrokgarant” mas’uliyati cheklangan jamiyati ana shunday yem mahsulotlari ishlab chiqarishga ixtisoslashgan.

- Faoliyat boshlashdan avval bozorni o‘rgandik, - deydi jamiyat ta’sischisi Bahriddin Murtozayev. - So‘nggi yillarda yurtimizda, shu jumladan, viloyatimizda ham sanoat usulida chorva, parranda, quyon va baliq yetishtirish ko‘lami ortib bormoqda. Ushbu xo‘jaliklarda maxsus tayyorlanadigan yemga talab bor. Chunki, kutilgan darajada go‘sht, sut yoki tuxum olish uchun ozuqa ham shunga mos, tarkibida jonivorlarningsog‘lom rivojlanishi uchun zarur bo‘lgan barcha elementlar bo‘lishi kerak. Shundan kelib chiqqan holda, boyitilgan omixta yem ishlab chiqarish loyihasini amalga oshirishga kirishdik.

Tadbirkorning bu boradagi sa’y-harakatlari samarasi o‘laroq, Rossiyaning “Dozaagro” kompaniyasidan qiymati 1 milliard 360 million so‘mni tashkil etadigan zamonaviy texnologiyaxarid qilingan. Ushbu texnologiya bir oyda 450 tonna omixta tayyorlash imkonini beradi.

- Korxonamizda ishlab chiqarish jarayoni bir necha bosqichni o‘z ichiga oladi, - deydi korxona ish boshqaruvchisi Anvar Avazov. - Avvalo tayyorlanayotgan ozuqaning nima uchun mo‘ljallanayotganidan kelib chiqib, maxsus ratsion asosida barcha zarur mahsulotlar, vitamin va boshqa elementlar yig‘iladi. Shundan so‘ng maxsus uskunada ularning tarkibi zararli bakteriya va mikroblardan to‘liq tozalanadi. Xomashyo yana bir marotaba laboratoriya tekshiruvidan o‘tkazilgach, ezilib aralashtiriladi. So‘ng aralashma qaysi turdagi jonivor uchun tayyorlanganiga qarab, ularga berish uchun qulay shaklga keltiriladi va qoplarga joylanadi.

Tadbirkorning ta’kidlashicha, ayni damda korxonada ishlab chiqarilayotgan omixta yem ichki bozorda sotilmoqda. Shu bilan birgalikda, qo‘shni Turkmaniston, Tojikiston va Afg‘oniston mamlakatlari tadbirkorlari bilan ham mahsulot yetkazib berish borasida muzokaralar olib borilayapti.

Chorshanba, 06 Iyun 2018 00:00

Xususiylashtirilgan davlat mulki obyektlari

Avtor

    Chiroqchi tumanida bir vaqtlar savdo va xizmat ko‘rsatish faoliyati bilan shug‘ullangan davlat tashkiloti tugatilgach, unga qarashli bino va inshootlar bo‘shab qolgandi. Strategik ahamiyatga ega bo‘lmagan boshqa obyektlar qatori ushbu ishlab chiqarish maydoni ham davlat tasarrufidan chiqarilib, xususiy mulkdor qo‘liga berildi. Mazkur amaliyotdan ko‘zlangan maqsad esa yurtimizda kichik biznes va xususiy tadbirkorlikni qo‘llab-quvvatlash, ishbilarmonlarni ko‘paytirishdan iborat edi. Dastlabki vaqtda bu yaxshi samara berdi ham. Ammo bir muddat o‘tib, ushbu quvvatlarda mahsuldorlik pasayishi, ba’zan butkul harakatdan to‘xtash holati kuzatildi.

Tabiiyki, unumli foydalanilmayotgan bunday obyektlardan jamiyatga, iqtisodiyotimizga foyda tegmaydi. Bu boradagi ishlar natijadorligini tubdan oshirish maqsadida davlatimiz rahbarining 2017-yil 23-fevraldagi “Tadbirkorlarning ishlab chiqarish maydonlaridan foydalanishlarini yanada rag‘batlantirish chora-tadbirlari to‘g‘risida”gi qarori qabul qilindi. Unga ko‘ra, bunday ishlab chiqarish maydonlari va qurilishi tugallanmagan obyektlarni zudlik bilan tadbirkorlik faoliyatiga jalb etish bo‘yicha ta’sirchan mexanizm joriy etildi.

Buning samarasini o‘sha yuqorida qayd etilgan obyekt misolida ham ko‘rish mumkin. Uning mulkdori - “Usta Xushvaqt karvoni” mas’uliyati cheklangan jamiyati tomonidan mazkur bino-inshootni maqsadli ishlatish bo‘yicha investitsiya loyihasi ilgari surildi. Mulk negizida esa tadbirkorlik faoliyati yo‘lga qo‘yildi. Ya’ni obyekt to‘liq rekonstruksiya qilinib, uning o‘rnida zamonaviy savdo majmuasi ishga tushirildi. Natijada yangi ish o‘rinlari yaratildi, shuningdek, hudud byudjetiga qo‘shimcha tushum keltiruvchi subyekt yana bittaga ko‘paydi.

Xususiylashtirilgan korxonalarga ko‘maklashish va raqobatni rivojlantirish davlat qo‘mitasi viloyat hududiyboshqarmasidan olingan ma’lumotlarga ko‘ra, ayni vaqtga qadar viloyatimizdagi 4137 ta davlat ko‘chmas mulki va qurilishi tugallanmagan obyektlar xususiylashtirilgan. Shuning 1980 tasida xo‘jalik faoliyati tashkil etilgan, ya’ni ulardan maqsadli foydalanilmoqda. 1849 obyekt va korxona esa buzib tashlangan. Prezidentimizning tegishli qarori talablari asosida o‘tkazilgan o‘rganish natijasida shu narsa ma’lum bo‘ldiki, xususiy sektor vakillariga mulk qilib berilgan 308 ta obyekt bir muddat faoliyatsiz bo‘lgan yoki past quvvat bilan ishlagan.

Shu o‘rinda savol tug‘ilishi mumkin: nega shu paytgacha xususiy mulkdorlar o‘z egaligidagi bu obyektlardan samarali foydalanmagan? Tahlillarga ko‘ra, bu bir nechta omilga bog‘liq bo‘lgan. Mavjud imkoniyatni ishga solish uchun mulkdorda zarur mablag‘ yoki ishbilarmonlik qobiliyati yetishmagan. Ba’zilari bozor sharoitiga moslasha olmagan. Tadbirkorlikni rivojlantirishga hafsalasizlik bilan qaraganlar ham bo‘lgan. Natijada shunday katta resurs bo‘lgani holda undan samarali foydalanish darajasi qoniqarsizligicha qolgan.

“Usta Xushvaqt karvoni” MCHJga qarashli savdo majmuasi

Yangi tartibga asosan, mana shunday korxona va obyektlarni xo‘jalik faoliyatiga darhol jalb qilish, ularning mulkdorlariga muammolarini bartaraf etishda yaqindan yordam berish, pirovardida joylarda yuqori ishlab chiqarish quvvatlarini ishga tushirish bo‘yicha aniq chora-tadbirlar belgilandi. Hozirda qo‘llanayotgan mexanizm ilgari davlat mulkini xususiylashtirib olgan, ammo bugungi kundaishlab chiqarishni tashkil etishda muammo hamda to‘siqlarga duch kelayotgan mulkdorlarni qo‘llab-quvvatlash, ularga amaliy yordam ko‘rsatishga keng imkoniyat yaratdi. Buning samarasida qo‘shimcha ish o‘rinlari yaratish, iste’mol bozorini xaridorgir mahsulot va xizmatlar bilan to‘ldirish uchun zamin hozirlandi.

- Ushbu 308 ta faoliyatsiz turgan obyektdan 87 tasining har biri 2000 kvadrat metrdan ortiq ishlab chiqarish maydoniga ega, - deydi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi viloyat hududiy boshqarmasi bo‘lim boshlig‘i Ulash Mardayev. - Bu muvaffaqiyatli biznes boshlash uchun katta qulaylik degani. Mulkdorlar bilan bu borada zarur tushuntirish ishlari olib borildi. Tadbirkorlik ko‘nikmasiga ega bo‘lmagan kishilar tegishli yo‘nalishda o‘qitildi, sohadagi yengilliklar bilan tanishtirildi. Natijada 180 ta obyekt egasi bilan hamkorlikda xo‘jalik faoliyatini yo‘lga qo‘yish yuzasidan istiqbolli investitsiya loyihalari ishlab chiqildi. Tasdiqlangan tarmoq jadvaliga ko‘ra, joriy yil davomida obyektlarga 90 milliard 489 million so‘m va 16,9 million AQSH dollari miqdorida mulkdorlarning o‘z mablag‘i, 10,7 million AQSH dollari va 145 milliard 945 million so‘m miqdorida bank krediti yo‘naltirish ko‘zda tutildi. Loyihalarning samarali ro‘yobga chiqishi 2100 nafardan ziyod kishini ish bilan ta’minlash imkonini beradi.

Mutasaddining ta’kidlashicha, ushbu tashabbuslarni o‘z vaqtida amalga oshirish uchun allaqachon ishlar boshlab yuborilgan. 1-iyun holatini qaraydigan bo‘lsak, xususiylashtirilgan ushbu obyektlarda ish boshlash uchun mulkdorlarning 27 milliard 88 million so‘m o‘z mablag‘i, 27 milliard 595 million so‘m va 783 ming AQSH dollari miqdorida moliyaviy ko‘mak jalb etilgan. Bir qancha loyihalar tez fursatda amalga oshishi natijasida 210 yangi ish o‘rni yaratilishi ta’minlangan. Bugungi kunda 18 ta obyektda xo‘jalik faoliyati tiklanib, mahsulot ishlab chiqarish va xizmat ko‘rsatishga kirishilgan.

Qarshi shahridagi “Zarmast shifo” xususiy korxonasi tomonidan ham davlat mulki hisoblangan bino biroz avval xususiylashtirib olingandi. Unga qarashli obyektning foydali maydoni 2000 kvadrat metrdan oshadi. Qaror talablaridan kelib chiqib, mulkdor tadbirkorlik faoliyati bilan shug‘ullanishga qat’iy ahd qildi, investitsiya loyihasini taklif etdi. Yangi quvvatning asosiy faoliyat yo‘nalishi ham belgilandi - tibbiy xizmat ko‘rsatish. Loyiha qiymati esa 3 milliard 400 million so‘mni tashkil qildi.

- Shuning 1 milliard 500 million so‘mi o‘z mablag‘imiz bo‘lsa, qolgani tijorat banki tomonidan ajratilgan kredit hissasiga to‘g‘ri keladi, - deydi korxona bosh hisobchisi Murod Yo‘ldoshev.- Tadbirkorlikning aynan shu turini tanlaganimiz ham bejiz emas. Chunki hozirgi vaqtda yurtimizning ushbu sohasida xususiy sektor ishtiroki faol rag‘batlantirilmoqda, ishbilarmonlarga bir qator imtiyozlar berilgan. Shu sabab eski bino o‘rnida zamonaviy xususiy klinika bunyod etib, yaqinda foydalanishga topshirdik. Bu yerda davolash va tashxislash ishlari amalga oshirilayapti. Har bir bo‘lim zamonaviy tibbiyot uskunalari bilan jihozlangan, malakali mutaxassislar jalb qilingan. Statsionar tartibda bir vaqtning o‘zida 70 bemorni davolash imkoniga egamiz. Klinika qoshida dorixona ham ochdik. Faoliyatimizni yo‘lga qo‘ygach, 40 nafarga yaqin kishi ish bilan ta’minlandi.

 

 

“Zarmast shifo” XKga qarashli klinika

Qayd etish joiz, so‘nggi yillarda mamlakatimizda xususiylashtirilgan korxonalarga ko‘maklashish ishlari sifat jihatidan yangi bosqichga ko‘tarildi. Bu borada mas’ul tashkilotlarga aniq vazifalar yuklandi. Bunday mulkdorlarni har jihatdan qo‘llab-quvvatlash bo‘yicha samarali tizim yo‘lga qo‘yildi. Kezi kelganda, ularga tashkiliy, moliyaviy, xullas, barcha zarur yordam ko‘rsatilmoqda. Fikrimiz isboti o‘laroq, aniq misolga murojaat qilamiz.

Nishon tumanida faoliyat ko‘rsatayotgan “Kino-video” mas’uliyati cheklangan jamiyati bundan ikki yil avval hududdagi eski bino - kinoteatrni o‘z egaligiga qabul qilib olgandi. Tadbirkor undan foydalanish bo‘yicha bir qancha rejalarni o‘ylagan, biroq moddiy qurbi yetmasligi boisidan ularni hayotga tatbiq etolmayotgandi. Ishbilarmonga tijorat banki tomonidan imtiyozli kredit taqdim etildi. Ushbu moliyaviy ko‘mak esa tegishli qo‘mita qoshida tashkil etilgan Xususiylashtirilgan korxonalarga ko‘maklashish jamg‘armasi mablag‘i hisoblanadi.

- Shundan so‘ng loyihamizda ko‘rsatilgan hamma yo‘nalishlarni ishga tushirishga kirishdik, - deydi tadbirkorlik subyekti rahbari Xolnazar Turopov. - Buning uchun jami 650 million so‘m sarmoya sarflayapmiz. Kinoteatrni turli ko‘ngilochar tadbirlar o‘tkazish uchun mo‘ljallangan maskanga aylantirdik. Ushbu binoda konsertlar, madaniy-ma’rifiy dasturlarni namoyish etish mumkin. Qolaversa, qo‘shimcha shoxobchalar ham ish boshladi. Mo‘jazgina tikuvchilik sex barpo etdik. 10 nafarga yaqin xotin-qiz mehnat qilayotgan mazkur dargohda 15 xildan ko‘p tikuvchilik mahsuloti tayyorlanmoqda. Ularning realizatsiyasini ham boshlab yuborganmiz. Shuningdek, liboslar saloni, oshxona faoliyat ko‘rsatayapti. Tez orada savdo do‘koni foydalanishga tayyor bo‘ladi. Natijada jami 40 nafar kishining bandligi ta’minlanadi.

Ta’kidlash o‘rinliki, tegishli qarorda investitsiya loyihasini amalga oshirmaganligi to‘g‘risida xulosa olgan mulkdorlar bir qator imtiyozlardan mahrum etiladi. Jumladan, xususiy mulk qilib berilgan qurilishi tugallanmagan va foydalanilmayotgan ishlab chiqarish maydonlari shu vaqtga qadar soddalashtirilgan soliqqa tortilgan bo‘lsa, keyingi oydan boshlab mulkdorlar umumo‘rnatilgan tartibdagisoliqlar hamda boshqa majburiy to‘lovlarni to‘lashga o‘tkazilib, egaligidagi obyekt uchun mulk va yer soliqlarini ikki baravar miqdorda, olti oy o‘tgandan keyin 5 baravar, 1 yildan so‘ng va keyinchalik 10 baravar miqdorda to‘laydi.

“Kino-video” MCHJga qarashli majmua

Boshqarmadan olingan ma’lumotga qaraganda, ayni paytda 84 ta korxona va obyekt mulkdorlari biznes loyiha taqdim qilmagan va loyihalarni amalga oshirmagan. Ushbu yuridik shaxslarni umumo‘rnatilgan tartibdagi soliqlar hamda boshqa majburiy to‘lovlarni to‘lashga o‘tkazish bo‘yicha viloyat Davlat soliq boshqarmasiga taqdimnoma yo‘llangan. 2018-yil 15-may holatiga ko‘ra, tegishli tartib asosida 34 ta obyekt mulkdoriga nisbatan 2 milliard 798,8 million so‘m soliq hisoblangan va 1 milliard 141,4 million so‘m undirilgan.

Xulosa o‘rnida aytganda, ilgari xususiylashtirilgan qurilishi tugallanmagan obyektlar va faoliyatsiz ishlab chiqarish maydonlaridan foydalanish samaradorligini oshirishga qaratilgan tadbirlardan aniq maqsad ko‘zlangan. Avvalo, bu borada muammo hamda to‘siqlarga duch kelayotgan mulkdorlarni qo‘llab-quvvatlash, ularga amaliy yordam ko‘rsatish, shu orqali faoliyatsiz korxonalarni tadbirkorlik faoliyatiga jadal jalb qilish dolzarb masala sifatida qo‘yilgan bo‘lsa, mavjud imtiyozlardan samarasiz foydalanib kelayotgan ilgari xususiylashtirilgan davlat mulki egalarini harakatga keltirish ham bunda ko‘zda tutilgan. Natija esa joylarda zamonaviy ishlab chiqarishlar tashkil qilinishi va shu asnoda yangi ish joylari barpo etilishida namoyon bo‘lmoqda.

 

Mamlakatimizda tadbirkorlarni har tomonlama qo‘llab-quvvatlash, ularning faoliyatiga asossiz aralashishlarga barham berish masalasiga davlat siyosati darajasida e’tibor qaratilmoqda.

 

 So‘nggi uch yil davomida qabul qilingan normativ-huquqiy hujjatlar bilan tanishadigan bo‘lsak, bunga yana bir bor amin bo‘lamiz. Birgina misol, to‘g‘ridan to‘g‘ri tekshirishlar o‘rniga tadbirkorlik subyektlari faoliyatining kameral nazorati samaradorligi oshirildi. Bu orqali kelgusida yo‘l qo‘yilishi mumkin bo‘lgan qonunbuzilish holatlari oldini olish maqsad qilingan.

 

Soliq kodeksining 70-moddasiga asosan, kameral nazorat deganda, soliq to‘lovchi tomonidan belgilangan tartibda taqdim etilgan moliyaviy va soliq hisobotini, shuningdek, soliq to‘lovchining faoliyati to‘g‘risida davlat soliq xizmati organidagi mavjud boshqa hujjatlarni o‘rganish hamda tahlil etish asosida amalga oshiriladigan nazorat tushuniladi. Kameral nazorat soliq to‘lovchining huzuriga bormasdan davlat soliq xizmati organi joylashgan yerda amalga oshiriladi.

 

Agar davlat soliq xizmati organi tomonidan kameral nazorat jarayonida soliq hisobotini to‘ldirishda xatoliklarga yo‘l qo‘yilgani yoki taqdim etilgan soliq hisobotidagi va davlat soliq xizmati organlaridagi ma’lumotlar o‘rtasida ziddiyatlar borligi aniqlansa, bu haqda soliq to‘lovchiga tegishli tuzatishlar kiritish talab qilingan yozma shakldagi xabar yo‘llanadi.

 

Shunga muvofiq, joriy yilning birinchi choragi davomida viloyatdagi hisobot topshirish majburiyatiga ega  29 ming 550 dan ortiq xo‘jalik yurituvchi subyektlar faoliyati kameral nazoratdan o‘tkazilgan. Tahlillar natijasiga ko‘ra, 23 ming 180 xo‘jalik yurituvchi subyekt faoliyati shubhali deb topilgan. O‘tkazilgan kameral nazorati natijasida esa ba’zi qonunbuzilish holatlari aniqlanib, tegishli subyektlarga jami 24 milliard 593 million so‘mlik qo‘shimcha soliqlar hisoblandi. 

 

Masalan, Qarshi shahrida faoliyat ko‘rsatayotgan “ZARAFSHON EKO” xususiy korxonasining 2016-2017-yillar mobaynidagi moliyaviy xo‘jalik faoliyatida soliq qonunchiligiga rioya etilishi yuzasidan kameral nazorati o‘tkazildi. Korxona mutasaddilari yagona soliq to‘lovi hisobotlarida yalpi tushumni kamaytirib ko‘rsatgan. Oqibatda esa budjet hisobiga undirilishi lozim bo‘lgan 3 milliard 100 million so‘mlik yagona soliq to‘lovi hisoblanmasdan qolgan.

 

Bunday holatda soliq to‘lovchi aniqlashtirilgan soliq hisobotini taqdim etish uchun nazarda tutilgan tartibda tegishli soliqlar va boshqa majburiy to‘lovlar bo‘yicha tuzatilgan soliq hisobotini yoxud aniqlangan tafovutlarning asosini talabnoma olingan kundan e’tiboran o‘n kunlik muddatda taqdim etishi shart. Holat qonuniy jihatdan asoslangach, “ZARAFSHON EKO” xususiy korxonasi tomonidan budjetga  3 milliard 100 million so‘m to‘lab berilishi ta’minlandi.

 

Soliq kodeksining 120-moddasida soliqlar va boshqa majburiy to‘lovlarning to‘lov muddatlarini buzish to‘lovning belgilangan keyingi kundan e’tiboran muddati o‘tkazib yuborilgan har bir kun uchun 0,033 foiz miqdorida penya hisoblashga sabab bo‘ladi, deya qayd etilgan. Shundan kelib chiqib, korxonaga 96 million 200 ming so‘m penya ham hisoblandi.  

 

Xulosa qilib aytganda, kameral nazoratini o‘tkazish  soliq to‘lovchilar tomonidan soliq qonunchiligi talablari buzilishiga yo‘l qo‘ymaslik va kelgusida ularga nisbatan qo‘llanilishi mumkin bo‘lgan ta’sir choralarining oldini olishga xizmat qiladi. 

 

Firdavsiy JABBOROV,  viloyat Davlat soliq boshqarmasi jamoatchilik bilan aloqalar va huquqiy axborot bo‘limi boshlig‘i

Amerikaning “Honeywell” kompaniyasi asosan elektron boshqaruv va avtomatlashtirish tizimlarini ishlab chiqaradi. Ushbu gigant o‘z yo‘nalishida dunyoda yetakchi hisoblanadi. Ana shu kompaniya yaqin istiqbolda yurtimiz bozoriga kirishni maqsad qilgan. Aniqroq aytganda, mazkur subyekt bugungi kunda mamlakatimizga chetdan katta hajmda import qilinayotgan mahsulot – gaz analizatorlarni qiyoslash uchun foydalaniladigan gaz aralashmasini viloyatimizda ishlab chiqarishni yo‘lga qo‘ymoqchi.

 

Ahamiyatlisi, biroz avval kompaniyaning Rossiya Federatsiyasidagi distribyutori rasmiy vakillari yurtimizdagi investitsiya muhiti, xorijiy sarmoyadorlarga yaratib berilgan shart-sharoitlar bilan yaxshiroq tanishish maqsadida vohamizga kelishdi. Mehmonlar viloyat sinov va sertifikatlashtirish markaziga taklif qilindi. Shu munosabat bilan markazda tadbir tashkil etilib, unda kompaniya mutaxassislariga hududda biznes yuritish imkoniyatlari haqida batafsil ma’lumot berishga alohida e’tibor qaratildi.

Shuningdek, bu uchrashuvda yurtimizning neft-gaz sohasida faoliyat olib borayotgan bir qancha manfaatdor korxonalar -“Lukoyl Uzbekistan opereyting kompani” MCHJ, “Enter Engineering Pte Ltd”, “Eriyell” kompaniyasi, “Gissarneftgaz” qo‘shma korxonasi, “Muborakneftgaz”, “Sho‘rtanneftgaz, “Muborak GQZ” va “Sho‘rtan gaz kimyo majmuasi” mas’uliyati cheklangan jamiyatlari vakillari ishtiroki ham ta’minlandi.

- Ma’lumki, mamlakatimizda ichki imkoniyatlarni ishga solish hisobidan import hajmini kamaytirishga dolzarb masala sifatida qaralmoqda, - deydi viloyat sifat va sertifikatlashtirish markazi rahbari Ulug‘bek Amirqulov. – Chet el kompaniyasini hamkorlikka chorlayotganimizdan ham shu maqsad ko‘zlangan. Aytish joiz, mamlakatimizda, ayniqsa, viloyatda ishlab turgan korxonalarda gaz analizatorlarni qiyoslash uchun foydalaniladigan gaz aralashmasigatalab yuqori. Ammo ayni paytda bu subyektlar ushbu mahsulotni valyuta sarflab chetdan sotib olib kelishga majbur. Xorijiy investorlar esa bu imkoniyatdan samarali foydalanmoqchi, buning uchun zarur yuqori texnologiyaga ega. Asosiysi, mahsulotni realizatsiya qilish uchun yurtimizda xaridor bor. Kompaniya mutaxassislari ham buni e’tirof etishdi. Hozirgi paytda ular mamlakatimizda investorlar huquqlari qay darajada himoya etilganini o‘rganishmoqda. Agar ma’qul kelsa, markazimiz va tegishli kompaniya sherikchiligi asosida qo‘shma korxona barpo etish reja qilingan.

Mutasaddining bildirishicha, bugungi kunda mazkur loyihani ro‘yobga chiqarish bo‘yicha muzokaralar davom etmoqda. Xorijiy kompaniya tomonidan ushbu sohaga katta miqdorda investitsiya kiritish mo‘ljallanayapti. Bu istiqbolli tashabbusning muvaffaqiyatli amalga oshishi kelgusida mahalliy ishlab chiqaruvchilarga qulaylik yaratishi bilan birga, viloyatimizda yangi bir quvvat vujudga kelishi asnosida qo‘shimcha ish o‘rinlari yaratilishi, import o‘rnini bosuvchi mahsulot ishlab chiqarish yo‘lga qo‘yilishi evaziga esa katta hajmda valyuta tejab qolinishiga erishilishini ta’minlaydi.

Tadbirda kompaniya vakillari o‘z faoliyati, mahsulotlari haqida ma’lumot beruvchi taqdimot bilan chiqish qilishdi. Mahalliy korxonalar mas’ul mutaxassislari ham loyihaning yuqori ijtimoiy-iqtisodiy ahamiyatga ega ekanini ta’kidlab, bu yuzasidan o‘z fikr-mulohazalarini bildirishdi.

MIRJAHON


 

shanba, 26 May 2018 00:00

HAMKORLIK ALOQALARI O‘RNATILDI

Avtor

Qashqadaryo va Ukraina Respublikasining Suma, Eron Islom Respublikasining Qazvin viloyatlari o‘rtasida qator sohalarni qamrab olgan hamkorlik aloqalari o‘rnatildi. Bunday kelishuvga mazkurhududlar ma’muriyatlari va ishbilarmon doiralaridan iborat delegatsiyalarning vohamizga amalga oshirgan tashrifi davomida kechgan samarali muzokaralardan so‘ng erishilgani ahamiyatlidir.

 

Ma’lumki, yurtimiz hududlariga xorijiy investorlarni faol jalb qilish, chet el sarmoyadorlari bilan o‘zaro manfaatli asosda turli sohalarda hamkorlikni yo‘lga qo‘yish muhim ahamiyatga ega. Shu orqali ilg‘or mamlakatlar tajribasini o‘zlashtirishga, hududlarga zamonaviy texnologiyalar kirib kelishini ta’minlashga imkoniyat paydo bo‘ladi. O‘z navbatida bu dunyo miqyosida mamlakatimiz investitsiyaviy jozibadorligi oshishiga, iqtisodiyotimizga sarmoya kiritish istagida bo‘lgan chet ellik ishbilarmonlar ko‘payishiga zamin hozirlaydi.

E’tirof etish joiz, so‘nggi vaqtda vohamizga xorijdan ishbilarmonlarning kelishi muntazamlik kasb etayapti. Ular viloyatimizda qulay biznes yuritish uchun yaratilgan shart-sharoitlar bilan tanishib, iliq taassurotlarga ega bo‘lishmoqda, o‘zaro hamkorlikda istiqbolli loyihalarni ro‘yobga chiqarish bo‘yicha kelishuvlar imzolashayotir. Avvalroq Koreya fermerlaridan iborat delegatsiya vohamizda bo‘lib, bu yerda o‘ziga xos va zamonaviy qishloq xo‘jaligi innovatsion parki barpo etish tashabbusini o‘rtaga tashlashganihaqida xabar bergandik.

Ukraina Respublikasining Suma va Eron Islom Respublikasining Qazvin viloyatlari bilan boshlanajak hamkorlik ham vohamiz xalq xo‘jaligini yanada rivojlantirishga xizmat qiladi.

- Bu Suma viloyati sarmoyadorlarining viloyatimizga ilk tashrifi bo‘lsa, qazvinlik investorlar biroz avval ham vohamizga kelishgandi, - deydi investitsiyalar bo‘yicha viloyat bosh boshqarmasi boshlig‘i Sa’dulla Boboqulov.

– Tashrif asnosida bo‘lib o‘tgan uchrashuvlar ikkala tomon uchun ham qiziqarli va samarali kechganini ta’kidlash o‘rinli. Misol uchun, Suma biznesmenlari ishtirokida dastlab viloyat hokimligida “Hududiy hamkorlik istiqbollari” mavzusida biznes-forum o‘tkazildi. Unda hamkorlik istiqbollari, galdagi rejalar muhokama qilindi. Forum doirasida ko‘rgazma ham tashkil etilib, mahalliy tadbirkorlarimiz tomonidan ishlab chiqarilayotgan keng turdagi mahsulotlar namoyish etildi. Keyinchalik Suma viloyati rahbariyati va sarmoyadorlari Shahrisabz shahri va Mirishkor tumaniga sayohat qilishdi. Bu yerda ular mavjud korxona va tashkilotlar faoliyati bilan yaqindan tanishdi. Eronlik mehmonlarga ham viloyatimiz iqtisodiy salohiyati haqida to‘liq tasavvur hosil qilish imkoniyati yaratib berildi.

Aytish joiz, tomonlar o‘rtasida imzolangan rasmiy hujjatlarda taraflar o‘zaro hamkorlikni mustahkamlash va kengaytirishdan manfaatdor ekanini bayon qilishgan. Aloqalar turizm, sport, madaniyat, san’at, ta’lim, sog‘liqni saqlash, fan-texnika, sanoat, qishloq xo‘jaligi va savdo kabi sohalarni qamrab oldi. Shuningdek, kelgusida qo‘shma loyihalarni hayotga tatbiq etish, viloyatimizda ushbu hududlar sarmoyadorlari ishtirokida zamonaviy quvvatlarni ishga tushirish ko‘zda tutilgan.

Misol uchun, Eron tomoni bilan erishilgan kelishuvda turizmni yanada ravnaq toptirish, hududlar o‘rtasida sayyohlar oqimini ko‘paytirish, ayni jabhada ikkala viloyat mutaxassislari o‘rtasida tajriba almashishni keng ommalashtirishga katta e’tibor qaratildi. Qolaversa, mazkur o‘lka ishbilarmon doiralari viloyatimizning baliqchilik, bank-moliya, qurilish, oziq-ovqat va nooziq-ovqat sanoatiga investitsiya yo‘naltirishga xayrixohlik bildirgan.

Suma viloyati ma’muriyati bilan imzolangan memorandumda ham o‘zaro hamkorlikni jadal rivojlantirishga birinchi navbatdagi vazifa sifatida qaralgan. Tomonlar sanoat, qishloq xo‘jaligi, transport va savdo kabi yo‘nalishlarda hamkorlik qilishdan tashqari eksport va importga keng yo‘l ochish, savdo uyi tashkil etish kabi masalalarni ham ko‘rib chiqadi. Shuningdek, Ukraina ishbilarmonlari bilan birga viloyatimizning Chiroqchi tumanida kichik sanoat zonasi barpo etish ham e’tiborga olingan. Bu maqsadlarda Suma viloyati biznesmenlari sarmoyasini jalb etgan holda qo‘shma korxonalar tashkil etiladi.

Xulosa o‘rnida aytganda, uzoq muddatga mo‘ljallab amalga oshirilayotgan ushbu hamkorlik aloqalari o‘z samarasini ko‘p kuttirmasligi aniq. Xorijiy sarmoyadorlar vohamiz iqtisodiyoti tarmoqlariga kapital kiritib yuqori naf olishdan manfaatdor. Zero, buning uchun barcha sharoit, qulay investitsiyaviy muhit mavjud. Ularning investitsiyaviy faoliyatidan esa viloyatimizga ham foyda: avvalo, yangi quvvatlar ishga tushadi, zamonaviy texnologiyalar olib kiriladi, odamlarimiz doimiy daromad manbai, mustahkam ish o‘rniga ega bo‘ladi.

M.JO‘RAYEV

 

Mirishkor tumanidagi Pomuq qishlog‘ida joylashgan 2-sonli shifoxona 3 milliard 200 million so‘m mablag‘ evaziga to‘liq rekonstruksiya qilinib, foydalanishga topshirildi. Tantanali tadbirda viloyat hokimi Zafar Ro‘ziyev qatnashdi va hudud aholisini zamonaviy tibbiy xizmat ko‘rsatish markazi ochilishi bilan muborakbod etdi.

2017 yilning avgust oyida Muborak gazni qayta ishlash zavodi tasarrufida “Muborak TEKS” paypoq ishlab chiqarish fabrikasi ish boshlagan edi. Har tomonlama puxta o‘ylab amalga oshirilgan loyiha o‘zini oqladi. O‘tgan sakkiz oy davomida korxona sezilarli yutuqlarga erishdi.

Ayni vaqtda subyektda paxta tolasidan oyiga 300-350 ming juft paypoq tayyorlanmoqda. Mahsulot o‘zining sifati va narxi maqbulligi bilan xaridorlarga ega bo‘lib ulgurdi. Ko‘plab xorijiy va mahalliy hamkorlar bilan istiqbolli shartnomalar imzolangan. Bu esa jamoani yanada ruhlantirib, faoliyatni kengaytirishga, yangi loyihalarni yo‘lga qo‘yishga undamoqda.

- Fabrikamizda paypoq mahsulotlaridan tashqari ishchi kiyimlar, maxsus formalar ishlab chiqarishni ham boshladik, - deydi “Muborak TEKS” MCHJ marketing bo‘limi xodimi G‘anisher Xaytaliyev. – Yiliga 18 mingdan oshiq maxsus kiyim ishlab chiqarishni rejalashtirganmiz. Hozirgi vaqtda bir qancha korxonalar bilan ana shu turdagi mahsulotlarni yetkazib berish bo‘yicha shartnomalar imzolandi.  Bundan tashqari, ishlab chiqargan mahsulotlarimizni ichki bozorlar orqali sotishga e’tibor qaratayapmiz. Xususan, joriy yilda Qarshi, Shahrisabz, Kitob shaharlarida, shuningdek, Koson, Chiroqchi, G‘uzor va Muborak tumanlarida savdo markazlarimizni ochish bo‘yicha ish olib borayapmiz.

Ahamiyatli jihati, hududlarda bu kabi salohiyatli ishlab chiqarish korxonalarining ko‘payishi eng avvalo hudud aholisi uchun yangi ish o‘rinlari yaratilishiga zamin hozirlaydi. Birgina, “Muborak TEKS” fabrikasi misolida oladigan bo‘lsak, korxona faoliyati yo‘lga qo‘yilgach, 123 nafar mahalliy yosh ish bilan ta’minlangan edi. Ishlab chiqarish quvvatining oshishi, faoliyatning kengayishi bilan ularning soni 194 nafarga yetdi. Yangi loyihalar ham to‘liq ishga tushgach, o‘z-o‘zidan yana ellikka yaqin xodimga ehtiyoj paydo bo‘ladi.

Jahongir BOYMURODOV

Page 1 of 8

Manzilimiz


Manzil: Qashqadaryo viloyati, Qarshi shahri, Mustaqillik Maydoni,1
Pochta indeksi:180100
Telefon
: 0(375)221-12-88, 0(375)221-03-81
Faks
: 0(375)221-13-40
Veb-sayt
http://www.qashqadaryo.uz
Elektron pochta
Yaqin jamoat transport to`xtash joylari 
Milliy bank va Mustaqillik Maydoni bekati
Avtomashrut
1,4,5,7,10,18,20,22,23,27,
37,44,462,11,21,37,33

Hozir saytimizda

Bizning saytimizda 129 mehmonlar va ro'yhatdan o'tgan foydalanuvchilar 0

Bosh sahifa

Qabul kunlari

A- A A+

Rahbariyatga murojaat etish

Rahbariyatga murojaat etish

Viloyat hokimligining umumiy bo'limiga murojjat etish (Yangi oynada ochiladi)

Mobil versiya

Mobil versiyaga o'tish

Bog'lanish

Ishonch telefon raqami 
0(371) 200-55-05 
Ishonch telefon raqami reglament
Yagona telefon raqami
0(375) 221-07-60 
Yagona telefon raqami reglamenti

Batafsil>>>

Biz bilan bog'lanish

Sahifa adressi

Maxsus imkoniyatlar

K'orinish

Pastda o'zingizga kerakli parametrni tanlasng
Blue Green Red Radian
Select menu
Google Font
Body Font-size
Body Font-family